د ناڤا پارتیا كاركه‌ران ده، ژنێن كورد زرارا هه‌ری مه‌زن دیتنه، رێخستن وان ل بن ناڤێ به‌رخوه‌دانێ و كوردستانا شێرین دخاپینه برێخستن دكه و پشتره وه‌كه ئامووره‌كی ب كار تینه، ئه‌ڤ یێك ژی سیاسه‌ته‌كه سه‌ره‌كه یا پارتیێ یه.
«ژن د ناڤا په‌كه‌كێ ده» ناڤ و نیشانا پرتووكه‌كێ یه كو نه‌ژده‌ت بۆلدان ب زمانێ تركی نڤیساندیه و ژ هێلا هۆشه‌نگ ڤه هاتیه وه‌رگه‌راندن، «ژن د ناڤا په‌كه‌كێ ده» ژ وه‌شانێن 2022ێ یه.
وه‌كه د به‌شێن ئه‌ول ده ئاماژه هاتیه كرن، د ڤێ پرتووكێ ده سه‌رهاتییا راست یا 10 ژنێن كو ژ په‌كه‌كێ قوت بوونه هاتیه ئاشكه‌ره كرن، «داركا مازی» دێ ب زنجیره‌یه‌كه نڤیسان ب كورتاسی ژ بۆی خوه‌نده‌ڤانێن خوه یێن ب روومه‌ت ڤه‌گێره.
شه‌رێ 21 رۆژان یێ ل دژی په‌ده‌كێ و یه‌نه‌كێ
نه‌وال كه‌چه‌كا ژ وانێ یا باكورێ كوردستانێ یه، وه‌كه ب هه‌زاران كه‌چێن دن ژ بۆی عه‌شقا وه‌لاتێ شێرین ته‌ڤلی په‌كه‌كێ دبه، لێ رۆژا ئه‌ول راستی شووكه‌كه مه‌زن تێ وه‌ختا راستیا ڤێ پارتیێ دزانه، پارتیا كو ل سه‌ر ناڤێ كوردستانێ به‌رخوه‌دانێ ل دژی كوردستانێ ب خوه دكه.
د به‌شا سێیه‌مین ده نه‌والێ به‌حسا دیرۆكا كوردستانێ كر كانێ چاوا په‌كه‌كێ هه‌ر تشتی د گوهه‌رینه و ب گوهێ كادرۆیێن خوه ده دبێژه، ئیرۆ نه‌وال وێ چیرۆكا 21 رۆژێن وی شه‌ری ببێژه یێ كو پارتیا كاركه‌ران ل سالێن 90ان ل دژی حكوومه‌تا باشوورێ كوردستانێ ئه‌نجام دای.
موراد قارایلان نه‌دخوه‌ست شه‌ر ب داوی ببه
نه‌وال دبێژه: «شه‌رێ په‌كه‌كێ یێ ل دژی په‌ده‌كێ و یه‌نه‌كێ 21 رۆژان ده‌وام كر، پشتره په‌یمانه‌ك چێبوو و فه‌رمان هات كو ئه‌م سه‌نگه‌رێن شه‌ر چۆل بكن، گه‌له‌ك ژ فه‌رماندارێن مه ل وێ ده‌مێ ل دژی راگرتنا شه‌ر بوون و د گۆتن مه گه‌له‌ك قوربانی دا نه، ل وێ ده‌مێ ب رییا بێته‌لێ فه‌رماندارا مه ره‌وش بۆ ئۆسمان ئۆجالان زه‌لال كر و ئۆسمان ل وێ ده‌مێ گۆت كو هه‌رسێ بریارگه‌هێن په‌كه‌كێ ل باشوورێ كوردستانێ قه‌بوول كرنه كو شه‌ر وه‌ره راگرتن و نها ته‌نێ هه‌ڤال جه‌مال ئاسته‌نگییان ژ بۆی مه چێدكه».
هه‌ر وها دیار كر كو ل داویێ هه‌موو فه‌رماندارێن وان نه‌چار مان راستییا هه‌یی قه‌بوول بكن، وێ ده‌مێ ب ئاوایه‌كی له‌زگین ده‌ست ب رێخستنا كادرۆیێن په‌كه‌كێ هات كرن و به‌شه‌كی هێزێن وان ده‌رباسی كامپا «زه‌لێ» بوون.
نه‌وال گۆت: «به‌شه‌كی دن ده‌رباسی هه‌رێما خواكوركێ بوون و ب رازیبوونا یه‌نه‌كێ، پرانییا هێزێن مه ب ئۆتۆمۆبیلان بۆ كامپا زه‌لێ هاتن ڤه‌گوهه‌ستن، ل بیرا من تێ ل وێ ده‌مێ ئه‌م ل هن هه‌رێمان راوه‌ستیان و گه‌لێ ده‌ڤه‌رێ ب ئاوایه‌كی سه‌یر ل مه د نه‌ری، راسته شه‌رێ كورد و كوردان بوو، لێ به‌لێ ئه‌م راستی شكه‌ستنه‌كه مه‌زن هاتن، ڤێ یه‌كێ ژی باندۆره‌كه مه‌زن ل مه كربوو، جاره‌كێ ئه‌م ل گونده‌كی راوه‌ستیان و د مزگه‌فتا گوند ده ماین، ژ شێنیێن گوند هات خوه‌ستن كو ئالیكارییا مه بێ كرن، پرسگرێكێن مه یێن مه‌زن هه‌بوون، ئا هه‌ری مه‌زن ژی نان بوو، ئه‌م د برچی بوون و نان ژی نه‌بوو كو ئه‌م بخون، ل داویێ ئه‌م گهیشتن كامپا زه‌لێ، ره‌وش پر خه‌راب بوو، ل وێ ده‌مێ ئۆجالان د گۆت: تشتا كو قه‌ومی شاشێتی بوو، هه‌گه‌ر ژه‌هر ژی به ئێدی چوو و دڤێ ئه‌م ژ بۆی پاشه‌رۆژێ خوه ئاماده بكن».
ناكۆكیێن نێڤبه‌ر 3 بریارگه‌هێن په‌كه‌كێ
نه‌وال دبێژه: «ل كامپا زه‌لێ ب وی زكێ برچی و وێ ره‌وشا خه‌راب پارتیێ خوله‌كا په‌روه‌ردێ ڤه‌كر، ژ روویێ له‌شكه‌ری ڤه ره‌وش پر خه‌راب بوو، ناكۆكی ل نێڤبه‌را هه‌رسێ بریارگه‌هێن په‌كه‌كێ یێن ل باشوورێ كوردستانێ ده‌ركه‌تبوون، هه‌ر وه‌ها ل ور ناكۆكیێن نێڤبه‌را كادرۆیێن باكور و رۆژئاڤا یێن پارتیێ ده‌ركه‌تن».
د به‌شا بهێت ده ئه‌مێ به‌حسا یێكه‌م كۆنفه‌رانسا ژنێ د ناڤ په‌كه‌كێ ده بكن و چما ئۆجالان ئه‌و كۆنفه‌رانس ره‌د كربوو.
