تەڤلیھەڤیێن ھزرا ئاپۆی د مژارا «ژن، سێکس و ئازادیێ» دا – به‌شێ 4
ژ پرتووکا «ژنۆفۆبیا ئۆجالان» یا نڤیسكار ئاسۆ کەمال
نێرینا دوو ئابووری، ئابوورییا ژنا بەرھەمھێنەر و زەلامێ تالانکەر!
ئۆجالان د بێژیت:
«ھێزا دەستپێکرنا شۆرشا چاندنێ و خودان کرنا گیانەوەران ژن بوویە، ھەردیسان د بێژیت، ژن خودانا راستەقینەیا ئابووریێ یە».
«ئەگەر چ ھەر چالاکییەکا نێچیرڤانی کارێ زەلامی یە، ژ بەر کو نێچیرڤانی پێدڤی ب کولتوورێ شەری یە و پشت بەستنێ ل سەر دەستھەلاتا توند دکەت».
ئۆجالان ل ڤێرێ ناراوستیت و د بێژیت: «تایبەتمەندیێن لەشی یێن زەلامی وەل زەلامی دکەت نەچار بیت ل دووڤ نێچیرڤانیێ بکەڤیت»!
ئانکو ل گۆر ئۆجالانی مادەم زەلامی زەڤلەک، موی و دەنگەکێ ستویر ھەیە، ئێدی ئەو نێچیرڤانە! ئەگەر خۆ چ بکەت ژی دێ ھەر بیتە نێچیرڤان، چونکی ئەو سیفەتە وی پالدەن تنێ نێچیرڤان بیت! ئانکو ئەگەر خۆ ژنەک ژی بچیتە ھۆلێن وەرزشی و بخۆ زەڤلەکا چێکەت بەس نەبێژنە ئاپۆی ئەڤە ژنە ئەو دێ بێژیت؛ مادەم زەڤلەک ھەنە ئەڤە یێ درندەیە یان نێچیرڤان بوویە یان ژی د ڤێت ببیتە نێچیرڤان! ئەڤە لوژیکێ ئاپۆیە!
دا ھێشتا تێزێن ئۆجالانی ڤەکۆلین ژ بۆ کو سەرێ دەزی ل بەرمە بەرز نەبیت
وی دگوت دوو ئابووری، جارێ دیار نەکرییە ژێدەرێ ڤێ مێژوویێ ل کیرێ ئینایە کو دبێژیت: «دوو ئابووری ھەبووینە، ئێک چاندن یا ژنان، دوو نێچیرڤانی یا زەلامان .
دەورێ ژنان چاندن و گەنم و دان بوویە و دەورێ زەلامی ژی نێچیرڤانی بوویە؟
دا بزانین زانست چ دبێژیت؛ ل گۆری زانستێ ل دەستپێکێ جڤاکی ژ نێچیرڤانیێ یا دەست پێ کری پاش بەر ب ئاژەلداریێ و چاندنێ ڤە چوویه، دا ڤان دەورا پتر روهن بکەین، ل گۆری وان سەلماندنێن زانستی یێن بەردەستێ مە، ژ بۆ کو ب سەلمینین تێزێ دوو ئابووری و چاندنا ژنان و نێچیرڤانییا زەلامان یا ئۆجالانی ل سەردەما دایکسالاری دا چ بنەمایێن زانستی نینە.
– ل جەم مۆرگان، جڤاکا مرۆڤاتی د سێ قۆناغان دا دەربازبوویە، درنداتی و بەربەری و شارستانی.
درنداتی: ئەو قۆناغەیە یا سروشت زاڵ ل سەر مرۆڤی، د ڤێ قۆناغێ دا ئەو بەرھەمێن مرۆڤ دروست دکەت بریتی یە ژ وان ئالاڤێن ھاریکارییا مرۆڤی دکەت ژ بۆ ب دەستڤەئینانا بەرھەمێن سروشتی، بۆ نمووونە ژ بۆ کو نێچیرڤانیێ بکەی تو پێدڤی ب دارەکێ یان ئالاڤەکی.
قۆناغا بەربەریزمێ: قۆناغا دەستپێکا جۆتكاریێ و ئاژەلداریێ یە، ئەو قۆناغەیە یا مرۆڤ شیایی بەرھەمێ سروشتی زێدە بکەت ژ ئەنجامێ چالاکبوونا مرۆڤی.
قۆناغا شارستانی: ئەو قۆناغە یا مرۆڤ فێری چارەسەر کرنا بەرھەمێن سروشتی بووی، بۆ نموونه مرۆڤی دزانی چاوا سەرەدەریێ دگەل بەرھەمێ خۆ بکەت و دەمێ تووشی ئارێشەیه‌کێ یان نەخۆشییەکێ دبوو زانی چاوا چارەسەر بکەت وەکی دانانا ھەلاماتان ل ناڤ گەنمێ خۆ دا گیانەوەر نەھێنێ.
ئانکو مرۆڤ د ڤان ھەمی قۆناغان دا خودانێ خۆ ئێک ئابووری بوویە، ئابووریا ژنێ و یا زەلامی تێزەکە ئۆجالانی ژ بنێ پێ خۆ یا چێکری!
