نه‌وال كه‌چه‌كا وانێ ئا باكورێ كوردستانێ یه، وه‌كه ب هه‌زاران كه‌چێن دن ژ بۆی عه‌شقا وه‌لاتێ شێرین ته‌ڤلی په‌كه‌كێ دبه، لێ رۆژا ئه‌ول راستی شووكه‌كه مه‌زن تێ وه‌ختا ده‌رسا یه‌كێ یا رێخستنێ ب سه‌رناڤێ «پێشمه‌رگه دژمنه» وه‌ردگره.
پارتیا كاركه‌ران، ب هه‌زاران كه‌چێن كوردان خاپاندنه، ره‌ڤاندنه و ب دارێ زۆرێ كێشی چیا كرن، لێبه‌لێ به‌شه‌ك ژێ ب كێفا دلێ خوه و ژ بۆی پێشی گرتنا ل سته‌ما ده‌وله‌تا ترك ته‌ڤلی بوون، نه‌والا وانێ یێك ژ وان بوو كو ب ره‌فه‌كه هه‌ڤالێن خوه ره زانینگه‌هـ هشتی و ته‌مانا 18 سالیێ ده به‌رێ خوه دایه بایه‌زیدێ و چیایێ ئاگریێ.
نه‌والێ سه‌رهاتییا 9 سالێن خوه یێن د ناڤا رێخستنێ ده ژ بۆی «نه‌ژده‌ت بۆلدان» ئاشكه‌ره كرن كو د پرتووكه‌كێ ده ب ناڤێ «ژن د ناڤا په‌كه‌كێ ده» هاتنه دوكیۆمه‌نت كرن، ته‌ڤی نه‌والێ، چیرۆكا 10 ژنێن كو ژ رێخستنێ قوت بوونه د ڤێ پرتووكێ ده هه‌نه، ئه‌مێ ب كورتاسێ ژ بۆی خوه‌نده‌ڤانێن ب روومه‌ت یێن «داركا مازی» ڤه‌گێرن.
ده‌رسا یه‌كێ: پێشمه‌رگه دژمنێ مه یه
نه‌وال خوه‌نده‌كارا زانینگه‌ها «یوزونجی یل» یا ل وانێ بوو د سالا 1992ان ده ئه‌و ب ره‌فه‌كه هه‌ڤرێیێن خوه ره ژ وانێ ده‌رباسی بایه‌زیدێ دبه و ژ ور دچه چیایێ ئاگریێ و ل ور هه‌ڤالێن په‌كه‌كێ دبینه.
نه‌وال دبێژه: ب گهیشتنا مه بۆ ناڤا هه‌ڤالان مه ئۆسمان ئۆجالان دیت، وی ژ مه ره گۆ ل ڤر پر زه‌حمه‌تی هه‌نه دڤێ هوون خوه فێر بكن و ده‌ربارا ده‌رسووكێ ژی كو ب گهیشتنا مه ل سه‌رێ مه كربوون، ئۆسمان گۆ تشته‌ك سروشتی یه!
نه‌وال ئاخافتنا خوه ووسا ددۆمینه: ئه‌ول جار ده‌رسۆك ل سه‌رێ مه كرن، ئه‌م ل كامپا شه‌هید بێریڤان مان، ئه‌م 3 گرووپێن ژنان بوون، هه‌ڤاله‌كا ژن ل ور هه‌بوو ژێ ره د گۆتن «دیلانا جه‌ندرمه»، دیلان ل ئه‌ورۆپایێ بوو، نێزی ئۆجالان بوو وه‌ختا هاتیه ده‌سته‌سه‌ر كرن، پاش گرتنا ئۆجالان ئه‌و ژ په‌كه‌كێ قوت دبه. ئه‌م ته‌ڤلی خولا په‌روه‌ردێ كرن، 80% ئا كه‌چێن ل ور خوه‌نده‌كارێن زانینگه‌هێ بوون و د خولا په‌روه‌رده‌هیێ ده په‌كه‌كێ تشتێن ساده و كلاسیك د گۆتن، دیرۆكا كوردستانێ، جوگرافیا كوردستانێ و دامه‌زراندنا په‌كه‌كێ، رێخستنێ ئه‌م به‌رهه‌ڤ دكرن.
