محەمەد سەلیم چوروککایا یەک ژ دامەزرینەرێن پەکەکێ یە، ئەو رۆژنامەڤان، سیاسەتمەدار و نڤێسەرە، ژبەر ولاتپارێزی و کوردپەروەریا وی دەما 11 سالان د زندانێن جودا یێن ترکیێ دە د رەوشەک هەری خراب دە ل بەر خوە دا و تەسلیم نەبوو، دەما ژ زندانێ ئازاد دبە، بەرێ خوە ددە چیا، ب عەڤدللا ئۆجالان رە دیسا تێکلدار دبە، دەما ژ زندانێ ئازاد بووی و ڤەگەریای ناڤا پەکەکێ دە ژ گەلەک تشتێن د ناڤا پەکەکێ دا بووین یاسا نەرازی بوو، لێ نەکاری نەرازبوونا خوە ب ئازادانە بەیان بکە، ژ بەر کو دیارکرنا نەرازیبوونێ ب واتەیا دژاتیکرنا ئۆجالان تێ، بێی گومان ئەڤ یەک ژی دا ببە سەدەما سووچبارکرنا وی ب ئیخانەتێ و پشترە تەسفیەکرنا وی، ژ نەچاری بریارا رەڤین ژ ناڤا پەکەکێ و ڤەقەتینا ژ ڤێ پارتیێ ددە، وی ب نڤسیاندنا پرتووکەکێ ب ناڤێ “ئایەتێن ئاپۆ” هەول دا راستیا ئۆجالان و پەکەکێ ژ گەلێ کورد و جیهانێ رە ئەشکەرە بکە.
د ڤێ پرتووکێ دە باش خویا دبە کو گەلەک تەنگاسی دیتنە هەیا کو بکارە خوە بگهینە ئەورۆپایێ، دەما ژ پەکەکێ ڤەدقەتە و ل لبنانێ بێی پەرە و پاسپۆرت دکەڤە کۆچە و کۆلانێن بەیرۆتێ، پڕ جاران د خەیالێن خوە دە هن پرسێن گرینگ ژ خوە دکە کو مرۆڤ دکارە ووسا شیرۆڤە بکە کو گەر ئەو بهاتا گرتن دا ئۆجالان ژی هەمان پرسان ژ وی بکە. ئەمێ هەول بدن د چەند نڤیسان دە باسی هن ژ ئەگەرێن ڤەقەتینا چوروککایا ژ پەکەکێ و هەلوەست و بریارێن ئۆجالان د ناڤا پەکەکێ دە کو نڤێسەر ب “ئایەتێن ئاپۆ” ددە ناسکرن بکن.
د نەرینا محەمەد سەلیم چوروککایا دە ئۆجالان چەوا ل جڤاتا کو دخوازە پێک بینە دنێرە؟
ئۆجالان: جڤاتەک یەکدەنگ، ژ هندەک مرۆڤان پێک تێ کو ژ کۆلەیان کێمترن و بوونە بەندە، ئەز وێ یەکی دزانم، برێڤەبرنا جڤاتەک ب ڤی ئاوا پڕ هێسانە، کەرێ پەزی نە، بەلێ کەرێ پەزی نە، دەستپێکێ ئەز هندەک بەرخان دئافرینم پشترە هەموویان کۆم دکم و دکم کەرێ پەزی، شڤا خوە هلدگرم و ل پێشیا وان دمەشم، ئەز ل پێشیێ مە و کەرێ پەزی ل دووڤ من دە تێ، گەر من گۆت هەرن ئالیێ راستێ دێ چن ئالیێ راستێ، گەر ژی من گۆت هەرن ئالیێ چەپێ دێ چن ئالیێ چەپێ، ما ئەز تشتەکی خراب دکم؟ ئەڤە کارێ ب کۆمە، دەما بەندەیێن من ئایەتێن من دخوینن مەست دبن، ئەز ب خوە بۆ خوە دبێژم، گەلۆ مرۆڤ دبیتە پەز، دبیتە گا، دبیتە کەر، لێ نە هەیا ڤی رادەی، ژ بەر کو ئەز روو ب روو خەبەران دبێژمە زلامێن خوە ئەو پڕ کێف خوەش دبن.
