نه‌جارا یه‌كه‌مه ده‌ربارێ مژارا «ژنێ د ناڤا په‌كه‌كێ» ده نڤیس و پرتووك تێن وه‌شاندن، پڕ تشتێن باش و خه‌راب ب درێژاهییا خه‌باتا مژه‌وی یا ڤێ رێخستنێ ل سه‌ر ژنێ هاتنه گۆتن، لێ تو یه‌ك ژ وان راستیا ره‌وشا ژنێ د ناڤا پارتیا كاركه‌ران ده ب وێ قه‌ده‌رێ ئیفشا نه‌كری يه.
«داركا مازی» ژ ده‌ستپێكا وه‌شانا خوه پر مژار ده‌ربارێ «كه‌چ و ژن د ناڤا په‌كه‌كێ ده» پارڤه‌كرنه، بكارئانینا ژنێ بۆ به‌رژوه‌ندیێن رێخستنێ، ته‌جاوزا رێبه‌ر و كادرۆیان ل سه‌ر ژنێ، دوجانبوونا ژنێ ل چیا، هه‌ر وها كوشتن و تاسفیه كرنا وان و پڕ مژارێن دن كو هوون دكارن ب به‌لگه د به‌شا «نهێنی» یا پێگه‌ها مه دا بخوینن.
«ژن د ناڤا په‌كه‌كێ ده» ناڤ و نیشانا پرتووكه‌كێ یه كو نه‌ژده‌ت بۆلدان ب زمانێ تركی نڤیساندیه و ژ هێلا هۆشه‌نگ ڤه هاتیه وه‌رگه‌راندن، «ژن د ناڤا په‌كه‌كێ ده» ژ وه‌شانێن 2022ێ یه.
د ڤێ پرتووكێ ده، سه‌رهاتییا راست یا 10 ژنێن كو ژ په‌كه‌كێ قوت بوونه هاتیه ئاشكه‌ره كرن، ئه‌مێ د زنجیره‌یه‌كه نڤیسان ده ب كورتاسی ژ بۆی خوه‌نده‌ڤانێن ب روومه‌ت یێن «داركا مازی» ڤه‌گێرن.
په‌كه‌كه ژنێ بۆ به‌رژه‌وه‌ندیێن خوه ب كارتینه
یه‌ك ژ ژنێن په‌كه‌كێ ب كۆدناڤێ نه‌وال، ئه‌و ژی وه‌كه ب هه‌زاران كه‌چ و ژنێن كوردان ل په‌ی عه‌شقا كوردستانێ دچه و د ته‌مه‌نا 18 سالیا خوه ده ته‌ڤلی ره‌فێن په‌كه‌كێ دبه.
نه‌وال خوه‌نده‌كارا زانینگه‌ها «یوزونجی یل» یا ل وانێ بوو ل سالا 1992ان ئه‌و ب گرووپه‌كه هه‌ڤرێیێن خوه ره ژ وانێ ده‌رباسی بایه‌زیدێ دبه و ژ ور دچه چیایێ ئاگریێ، نه‌وال دبێژه: ل چیا مه هه‌ڤالێن په‌كه‌كێ دیتن.
رۆژا ئه‌ول ئه‌م راستی شۆكه‌كه مه‌زن هاتن
نه‌وال دبێژه ئه‌م ده‌مه‌كی ل چیا مان و ژ ور ده‌رباسی رۆژهلاتا كوردستانێ بوون، بێ شك ده‌رباسبوونا سینۆان نه كاره‌كی هێسان بوو، زه‌حمه‌تیا خوه هه‌بوو، لێبه‌لێ رۆژا ئه‌ول كو ئه‌م گهیشتن ئه‌م راستی شۆكه‌كه مه‌زن هاتن وه‌ختا هه‌ڤرێیێن مه پێشه‌وازییا مه كری.
نه‌وال ووسا ئاخافتنا خوه ده‌وام كر: ب گهیشتنا مه، من تشتێ هه‌ری سه‌یر و عه‌جێب دیت، دبه كو عه‌جێبترین تشته به د ناڤا په‌كه‌كێ ده من دیت به، ئه‌و ژی من دی كو ژنێن وێ ده‌مێ د ناڤا په‌كه‌كێ ده ده‌رسووك ل سه‌رێ وان بوو.
نه‌وال دبێژه: به‌رپرسه‌كا ژن ل وێ ده‌مێ هن جلك دانه مه و ژ مه‌ره گۆ كو دڤێ ئه‌م ده‌رسۆكێ ل خوه بكن، من هه‌ول دان كو ئه‌ز فێم بكم چما ئه‌و ڤێ دكن، من ژ خوه پرسی قه‌ی من ژ بۆی كوردستانێ به‌رێ خوه دا چیا، یان ژی ده‌رسۆكێ!.
نه‌وال دبێژه: كه‌چێن كو ژ بایه‌زیدێ هاتنه ل ده‌ستپێكی قه‌بوول نه‌كرن كو ده‌رسووكێ خوه بكن، لێ ژ به‌ر كو ئه‌م خوه‌نده‌كارێن زانینگه‌هێ بوون ئارێشه‌یه‌ك مه تونه بوو كو ده‌رسۆكێ ل خوه بكن، ئه‌ز دبێژم جارا ئه‌ول من ل ور ده‌رسۆك ل سه‌رێ خوه كر.
نه‌وال چیرۆكا یه‌كه‌م رۆژا خوه یا د ناڤا په‌كه‌كێ ده ووسا ڤه‌گێرا، دبێژه رۆژا ئه‌ول مه نه‌رماتی نیشا دا و ووسا هه‌ر ل ده‌ستپێكێ شۆرشێ پر بهایێن خوه وه‌ندا كرن و ژ به‌ر ڤێ سه‌ده‌مێ گه‌له‌ك كه‌س ژ شۆرشێ دووركه‌تن ژ به‌ر كو ئارێشه‌یا مه جودا بوو ژ وی تشتێ كو رۆژا ئه‌ول مه ل ناڤ په‌كه‌كێ ده دیتی.
