محەمەد سەلیم چوروککایا یەک ژ دامەزرینەرێن پەکەکێ یە، ئەو رۆژنامەڤان، سیاسەتمەدار و نڤێسەرە، ژبەر ولاتپارێزی و کوردپەروەریا وی دەما 11 سالان د زندانێن جودا یێن ترکیێ دە د رەوشەک هەری خراب دە ل بەر خوە دا و تەسلیم نەبوو، دەما ژ زندانێ ئازاد دبە، بەرێ خوە ددە چیا، ب عەڤدللا ئۆجالان رە دیسا تێکلدار دبە، دەما ژ زندانێ ئازاد بووی و ڤەگەریای ناڤا پەکەکێ دە ژ گەلەک تشتێن د ناڤا پەکەکێ دا بووین یاسا نەرازی بوو، لێ نەکاری نەرازبوونا خوە ب ئازادانە بەیان بکە، ژ بەر کو دیارکرنا نەرازیبوونێ ب واتەیا دژاتیکرنا ئۆجالان تێ، بێی گومان ئەڤ یەک ژی دا ببە سەدەما سووچبارکرنا وی ب ئیخانەتێ و پشترە تەسفیەکرنا وی، ژ نەچاری بریارا رەڤین ژ ناڤا پەکەکێ و ڤەقەتینا ژ ڤێ پارتیێ ددە، وی ب نڤسیاندنا پرتووکەکێ ب ناڤێ “ئایەتێن ئاپۆ” هەول دا راستیا ئۆجالان و پەکەکێ ژ گەلێ کورد و جیهانێ رە ئەشکەرە بکە.

د ڤێ پرتووکێ دە باش خویا دبە کو گەلەک تەنگاسی دیتنە هەیا کو بکارە خوە بگهینە ئەورۆپایێ، دەما ژ پەکەکێ ڤەدقەتە و ل لبنانێ بێی پەرە و پاسپۆرت دکەڤە کۆچە و کۆلانێن بەیرۆتێ، پڕ جاران د خەیالێن خوە دە هن پرسێن گرینگ ژ خوە دکە کو مرۆڤ دکارە ووسا شیرۆڤە بکە کو گەر ئەو بهاتا گرتن دا ئۆجالان ژی هەمان پرسان ژ وی بکە. ئەمێ هەول بدن د چەند نڤیسان دە باسی هن ژ ئەگەرێن ڤەقەتینا چوروککایا ژ پەکەکێ و هەلوەست و بریارێن ئۆجالان د ناڤا پەکەکێ دە کو نڤێسەر ب “ئایەتێن ئاپۆ” ددە ناسکرن بکن.

محەمەد سەلیم چوروککایا د دەربارا کۆلەکرنا کادرۆیێن پەکەکێ ژ ئالێێ ئۆجالان ڤە چەوا دفکرە و ژ زار دەڤێ ئۆجالان ڤێ یەکێ چەوا بەیان دکە؟

ئۆجالان: ئارمانجا دادگەهێن مە ئەڤە کو تەڤ کەسان بینن سەر رێیا راستا من، ئارمانجا کوشتنێ ژی ئەڤە، پەی رە ئارمانجا زیندانکرنێ ژی هەر ئەڤە، هەر وها ئارمانجا ئیشکەنجەکرنێ و هەر تشتی ئەڤە، تام ب ڤی ئاوا تێن سەر رێیا راست، یا کو ئەز دبێژم بێی قەید و مەرج پەسەند دکن، وەکە هزرێن من هزر دکن، پەیڤێن کو ئەز بکارتینم دوبارە دکن، ئەو ب خوە دەست ژ هزرکرنێ و دیتنا بیرۆکەیان بەرددن، پشتەڤانیا وان هزران دکن یێن کو ئەز حازر ددم دەست وان، تەڤ ژی وەک هەڤن، سەرێ وان لێ بدە و نانێ وان ژێ بستینە، گەلەک هەژارن، ل همبەر لەشکرێ ترکیێ مینا بەرخێن قوربانیێ نە، ژ بەر ڤێ یەکێ مینا پەزی نە و نکارن بفکرن، هەموو دەمان ژ وان رە دبێژم، هوون بەرخێن قوربانیێ نە، ئەو ژی دبێژن بەلێ سەرۆک.

