محەمەد سەلیم چوروککایا یەک ژ دامەزرینەرێن پەکەکێ یە، ئەو رۆژنامەڤان، سیاسەتمەدار و نڤێسەرە، ژبەر ولاتپارێزی و کوردپەروەریا وی دەما 11 سالان د زندانێن جودا یێن ترکیێ دە د رەوشەک هەری خراب دە ل بەر خوە دا و تەسلیم نەبوو، دەما ژ زندانێ ئازاد دبە، بەرێ خوە ددە چیا، ب عەڤدللا ئۆجالان رە دیسا تێکلدار دبە، دەما ژ زندانێ ئازاد بووی و ڤەگەریای ناڤا پەکەکێ دە ژ گەلەک تشتێن د ناڤا پەکەکێ دا بووین یاسا نەرازی بوو، لێ نەکاری نەرازبوونا خوە ب ئازادانە بەیان بکە، ژ بەر کو دیارکرنا نەرازیبوونێ ب واتەیا دژاتیکرنا ئۆجالان تێ، بێی گومان ئەڤ یەک ژی دا ببە سەدەما سووچبارکرنا وی ب ئیخانەتێ و پشترە تەسفیەکرنا وی، ژ نەچاری بریارا رەڤین ژ ناڤا پەکەکێ و ڤەقەتینا ژ ڤێ پارتیێ ددە، وی ب نڤسیاندنا پرتووکەکێ ب ناڤێ “ئایەتێن ئاپۆ” هەول دا راستیا ئۆجالان و پەکەکێ ژ گەلێ کورد و جیهانێ رە ئەشکەرە بکە.
د ڤێ پرتووکێ دە باش خویا دبە کو گەلەک تەنگاسی دیتنە هەیا کو بکارە خوە بگهینە ئەورۆپایێ، دەما ژ پەکەکێ ڤەدقەتە و ل لبنانێ بێی پەرە و پاسپۆرت دکەڤە کۆچە و کۆلانێن بەیرۆتێ، پڕ جاران د خەیالێن خوە دە هن پرسێن گرینگ ژ خوە دکە کو مرۆڤ دکارە ووسا شیرۆڤە بکە کو گەر ئەو بهاتا گرتن دا ئۆجالان ژی هەمان پرسان ژ وی بکە. ئەمێ هەول بدن د چەند نڤیسان دە باسی هن ژ ئەگەرێن ڤەقەتینا چوروککایا ژ پەکەکێ و هەلوەست و بریارێن ئۆجالان د ناڤا پەکەکێ دە کو نڤێسەر ب “ئایەتێن ئاپۆ” ددە ناسکرن بکن.
چما محەمەد سەلیم چوروککایا دەما ژ پەکەکێ ڤەقەتیای نەچوو ترکیێ یان باشوورێ کوردستانێ؟
محەمەد سەلیم چوروککایا: ژ بەر کو پشتی هزرکرنەک درێژ من بریارا رەڤینێ دابوو، ئەز نکارم هەرم ترکیێ، نکارم هەرم ولاتەکی کو 19 سالان من ل دژی رەژێم و دەستهلاتا وێ شەر کری و ل ور هاتیمە ئەشکەنجەکرن و لەعنەتکرن لێ ب ت ئاوا من خوە رادەستی وێ نەکر، پر زەحمەتە ئەز بکارم ب تەنا سەرێ خوە هەرم کوردستانێ، گەر ئەز چووم ژی دێ چەوا بکارم ژیان بکم، ئەز ت کەسی ل ور ناس ناکم و ب رێبەرێ مەزن رە ئەز کەتیمە د ناڤا دژایەتیەک کوور، نە ب دەولەتێ رە و نەژی ب گەریلایان رە ئەزێ نەکارم ژیان بکم.
هەردویان یەک ئایدۆلۆژیا فەرمی هەیە، دەولەت بێی قەید و مەرج بزاڤان دکە من بکە سیخور د دەمەکی دە کو من 19 سالان خەبات کریە هەیا کو ئایدۆلۆژیا فەرمی جێبەجێ نەکم، د ناڤا گەریلایێن پەکەکێ دە ژی هەر هەمان ئایدۆلۆژیا فەرمی ژ من رە پێسنیاز کر، ئەز ل دژی ئایدۆلۆژیایێن فەرمی مە، من یەک هلبژارتن هەبوو ئەو ژی ئەڤ بوو کو دەرباسی ئەورۆپایێ ببم، ژ بۆی ڤێ یەکێ ژی من 3 تشت لازم بوون، پاسپۆرت، ڤیزە و پەرە، لێ چ ژ وان د دەستێ من دە تونەبوون.