ئەگەر گریمان تێزا ئۆجالانی راستبکەین کو د بێژیت: «ژن ژێدەرێ پەیدابوونا بەرھەمێن جۆتكاری یە و زەلام ژی یێ نێچیرڤانی»، باشە ئەگەر ل گۆر مەژیێ ئاپۆی دوو ئابووری ھەنە و کار ھاتییە دابەش کرن د ناڤبەرا ژن و زەلامان دا، باشە ل وی دەمی بەروڤاژی نەدبوو ژن دا بیتە خودان دەستھەلاتا ئابووری، ژ بەر کو بەرھەمێ ژنێ پتربوویە ژ یێ زەلامێ نێچیرڤان، پا چاوا زەلام شیا ژنێ بکەتە بندەست و کۆلە د دەمەکی دا ژن خودانا بەرھەمێن جۆتكاریێ یە؟
پرسیار ئەرێ ئەڤە دگەل لۆژیکی د گونجیت؟
ئەرێ یا دروست چاوایە؟ دەما مرۆڤ شیایی بەرھەمی زێدە بکەت، ژ ئەنجامێ گەشەیا بەرھەمئینانێ ژ ھەمی ئالیێن ئاژەلداری و جۆتكاری و پیشەیا مالان، ئێدی ھەوجەیا کار کرنا زێدە پەیدابوو، شەر دروست بوون، ئێخسیرێن شەری کرنە کۆلە داکو کارێ زێدە بکەن، ئاھا ل ڤێرێ کار ھاتە دابه‌ش كرن ل سەر سەروەت و سامانی و جڤاک ھاتە دابه‌ش كرن بۆ چینا زەلامێن مەزن و چینا کۆلا، ب واتایەکا دی دەما بەرھەمێ زێدە چێبووی د بیاڤێ جۆتكاری و ئاژەلداریێ دا، پێدڤی ب ھێزا نوو یا کار کرنێ بوو، ئاھا ل ڤێرێ پەیوەندییا د ناڤبەرا ژن و زەلامی دا ژی روھن دبیت کو زەلام خودانێ ئالاڤ و ئامرازێن ھەم جۆتكاریێ یە و ھەم ژی یێن نێچیرڤانیێ یە، ژ بەر کو خۆ دەما جودابوون چێدبوو زەلامی ھەمی ئالاڤێن بەرھەمئینانێ بۆ خۆ دبر و ژنێ ژی سێنیک و ئامانێن نافمالێ دبرن، ئانکو زەلام خودانێ ھەمی وان بەرھەمانە نە ژن!
ئەڤا ئۆجالان گوتی کو ژن خودانا شۆرشا جۆتكاریێ و ئاژەلداریێ یە ل چ قۆناغێن مێژوویی دا وه‌سا نەبوویە، بەلکو خۆ د قۆناغا درندەیی ژی دا ئەوا مۆرگان پۆلینکری کو ئابووری بریتی بوویە ژ نێچیرڤانیێ ھەر ژنێ کارێ ناڤمالێ یا کری، نە جۆتكاری و ئاژەلداری، بەلکو دەما بەر ب قۆناغا جۆتكاری و شڤانیێ چووی ھەر ژنێ کارێ ناڤمالێ کری، ژ بەر ھندێ یا بوویە پاشكۆیا زەلامی، ئەگەر نە، نەلۆژیک و نەژی زانست قه‌بوول ناکەن ژن خودانا بەرھەمێن چاندنێ و کەھیکەرا گیانەوەران بیت و ھەر ببیتە کۆلە؟
ئەڤە بخۆ کێم کرنا ژنێ یە نە زێدەتر!
ئۆجالان د بێژیت: «رۆل دیتنا ژنێ د سەنتەرێ ئابووریێ دا، سیفەتەکە باش مرۆڤ ھەست پێ دکەت، ژ بەر کو زارۆک دبن و خودان دکەت».
ئەڤ تێزە ته‌مام بەروڤاژی دیرۆکێ یە، ژ بەر کو ئەڤا ژن زەلیل کری ئەو مانا وێ بوویە د مالێ دا، پەیدابوونا زارۆکان بخۆ ژن کرییە مولکێ زەلامی و قەدەم لێ شکاندینە کو رۆلێ خۆ بگێریت، ئۆجالان ئیدیعایا وێ چەندێ دکەت «پیشەیا ئابووری و چالاکییا جڤاکی ژنە».
لێ ھوین دزانن كو ئابووری و سەنتەربوونا ژنێ ل دەڤ ئۆجالانی د چارچوڤێ زارۆک خودانکرنێ و زارۆک بوونێ دا به‌رته‌نگ دبیت!
بەس ل گۆری ئۆجالانی ژن د ئەزەل دا خودانا ئابووریێ و بەرھەمێن چاندنێ یە، ئیدی ئەگەر د واقعی دا، ھەمی تشتەک بەروڤاژی ڤی تێزی بن ھەر ژن پێشەنگا ئابووریێ یە، ئەڤە وەک تێز یێ د فرۆتینە مە ددەمەکێ دا چ عەقل و لۆژیک و دیرۆک قەبوول ناکەن.
ددەمەکێ دا ئابووری د سەردەما دەورانا کۆلاتیێ و دەرەبەگاتیێ و سەرمایەداریێ دا، ژ ئالیێ زەلامی یا ھاتییە رێڤەبرن و کۆنترۆل کرن، ئەرێ ژنۆلۆژیا ئۆجالانی ڤێ چەندێ ھەزم دکەت! یان ئەڤ کتێبا مل ستیر ژبلی پرۆپاگندە و راکێشانا عاتیفا ژنێ چ تشتێ دی ژ بۆ نینە!
