محەمەد سەلیم چوروککایا یەک ژ دامەزرینەرێن پەکەکێ یە، ئەو رۆژنامەڤان، سیاسەتمەدار و نڤێسەرە، ژبەر ولاتپارێزی و کوردپەروەریا وی دەما 11 سالان د زندانێن جودا یێن ترکیێ دە د رەوشەک هەری خراب دە ل بەر خوە دا و تەسلیم نەبوو، دەما ژ زندانێ ئازاد دبە، بەرێ خوە ددە چیا، ب عەڤدللا ئۆجالان رە دیسا تێکلدار دبە، دەما ژ زندانێ ئازاد بووی و ڤەگەریای ناڤا پەکەکێ دە ژ گەلەک تشتێن د ناڤا پەکەکێ دا بووین یاسا نەرازی بوو، لێ نەکاری نەرازبوونا خوە ب ئازادانە بەیان بکە، ژ بەر کو دیارکرنا نەرازیبوونێ ب واتەیا دژاتیکرنا ئۆجالان تێ، بێی گومان ئەڤ یەک ژی دا ببە سەدەما سووچبارکرنا وی ب ئیخانەتێ و پشترە تەسفیەکرنا وی، ژ نەچاری بریارا رەڤین ژ ناڤا پەکەکێ و ڤەقەتینا ژ ڤێ پارتیێ ددە، وی ب نڤسیاندنا پرتووکەکێ ب ناڤێ “ئایەتێن ئاپۆ” هەول دا راستیا ئۆجالان و پەکەکێ ژ گەلێ کورد و جیهانێ رە ئەشکەرە بکە.
د ڤێ پرتووکێ دە باش خویا دبە کو گەلەک تەنگاسی دیتنە هەیا کو بکارە خوە بگهینە ئەورۆپایێ، دەما ژ پەکەکێ ڤەدقەتە و ل لبنانێ بێی پەرە و پاسپۆرت دکەڤە کۆچە و کۆلانێن بەیرۆتێ، پڕ جاران د خەیالێن خوە دە هن پرسێن گرینگ ژ خوە دکە کو مرۆڤ دکارە ووسا شیرۆڤە بکە کو گەر ئەو بهاتا گرتن دا ئۆجالان ژی هەمان پرسان ژ وی بکە. ئەمێ هەول بدن د چەند نڤیسان دە باسی هن ژ ئەگەرێن ڤەقەتینا چوروککایا ژ پەکەکێ و هەلوەست و بریارێن ئۆجالان د ناڤا پەکەکێ دە کو نڤێسەر ب “ئایەتێن ئاپۆ” ددە ناسکرن بکن.
محەمەد سەلیم چوروککایا دەما ژ زندانێ ئازاد دبە و ڤەدگەرە ناڤا پەکەکێ دە چما ژ خوە دپرسە کا ئەو هاتیە گوهەرتن یان ژی پەکەکە هاتیە گوهەرتن؟
د ڤێ دەربارێ دە چوروککایا د رووپەلێ 27 یێ پرتووکا خوە یا ب ناڤێ ئایاتێن ئاپۆ دە دبێژە: ل سالا 1974ان ئەز ب باوەریەک تام تەڤلی رەفێن پەکەکێ بووم کو ل وێ دەمێ ت کەسی باهوەری ب پەکەکێ نەبوو، پەکەکەیا کو ئیرۆ گەلەک کەس باهوەریێ پێ دئینن، ئەز موتلەق باهوەریێ پێ نائینم، رەڤینا من نایێ وێ واتەیێ کو ئەز هاتمە گوهەرتن، بەلکو سەربۆر و شەهرەزایی و زانینا من ئەز پێتر رژد کریمە، هەر وەک رۆژا یەکێ من دەست ب خەباتێ کری، ئیرۆ ژی ئەز د وێ باهوەرێ دە مە ب بکارئانینا هێز و ئیرادەیا خوەیا ئازاد سەرخوەبوونا خوە ب دەست بخە، لێ ئەو تشتا هاتیە گوهەرتن و سەروبن بوویی، پارتیا کارکەرێن کوردستانێ ئانکو پەکەکەیە، پەکەکە ئێدی نە پەکەکەیە، پارتیەک ووسا نها تونە، رێبەرێ مەزن ئەو پارتی ژناڤبرییە، و خوە ل شوونا پەکەکێ دانییە، ئیرادەیا گەل و رێبەرێ گەل ئەو پارتی نینە، بەلکو رێبەرێ مەزنە، هەر بریارەکا رێبەرێ مەزن بدە د هەمان دەم دە بریارا گەلە، رێبەرێ مەزن ب بیروباوەر و ل گۆر حەزا خوە شۆرەش ژ مە رە دارشتییە.
