محەمەد سەلیم چوروککایا یەک ژ دامەزرینەرێن پەکەکێ یە، ئەو رۆژنامەڤان، سیاسەتمەدار و نڤێسەرە، ژبەر ولاتپارێزی و کوردپەروەریا وی دەما 11 سالان د زندانێن جودا یێن ترکیێ دە د رەوشەک هەری خراب دە ل بەر خوە دا و تەسلیم نەبوو، دەما ژ زندانێ ئازاد دبە، بەرێ خوە ددە چیا، ب عەڤدللا ئۆجالان رە دیسا تێکلدار دبە، دەما ژ زندانێ ئازاد بووی و ڤەگەریای ناڤا پەکەکێ دە ژ گەلەک تشتێن د ناڤا پەکەکێ دا بووین یاسا نەرازی بوو، لێ نەکاری نەرازبوونا خوە ب ئازادانە بەیان بکە، ژ بەر کو دیارکرنا نەرازیبوونێ ب واتەیا دژاتیکرنا ئۆجالان تێ، بێی گومان ئەڤ یەک ژی دا ببە سەدەما سووچبارکرنا وی ب ئیخانەتێ و پشترە تەسفیەکرنا وی، ژ نەچاری بریارا رەڤین ژ ناڤا پەکەکێ و ڤەقەتینا ژ ڤێ پارتیێ ددە، وی ب نڤسیاندنا پرتووکەکێ ب ناڤێ “ئایەتێن ئاپۆ” هەول دا راستیا ئۆجالان و پەکەکێ ژ گەلێ کورد و جیهانێ رە ئەشکەرە بکە.
د ڤێ پرتووکێ دە باش خویا دبە کو گەلەک تەنگاسی دیتنە هەیا کو بکارە خوە بگهینە ئەورۆپایێ، دەما ژ پەکەکێ ڤەدقەتە و ل لبنانێ بێی پەرە و پاسپۆرت دکەڤە کۆچە و کۆلانێن بەیرۆتێ، پڕ جاران د خەیالێن خوە دە هن پرسێن گرینگ ژ خوە دکە کو مرۆڤ دکارە ووسا شیرۆڤە بکە کو گەر ئەو بهاتا گرتن دا ئۆجالان ژی هەمان پرسان ژ وی بکە. ئەمێ هەول بدن د چەند نڤیسان دە باسی هن ژ ئەگەرێن ڤەقەتینا چوروککایا ژ پەکەکێ و هەلوەست و بریارێن ئۆجالان د ناڤا پەکەکێ دە کو نڤێسەر ب “ئایەتێن ئاپۆ” ددە ناسکرن بکن.
ئۆجالان د دەربارا کادرۆیێن پەکەکێ دە کو وەکە کۆلەیێن خوە دحەسبینە چ دبێژە؟
ئەز گەلەک مافێ ئاخافتنێ ددم بەندەیێن خوە، لێ نکارن باخڤن، نکارن هندەک پەیڤان ب هەڤ رە کۆم بکن، گەلەک مەژی هشکن، گەلەک سڤکن، هەر ئەز دئاخڤم و ئەو گوهداریێ دکن.
رۆژنامەڤانەکا ئەلمانی هات ڤڕ و ژ من رە گۆت: د جیهانێ دە کەس وەکە تە رەوانبێژ تونەیە، ئەز چ بکم زلامەک تونە ل همبەری من بپەیڤە، من ژێ رە گۆت، جڤاکا مە ووسا بێ زمان کرینە، وێ رۆژنامەڤانێ ب خوە ژی نەدزانی بپەیڤە و هزر بکە، من ئەو ژی بێدەنگ کربوو، من بێدەنگ کربوون و پێویست بوو وان بێدەنگ بکم، ژ بەر کو خوەداوەند دئاخڤە و کۆلە گوهداریێ دکن و دبێژن ئامین، یێ کو بەندەیێ من بە ب تەنێ دکارە گۆتنێن من دوبارە بکە، ب تەنێ ب وان گۆتنێن ئەز بکار دئینم دکارە بئاخڤە، ئافراندنا هەر هەزر و بیرەک دن ژ بلی وێ یا ئەز دبێژم مونافقییە، من مەژیکێ بەندەیێن خوە ولو کریە کو ل شوونا هزر بکن، هزر و بیرێن من دوبارە بکن، لۆما ب هەمان شێوە هزر دکن و دەما دنڤیسن ژی ب هەمان شێواز دنڤیسن، دەما دپەیڤن ب هەمان شێواز دپەیڤن، ئەڤ رێیەک پڕ باشە، ب ڤی ئاوا یەک جورێ مرۆڤان تێ ئافراندن، ئەڤ میناکا وێ جڤاکا یەک جورە یا بزاڤان دکم بئافرینم، دەما هزر و بیرێن جودا نەبن، پرسگرێک و سەرگێژی و شەرەدەڤ دروست نابن، ئۆپۆزسیۆن ژی ل دژی من دروست نابە، ئەز دبێژم و ئەو دوبارە دکن و دەما هەموو ب هەڤ رە دوبارە دکن ئەو دبە بیر و رایا گشتی.
دا ب ئاوایەک ئەشکەرەتر باس بکم، ئەز ب تەنێ هزران دئافرینم، ووسا باشترە! کاروبار برێڤە دچن یان نا؟ ئەز ب ڤی ئاوا لێ دنێرم، هەتتا پێویست ناکە کۆلە هزر ژی بکە، ما ل همبەر گۆتنێن خوەدێ کۆلەیان هزر هەنە؟
من یاسایێن خوە دانینە و من گۆتیە، هەر کەسێ کو ڤان یاسایان ب وان پەیڤێن من گۆتی دوبارە نەکە، ئەو ل دژی پەکەکێ یە و مونافقە و ل سەر رێبازا پارتیێ نینە، کۆلەیێن من ل دەما گۆتنا وانەیان ل ئاکادمیێ دکارن ب دەستویری وەرگرتن بپەیڤن، ب وی ئاوایی دپەیڤن یێ من ژ وان رە شیرۆڤە کری و ئەو ژ من رە دوبارە شیرۆڤە دکن، من ئازادییا دوبارەکرنێ دایە وان، لێ دەما کو ئەز د وانەیێ دە ئامادە ببم پێدڤی ناکە ئەو گەلەک بئاخڤن، ژ بەر کو دێ هەر وێ دوبارە کن یا من ژ وان رە گۆتی، ما پێدڤی دکە نانی بفرۆشی نانپێژی؟ بێی گۆمان نەخێر، گاڤا یەکەم ژ بۆی خوەداوەندیێ ئەڤە: رێ نەدن کۆلە هزران بئافرینن، بلا یا تو دبێژی دوبارە بکن و جێبەجێ بکن، هەر دەما تە کۆلەیێن ب وی ئاوایی ئافراندن وێ دەمێ تە گاڤا یەکەم بەر ب خوەداوەندیێ ئاڤێتیە، لۆما ئەز رەوانبێژیێ دکم، وان نزم دکم، رێ نادم هزران بئافرینن و وان دخم رەوشەکی کو ب تەنێ گۆتنێن من دوبارە بکن، ژ بەر کو ئەو کۆلەیێن منن، هەر کەس راست یان چەپ بچە دێ ڤێ ل سەر پەیرەو بکم.
