پارتیا كاركه‌ران ژ ده‌ستپێكا ئاڤابوونا خوه ل ژێر ده‌ره‌وێن وه‌كه ئازادییا ژنێ، روومه‌تا ژنێ، خه‌ت و سه‌رده‌ست كرنا ژنێ و گه‌له‌ك ده‌ره‌وێن دن یێن هه‌مئاوا كه‌چ و ژنێن كورد خاپاندنه، ڤێ رێخستنێ ژنا كورد بۆ خوه كرییه مه‌تریاله‌ك و ته‌نێ ژ بۆی به‌رژه‌وه‌ندیێن خوه وان ب كار تینه و برۆباگاندایێ ب وان دكه.
«ژن د ناڤا په‌كه‌كێ ده» ناڤ و نیشانا پرتووكه‌كێ یه كو نه‌ژده‌ت بۆلدان ب زمانێ تركی نڤیساندیه و ژ هێلا هۆشه‌نگ ڤه هاتیه وه‌رگه‌راندن، «ژن د ناڤا په‌كه‌كێ ده» ژ وه‌شانێن 2022ێ یه.
د ڤێ پرتووكێ ده، سه‌رهاتییا راست یا 10 ژنێن كو ژ په‌كه‌كێ قوت بوونه هاتیه ئاشكه‌ره كرن، ئه‌مێ د زنجیره‌یه‌كه نڤیسان ده ب كورتاسی ژ بۆی خوه‌نده‌ڤانێن ب روومه‌ت یێن «داركا مازی» ڤه‌گێرن.
ئه‌م چیرۆكا نه‌وال به‌رده‌وام دكن
نه‌وال كه‌چه‌كا ژ وانێ یا باكورێ كوردستانێ یه، وه‌كه ب هه‌زاران كه‌چێن دن ژ بۆی عه‌شقا وه‌لاتێ شرین ته‌ڤلی په‌كه‌كێ دبه، لێ رۆژا ئه‌ول راستی شووكه‌كه مه‌زن تێ وه‌ختا راستیا ڤێ پارتیێ دزانه، پارتیا كو ل سه‌ر ناڤێ كوردستانێ به‌رخوه‌دانێ ل دژی كوردستانێ ب خوه دكه.
د به‌شا دویه‌مین ده نه‌والێ به‌حسا ده‌ورێن په‌روه‌رده‌هیێ كر و كانێ ب چ ئاوایی رێڤه‌به‌رییا په‌كه‌كێ هه‌رتشت ل گۆری به‌رژه‌وه‌ندییا خوه ب وان ددا قه‌بوول كرن، نه‌وال دبێژه ته‌ڤی كو د ده‌ورێ ده ژ مه ره د گۆتن كو پێشمه‌رگه دژمنه و په‌ده‌كه ته‌مسیلا ئیمپریالیزمێ دكه، دیرۆكا كوردستانێ ژی تام به‌روڤاژی ژ وان ره دهات گۆتن.
په‌كه‌كه چاوا دیرۆكا كوردستانێ ژ بۆ كادرۆیێن خوه دبێژه
نه‌وال ده‌ربارێ ده‌وره‌یا یه‌كه‌مین یا په‌روه‌رده‌هیێ دبێژه: «به‌ری ته‌ڤلیبوونێ من سه‌باره‌ت دیرۆكا كوردستانێ گه‌له‌ك تشت دزانی، د وان سالێن ئه‌ز د ناڤا په‌كه‌كێ ده بووم، براستی ژی ده‌ربارێ دیرۆكا كوردستانێ نه وانه‌یه‌ك من خوه‌ند و نه‌ژی كه‌سێ تشته‌ك نڤیساند، ژ به‌ر كو چ په‌رتووك ده‌ربارێ دیرۆكا كوردستانێ د ناڤا رێخستنێ ده تونه بوو».
نه‌والێ د ده‌واما ئاخافتنا خوه ده گۆت: «ئه‌ز نه‌شێم چ تشته‌كی ده‌ربارێ دیرۆكا كوردستانێ ببێژم، د ده‌ورێن په‌روه‌رده‌هیێ ده هنده‌ك وانه‌یێن بێ واته ژ مه ره دهاتن گۆتن، وه‌ختا رێڤه‌به‌رێن پارتیێ د ده‌ورێ ده وانه د گۆتن خه‌وا مه دهات، ژ به‌ر كو ب راستی ژی تشته‌كی ووسا گرینگ نه‌دهات گۆتن و ته‌نێ تشتا كو رێخستنێ د خوه‌ست ئه‌م بزانن ژ مه ره دهات گۆتن».
دیرۆكا كوردستانێ وه‌كه ب هه‌ر تشتێ گرێدای كوردستانێ ژ هێلا پارتیا كاركه‌ران تێ به‌رۆڤاژی كرن، ل جه‌م په‌كه‌كێ دیرۆكا كوردستانێ ژ ده‌ما ئاڤابوونا پارتیا وێ ده‌ست پێ دكه و ئه‌و هه‌ر شۆرش و به‌رخوه‌دانه‌كا دن یێن سه‌د سالا به‌رێ و هێژان قه‌دیم تر ره‌د دكه، پارتیا كاركه‌ران ته‌ڤاهی رێبه‌رێن كوردان ب درێژاهییا دیرۆكێ ب ئاژانێن ئینگلیزان ناس كرنه و هه‌یا رۆژا مه یا ئیرۆ دیرۆكه‌كه ده‌ره‌و و ل گۆری خوه د ده‌ورێن په‌روه‌رده‌هییا گه‌ریلایان ده دده وان.
د به‌شه‌كه دن ده، ئه‌مێ به‌حسا 21 رۆژێن شه‌رێ په‌كه‌كێ و په‌ده‌كێ بكن، نه‌وال دێ ئاگاهیێن مه‌یدانا شه‌ر و وه‌كه وێ ب چاڤێ خوه دیتی به‌حس بكه.