پر بێی هێزن، ژ بەر کو من هێزا وان ژ وان ستەندیە، نکارن بپەیڤن، ژ بەر کو هەر دەم ئەز دپەیڤم، ئەو پڕ بچووک و بێی کەساتی و سڤکن، ژ بەر کو ئەز پڕ ژ هەژی و ئاست بلندم، نکارن هزر د ت تشتەکی دە بکن، ژ بەر کو ئەز ب تەنا سەرێ خوە هزر دکم، ت داهینانا ناکن، ژ بەر کو داهینەر ب تەنێ ئەزم، ت یەک ژ وان نکارە تەئۆریەکی دارێژە، ژ بەر کو ئەز د دارێژم، نکارن دو پەیفا بینن با هەڤ، فەرماندارێن وان یێن هەری ژێهاتی ژی ل همبەری من دبێژن رێبەرتی راست دبێژە، راستە بەلێ سەرۆک، وەیە سەرۆک، تەمامە سەرۆک، ژ ڤان پەیڤان زێدەتر ت پەیڤەکە دن نابێژن، نها قەی ئەز دبێژم نەئاخڤن؟ نااا، ئەز نە ئەو کەسم خەلکێ بێ دەنگ بکم، ئەز رێ ددم ئەو باخڤن، کی رێ ددە ب ملیۆنان کەس  باخڤن؟ دەما ئەز وسا دبێژم کەرێن کورێن کەران، دەملدەست باوەریێ ب دەمۆکراسیبوونا من تینن، ژ خوە د راستیێ دە نە وسایە، یێن من ئانینە سەر رێبازا رێبەراتیێ ئانکو یێن من خستینە د بن کۆنترۆلا خوە دە و من کرینە کۆلە نکارن بفکرن، ب تەنێ ئایەتێن من دوبارە دکن، ژ وێ یەکێ زێدەتر نکارن ت بیرۆکەیان دارێژن، ت پەیڤان ببێژن، من زلامێن خوە خستینە ڤێ رەوشێ، بێی گۆمان ژ من قەبوول کریە کو هزر و بیرێن من هزر و بیرێن پارتیێ نە، ئایاتێن من ژی نەرینا پارتیێ یە، کۆلە نکارن بۆچوونا پارتیێ بخن ئالیەکی و بۆچوونا خوە ببێژن، بۆچوونێن پارتیێ یێن منن.

لێ بەلێ من ئەو باوەری ژ وان رە چێکریە کو ئەو رایا گشتی نە، چەوا باوەری ب من ئانیە؟ من ژ هەموویان رە گۆتیە، کو هزرێن راست یێن منن، هزرکرنێن وان ژی یێن کەمالیزم و فاشیزم و نزانم کێ نە، هەموویان دەست ژ هزرکرنێ بەردایە، پاش کو مایینە بێی هزر، دەست ب دوبارەکرنا هزرێن من کریە، ب ڤێ یەکێ ئەز بلند بوومە و بوومە رێبەرێ ستراتەژی و بەندەیێن من داکەتنە رێبەراتیا تاکتیکی، ئەڤ وێ یەکێ دسەلمینە کو ئەز دفکرم و بێی ت هزرکرن کۆلەیێن من وان هزران جیبجی دکن، یا راست ژی پێویستە وسا بە، گەر د پارتیێن دن دە بە پڕ کەس کۆم دبن و و هزر و نەرینێن جوودا دیار دکن، د ئەنجام دە بریارێن هەڤپار ددن، لێ ل جەم مە تشتەکی ب ڤی ئاوا تونەیە، ل جەم مە تەڤ کەس وەکە من دفکرن، ئانکو هەر تشتێ کو ئەز هزر تێ دە دکم ئەو ژی هزر د وی تشتی دە دکن، گەر مەژیکی فۆرما خوە وسا وەرگرتبە ئەز چ بکم؟