نه‌وال دبێژه: ل ور ئه‌ز بێ هێڤی مام ژ به‌ر كو تشتا وان د خولا په‌روه‌ردێ ده ژ مه‌ر دگۆتی من بێهتر ژێ د زانی من ل زانینگه‌هێ خوه‌ندبوو، لێ پشتره بۆ من زه‌لال بوو كو په‌كه‌كێ د خوه‌ست فكر و ئایدۆلۆژییا خوه ل ژێر ناڤێ په‌روه‌ردێ ب مه بده قه‌بوول كرن، ته‌ڤی ڤێ، رێخستنێ ئه‌م ژ بۆی شه‌رێ ل دژی پێشمه‌رگه‌هان ئاماده دكرن، سال 92 بوو كو شه‌رێ باشوور ده‌ستپێكربوو، په‌كه‌كێ ژ شه‌رێ ل دژی پێشمه‌رگه‌هان دگۆ «شه‌رێ باشوور».
په‌ده‌كه ته‌مسیلا بریتانیا دكه
په‌كه‌كێ د شه‌رێ ل دژی په‌ده‌كێ و یه‌نه‌كێ یێ 1992یان ده كه‌سێن بهێز دبرنه ئه‌نیێن پێشیێ یێن شه‌ر، ئه‌ز د تیما چه‌كا دۆشكێ ده بووم په‌كه‌كێ ده‌وام ژ مه ره د گۆ «پێشمه‌رگه دژمنێ مه» یه، په‌كه‌كێ ژ په‌ده‌كێ و یه‌نه‌كێ ره نه دگۆ ئه‌ڤ هێزێن كوردی نه، د گۆ ئه‌م شه‌رێ ئیمپریالیزمێ دكن و ئه‌ڤ هێز نوونه‌رتییا ئیمپریالیزمێ دكن، نها ژی عه‌ینی تشت دبێژه.
نه‌وال دبێژه: په‌كه‌كێ هه‌رده‌م دگۆ په‌ده‌كه و یه‌نه‌كه نوونه‌راتییا كوردان ناكن، ئه‌و نوونه‌رتییا سیسته‌ما ئیمپریالیزما جیهانێ و هنه‌ك ده‌وله‌تان دكن، په‌كه‌كێ دگۆ په‌ده‌كه ته‌مسیلا بریتانیا دكه و بریتانیا ژی دژمنا سه‌ره‌كه یا گه‌لێ كورده، پرانییا خولێن په‌روه‌ردێ یێن د سالا 1992 یان ده ده‌رس ووسا بۆ كادرۆیان دهاتن گۆتن، ب كورتاسی په‌كه‌كێ ژ گه‌ریلا و كادرۆیان ره دگۆ: په‌ده‌كه و یه‌نه‌كه دژمنێن سه‌ره‌كه یێن گه‌لێ كوردن و ووسا مه‌ژیكێ وان ته‌ژی دكر.
ده‌ربارا شه‌ر ژی نه‌وال دبێژه: په‌كه‌كێ نكاری د شه‌رێ ل دژی پێشمه‌رگه‌هان ده سه‌ركه‌تنێ ده‌ست بخه، ژ به‌ر ڤێ ژی ده‌وام په‌ده‌كه و یه‌نه‌كه وه‌كه دژمن ناس كرنه و نه‌هشتیه تو جاری كادرۆیێن رێخستنێ راستییا په‌ده‌كێ و یه‌نه‌كێ بزانن.
د به‌شه‌كه دن ده، ئه‌مێ به‌حسا دیرۆكا كوردستانێ بكن، كانێ په‌كه‌كێ ب تو ئاوایی بۆ كادرۆیێن خوه ده‌رسێن دیرۆكێ د خولێن په‌روه‌رده‌هیێ ده دبێژه.
