محەمەد سەلیم چوروککایا یەک ژ دامەزرینەرێن پەکەکێ یە، ئەو رۆژنامەڤان، سیاسەتمەدار و نڤێسەرە، ژبەر ولاتپارێزی و کوردپەروەریا وی دەما 11 سالان د زندانێن جودا یێن ترکیێ دە د رەوشەک هەری خراب دە ل بەر خوە دا و تەسلیم نەبوو، دەما ژ زندانێ ئازاد دبە، بەرێ خوە ددە چیا، ب عەڤدللا ئۆجالان رە دیسا تێکلدار دبە، دەما ژ زندانێ ئازاد بووی و ڤەگەریای ناڤا پەکەکێ دە ژ گەلەک تشتێن د ناڤا پەکەکێ دا بووین یاسا نەرازی بوو، لێ نەکاری نەرازبوونا خوە ب ئازادانە بەیان بکە، ژ بەر کو دیارکرنا نەرازیبوونێ ب واتەیا دژاتیکرنا ئۆجالان تێ، بێی گومان ئەڤ یەک ژی دا ببە سەدەما سووچبارکرنا وی ب ئیخانەتێ و پشترە تەسفیەکرنا وی، ژ نەچاری بریارا رەڤین ژ ناڤا پەکەکێ و ڤەقەتینا ژ ڤێ پارتیێ ددە، وی ب نڤسیاندنا پرتووکەکێ ب ناڤێ “ئایەتێن ئاپۆ” هەول دا راستیا ئۆجالان و پەکەکێ ژ گەلێ کورد و جیهانێ رە ئەشکەرە بکە.
د ڤێ پرتووکێ دە باش خویا دبە کو گەلەک تەنگاسی دیتنە هەیا کو بکارە خوە بگهینە ئەورۆپایێ، دەما ژ پەکەکێ ڤەدقەتە و ل لبنانێ بێی پەرە و پاسپۆرت دکەڤە کۆچە و کۆلانێن بەیرۆتێ، پڕ جاران د خەیالێن خوە دە هن پرسێن گرینگ ژ خوە دکە کو مرۆڤ دکارە ووسا شیرۆڤە بکە کو گەر ئەو بهاتا گرتن دا ئۆجالان ژی هەمان پرسان ژ وی بکە. ئەمێ هەول بدن د چەند نڤیسان دە باسی هن ژ ئەگەرێن ڤەقەتینا چوروککایا ژ پەکەکێ و هەلوەست و بریارێن ئۆجالان د ناڤا پەکەکێ دە کو نڤێسەر ب “ئایەتێن ئاپۆ” ددە ناسکرن بکن.
“رێبەرێ مەزن” و رێهەڤالێن چوروککایا د دەربارا ڤەقەتینا وی ژ پەکەکێ چ دگۆ؟
سەلیم چوروککایا: رێبەرێ مەزن دگۆت: سەلیم رەڤییە، لێ هندەک کەسان ژی پرسیار دکر چما رەڤی؟ ئایدۆلۆژیا فەرمی ژی دبێژە: سەلیم ژ ناڤچوو و نەشییا ل سەر خەباتا خوە بەردەوام بە، راستیان دگوهەرە و بەرەڤاژی دکە، زانین تەڤ ئەڤە، گوهەرینا راستیان، بەرەڤاژیکرن، ئەڤ جوورێ ئایدۆلۆژیا فەرمی باندۆرێ ل گەلێن پاشکەفتی و پەرچەیەکە دیارا دیرۆکێ دکە، گەلێ پاشڤەروو ژ راستییان پێتر نێزی دەرەوانە و وان باهوەر ژی دکن، لێ دیرۆک نایێ گوهەرتن، وەریسێ دەرەوێ کورتە، ئایدۆلۆژیێن فەرمی هەیا داویێ نامینن، پشتی دەمەکی کورت وێ بێهنا وێ یا گەنی بەلاڤ بە و ب خوە رە دێ رێخستنا خوە ل سەر ئاڤاکری هەرفینت، ئەز رەڤیم، ئەز ژ زندانا ئایدۆلۆژیا فەرمی رەڤیم، ل وێ گرتیگەهێ ب دەستەسەرکرنا لاشێ من بزاڤ دکرن مەژیکێ من ژی دەستەسەر بکن، ئەز ژ بەر دەستەسەرکرنا مەژیکێ خوە رەڤیام، کو دخوەست دەرەوان ل جەم من بکن راستی و بخن بەر سینگێ هەموویان.
من مرۆڤخوەر و خوارنا گوشتێ مرۆڤان ب جاڤێ خوە دیت، ئەز رەڤیم ژ بەر کو ئەز تێگهشتم ئەز د خەیالەکی دە دژیام، ئەز رەڤیم دا راستیان ئەشکەرە بکم، ئەوا گەلێ من پاش دەمەکی درێژ دبینە و دبێژە، بەرا وان ئەزێ ئیرۆ ببێژم، ئەز رەڤیم هەیا کو راستی ڤەشارتی نەمینن و دەرەو شوونا راستیان نەگرن، ئەز رەڤیم هەیا کو نەڤیێن بهێن تف نەکن روویێ من، بەلکو دا تف بکن روویێ دەفخوەشکێن ئیرۆ، ئەز رەڤیم هەیا کو نەکەڤم رەوشا جەنەرالێن ستالین، ئەز رەڤیم، ژ بەر کو من هەست ب ئازارێن ویژدانا خوە کر ل همبەر چارەنڤیسێ وان هەڤالێن من یێن هاتیە کوشتن و سووچا خیانەتێ دایە پال ژ ئالیێ ئایدۆلۆژیا فەرمی ڤە، ئەز رەڤیم هەیا کو ل همبەر کوشتنا هەڤالێن خوە یێن بێی تاوان هاتین کوشتن بێی دەنگ نەبم، ئەز رەڤیام هەیا کو دەرەو زێدەتر باندۆرێ ل سەر گەل نەکە رابووری ژناڤ نەبن و پاشگوهنەکن و ئیرۆیا مە ژی شێلی نەکن، دا ئەو دیکتاتۆریەت زێدەتر بهێز نەبە یا کو هێدی هێدی شۆرەشگێر و خەلکێ ژناڤ دبە، ئەز رەڤیم هەیا کو زێدەتر مرۆڤان نەخاپینم.
