محەمەد سەلیم چوروککایا یەک ژ دامەزرینەرێن پەکەکێ یە، ئەو رۆژنامەڤان، سیاسەتمەدار و نڤێسەرە، ژبەر ولاتپارێزی و کوردپەروەریا وی دەما 11 سالان د زندانێن جودا یێن ترکیێ دە د رەوشەک هەری خراب دە ل بەر خوە دا و تەسلیم نەبوو، دەما ژ زندانێ ئازاد دبە، بەرێ خوە ددە چیا، ب عەڤدللا ئۆجالان رە دیسا تێکلدار دبە، دەما ژ زندانێ ئازاد بووی و ڤەگەریای ناڤا پەکەکێ دە ژ گەلەک تشتێن د ناڤا پەکەکێ دا بووین یاسا نەرازی بوو، لێ نەکاری نەرازبوونا خوە ب ئازادانە بەیان بکە، ژ بەر کو دیارکرنا نەرازیبوونێ ب واتەیا دژاتیکرنا ئۆجالان تێ، بێی گومان ئەڤ یەک ژی دا ببە سەدەما سووچبارکرنا وی ب ئیخانەتێ و پشترە تەسفیەکرنا وی، ژ نەچاری بریارا رەڤین ژ ناڤا پەکەکێ و ڤەقەتینا ژ ڤێ پارتیێ ددە، وی ب نڤسیاندنا پرتووکەکێ ب ناڤێ “ئایەتێن ئاپۆ” هەول دا راستیا ئۆجالان و پەکەکێ ژ گەلێ کورد و جیهانێ رە ئەشکەرە بکە.
د ڤێ پرتووکێ دە باش خویا دبە کو گەلەک تەنگاسی دیتنە هەیا کو بکارە خوە بگهینە ئەورۆپایێ، دەما ژ پەکەکێ ڤەدقەتە و ل لبنانێ بێی پەرە و پاسپۆرت دکەڤە کۆچە و کۆلانێن بەیرۆتێ، پڕ جاران د خەیالێن خوە دە هن پرسێن گرینگ ژ خوە دکە کو مرۆڤ دکارە ووسا شیرۆڤە بکە کو گەر ئەو بهاتا گرتن دا ئۆجالان ژی هەمان پرسان ژ وی بکە. ئەمێ هەول بدن د چەند نڤیسان دە باسی هن ژ ئەگەرێن ڤەقەتینا چوروککایا ژ پەکەکێ و هەلوەست و بریارێن ئۆجالان د ناڤا پەکەکێ دە کو نڤێسەر ب “ئایەتێن ئاپۆ” ددە ناسکرن بکن.
محەمەد سەلیم چوروککایا د دەربارا بابەتێن ل ئاکادمیا مەعسووم کۆرکماز دهاتن خوەندن چ دبێژە؟
د ئاکادمیا مەعسووم کورکماز دە وانەیێن زێدەتر دهاتن خوەندن؛ بابەت پێوەندیدار بوون ب رێبەرێ پارتیێ ڤە، تەڤی کو من باوەری پێ نەبوو، لێ ژ نەچاری من ژی ئەو وانە دگۆتن، ئەرکێ من ئەو نەبوو راستیان و رێیا راست دیار بکم، بەلکو ئەرکێ من دوبارەکرنا ئایدۆلۆژیا فەرمی بوو، مە دگۆ “رێبەرییا پارتیێ” سازییەکە، ووسا فەرمان ل مە هاتبوو کرن و مە ژی ووسا دوبارە دکر، پێویست بوو ئەم ببێژن “ئەڤ سازی ئیرادەیا تەڤ گەلێ کوردە”.