دەما محەمەد جەلال بۆجاک ل سێڤرکێ گۆتیە کەسەکی “کووچک”، ئەو کەس پڕ کێفخوەش بوو، هەر کەسێ مێزە دکر دەما دگۆت، لێ بنێرن “ئیرۆ ئاغا ژ من رە گۆت کووچک”، یێن مە ژی وەکە وی زلامی نە، ئانکو ئەڤە پرسگرێکەکا چاندی یە د ئاکادەمیایا مە دە، ئیسماعیلەک هەبوو ژ باشوور بوو و ژیێ وی نێزی 32 سالان بوو، دو سال بوو کارێ کامیرایێ ژ مە رە دکر، هەر رۆژ من ژێ رە دگۆت کەرێ کەرباب، لێ پڕ کیفخوەش دبوو، ئەز ژ بەندەیێن خوە رە دبێژم “کورێ ماکەرێ”، ئەز تەئۆریان ژێ رە دادرێژم ئەز وان پشتراست دکم کا ئەو چەوا کورێن کەری نە، یا کو ئەز شیرۆڤە دکم ئەو وەکە وانە دخوینن، ئاها ئەڤە شێوازێ رێبەرتیێ یە.
د ناڤا بەندەیێن من دە خەبەر گۆتن نایێ دیتن، من بهیست هندەک کەس خوە ناس ناکن، دەما خەبەر د ناڤا ئایەتێن من دە دیتین ب شەر کەتنە، من ئەو گرتن و دادگەهکرن، یێن کو من کرین کۆلەیێن خوە ئێریشی وان کرن، گەر من رێ ب وان دابا دا هەڤ دو کوژن، لێ من رێ نەدا، گەلۆ گەر ئەو ب ڤی ئاوا نەبن وەکە من قال کری ما دێ شەرێ مە کری ب سەر بکەڤە؟ گەر ئەز نەباما رۆژەک ب تەنێ ژی بەندەیێن من ل همبەر دوژمنی خوە رانەدگرت، ئەز وان پەروەردە دکم، ئەز چەک و فیشەکان ژ وان رە بەرهەڤ دکم، ئەز وان دشینم چیایان، دچن و ل سەر وان ئامادەکاریێن من کرین روو دنن، باشە بێ نرخ من ژ وە رە گۆتیە بچن وە بکن؟ ئەو من فێم ناکن، لێ پر باشە کو من فێم نەکن، ژ من رە پڕ خوەشە کو کەسەکی وسا بم چ کەس من فێم نەکە، ژ وە پێڤە تر ژ کەسێ رە نابێژم، ژ وە رە دبێژم ژ بەر کو هوون مرینە و ژ کەسێ رە نابێژن، هەر رۆژا بەندەیێن من ئەز فێم کرم وێ کارێ من ب داوی وەرە، ج قاس من فێم نەکن ژی وێ ئەز ل سەر دەستهلاتا خوە بەردەوام بم، خوەدێ لۆما بوونە خوەدێ ژ بەر کو مرۆڤ وان فێم ناکن، هەر دەما ئەو فێم کرن وێ خوەداوەندیا وان ب داوی وەرە، رەوشا من ژی ب ڤی ئاوا یە، لۆما ڤان کۆمپلۆیان دگێرم کو من فێم نەکن، لێ تەڤی ڤێ یەکێ هن کەس هەنە من فێم دکن، دەما من زانی وان ئەز فێم کرمە، پێش کو تشتەکی بکن ئەز رێکارێن پێوسیت ل همبەر وان ئەنجام ددم، ئەز وان شێوازا بکار تینم یێن ت کەسەک قەبوول نەکە، ب ڤی ئوا یان وێ رەڤن، یان وێ خوە بکوژن یانژی وێ ئەم وان بکوژن.
