یێك ژ كادرۆیێن رێڤه‌به‌ر و دێرین یێن په‌كه‌كێ كو ژ رێخستنێ ڤه‌قه‌تیه و نها ل ئه‌ورۆپایێ دمینه، د دانپێدانێن خوه ده هنه‌ك نهێنیێن په‌كه‌كێ و سته‌ما كو ئۆجالان ل ژنا كورد كری ئاشكه‌ره دكه و دبێژه: «ئۆجالان ل ژێر ناڤێ ئازادییا ژنێ، ژن بۆ به‌رژه‌وه‌ندییا خوه ب كارئانی و هێژان ژی ئه‌ڤ یه‌ك د په‌كه‌كێ ده ده‌وام دكه».
«ژن د ناڤا په‌كه‌كێ ده» ناڤێ پرتووكه‌كێ یه كو «نه‌ژده‌ت بۆلدان» ب زمانێ تركی نڤیساندیه و ژ هێلا هۆشه‌نگ ڤه هاتیه وه‌رگه‌راندن، ژ وه‌شانێن 2022ێ یه، سه‌رپێهاتییا 10 كادرۆیێن ژن تێ ده هاتیه دۆكیۆمه‌نت كرن، یێك ژێ یا نه‌والێ یه.
نه‌وال كه‌چه‌كا ژ وانێ یا باكورێ كوردستانێ یه، وه‌كه ب هه‌زاران كه‌چێن دن ئه‌و ژ بۆی عه‌شقا وه‌لاتێ شێرین ته‌ڤلی په‌كه‌كێ دبه، لێ رۆژا ئه‌ول راستی شووكه‌كه مه‌زن دبه وه‌ختا راستیا پارتیێ دزانه، پارتیا كو ل سه‌ر ناڤێ كوردان به‌رخوه‌دانێ ل دژی كوردستانێ ب خوه دكه.
نه‌والێ د به‌شا داویێ یا دانپێدانێن خوه ده به‌حسا «ژنێ د سیسته‌مێ په‌كه‌كێ» ده دكه، هه‌ر وها دو جورێن په‌كه‌كێ، په‌كه‌كه یا مرۆڤ گوهـ لێ دبه و په‌كه‌كه یا كو مرۆڤ تێ ده دژی.
په‌كه‌كه یا تو گوهـ لێ دبی و یا تو تێده دژی گه‌له‌ك ژ هه‌ڤ جودا نه
نه‌وال دبێژه: «به‌ری كو ئه‌ز بچمه ناڤ په‌كه‌كێ من وه‌سا هزر دكر كو ئه‌ز په‌كه‌كێ ناس دكه‌م، لێ ده‌ما ئه‌ز ته‌ڤلی بووم و د ناڤ ده بووم، من زانی كو دو په‌كه‌كه هه‌نه، یا كو تو گوهـ لێ دبی و یا كو تو تێ ده دژی. هه‌ردو په‌كه‌كه ژی گه‌له‌ك ژ هه‌ڤ جودا نه، من زوو هه‌ست ب وێ یه‌كێ كر كو په‌كه‌كه ب ڤێ سیاسه‌ت و ئیدۆلۆژییا خوه نكاره خزمه‌تێ ژ كورد و كوردستانێ ره بكه، گه‌له‌ك شاشیێن مه‌زن د په‌كه‌كێ ده ده‌ربارێ خه‌باتا نه‌ته‌وی یا كوردان و ته‌خ و چینێن جڤاكا كوردستانی هه‌نه».
وه‌زیفه‌یا ژنێ د په‌كه‌كێ ده خزمه‌تكرنا ئۆجالان
ده‌ربارێ ژنێ د سیسته‌مێ په‌كه‌كێ ده، نه‌وال دبێژه: «چ رێخستنان و چ كه‌سان ب قاسی ئۆجالان و په‌كه‌كێ سته‌م ل ژنا كورد نه‌كریه و چ ئالییان ژی ب قاسی وان ناڤێ ژنا كورد كرێت نه‌كریه، ژ به‌ر ڤێ سه‌ده‌مێ ب سه‌دان كه‌چ و ژنێن كوردان په‌كه‌كه ژ به‌ر ڤێ دوو روویاتیێ هێلان و ڤه‌قه‌تیان».
نه‌وال گۆت: «مخابن هێژان ژی د په‌كه‌كێ ده هێزا ژنێ شاش تێ ب كارئانین، لوما ژی هه‌یا رۆژا مه یا ئیرۆ خه‌باتا ژنێ چ ئه‌نجامه‌ك ب ده‌ست نه‌خستیه».
نه‌وال ده‌ربارێ ئیدۆلۆژی و خه‌باتا كو ئۆجالان و په‌كه‌كێ ل سه‌ر ژنێ فه‌رز كری دبێژه: «ئۆجالانی ژ بۆی به‌رژه‌وه‌ندیێن خوه پیلانه‌ك مه‌زن ل سه‌ر ژنا كورد گێرا، ب كورتاسی ژ بلی بوویه‌ر و ده‌ستدرێژیێن شه‌خسێ ئۆجالان ل گه‌ل هنه‌ك ژنان، وی وه‌كه رێخستن ژی ل شوونا هێزا ژنێ بۆ ئازادییا كوردستانێ ب كار بینه، ل دژی زه‌لامان ب كار ئانی و ئه‌ڤ یه‌ك ب زانه‌بوون د خولێن په‌روه‌رده‌هیێ ده دهاته ئه‌نجام دایین».
گه‌له‌ك ژن بووینه قوربانیێن ده‌ستێ ئۆجالان
نه‌وال هه‌روه‌ها دیار كر، ژن ژ به‌ر هێزێ ب ئۆجالان ڤه دهاتن گرێدان، ژ به‌ر كو د په‌كه‌كێ ده ته‌نێ ئۆجالان ب هێز بوو و ژنێ ژی پشتا خوه ب ڤێ هێزێ گه‌رم دكر، لێ سیسته‌ما ئۆجالان ئه‌و بوو كو دڤێ هه‌موو هێزا ژنێ بۆ پاراستنا ئۆجالان و په‌كه‌كێ وه‌ره بكارئانین و ئۆجالان دیسا ژن وه‌كو چه‌كه‌ك ل دژی زه‌لامان بۆ بهێزكرنا خوه ب كارئانی.
نه‌وال دبێژه: «ب كورتاسی گه‌له‌ك ژن بووینه قوربانیێن ده‌ستێ ئۆجالان و سیسته‌مێ په‌كه‌كێ، د په‌كه‌كێ ده ژن وه‌كه مه‌تریاله‌ك بۆ به‌رژه‌وه‌ندیێن تاكه‌كه‌سی و سیاسی هاتیه بكارئانین، به‌روڤاژی ڤێ ژن د په‌كه‌كێ ده راستی زۆردارییه‌ك مه‌زن هاتیه و هێژان ژی ئه‌ڤ یه‌ك به‌رده‌وامه. من ب چاڤێن خوه گه‌له‌ك تشت دیتنه و كانێ چاوا پرس د ناڤبه‌را ژن و زه‌لامان ده د به‌رژه‌وه‌ندییا زه‌لامان ده دهاتن یه‌كئالی كرن».
ئه‌ز ڤه‌قه‌تیان پشتی بۆ من ئیسپات بووی په‌كه‌كه ئێدی یا خزمه‌تا دژمنی دكه
نه‌وال دبێژه: «ئه‌ز ل سالا 2001ێ ژ په‌كه‌كێ جودابووم، پشتی من هه‌ست كری كو ئێدی ئه‌ڤ رێخستن یا خزمه‌تا دژمنێ كوردستانێ دكه و چ تشته‌كی بۆ كورد و كوردستانێ ناخوازه، هه‌ر ئه‌ڤ بوو سه‌ده‌م كو ئه‌ز ژ په‌كه‌كێ ڤه‌قه‌تم».
د به‌شێن بهێن ده ئه‌مێ هنه‌ك ژ نهێنیێن دن یێن ئۆجالان و په‌كه‌كێ ژ دانپێدانێن كادرۆیه‌كا دن یا ب ناڤێ «په‌لین» ببێژن.
