محەمەد سەلیم چوروککایا یەک ژ دامەزرینەرێن پەکەکێ یە، ئەو رۆژنامەڤان، سیاسەتمەدار و نڤێسەرە، ژبەر ولاتپارێزی و کوردپەروەریا وی دەما 11 سالان د زندانێن جودا یێن ترکیێ دە د رەوشەک هەری خراب دە ل بەر خوە دا و تەسلیم نەبوو، دەما ژ زندانێ ئازاد دبە، بەرێ خوە ددە چیا، ب عەڤدللا ئۆجالان رە دیسا تێکلدار دبە، دەما ژ زندانێ ئازاد بووی و ڤەگەریای ناڤا پەکەکێ دە ژ گەلەک تشتێن د ناڤا پەکەکێ دا بووین یاسا نەرازی بوو، لێ نەکاری نەرازبوونا خوە ب ئازادانە بەیان بکە، ژ بەر کو دیارکرنا نەرازیبوونێ ب واتەیا دژاتیکرنا ئۆجالان تێ، بێی گومان ئەڤ یەک ژی دا ببە سەدەما سووچبارکرنا وی ب ئیخانەتێ و پشترە تەسفیەکرنا وی، ژ نەچاری بریارا رەڤین ژ ناڤا پەکەکێ و ڤەقەتینا ژ ڤێ پارتیێ ددە، وی ب نڤسیاندنا پرتووکەکێ ب ناڤێ “ئایەتێن ئاپۆ” هەول دا راستیا ئۆجالان و پەکەکێ ژ گەلێ کورد و جیهانێ رە ئەشکەرە بکە.
د ڤێ پرتووکێ دە باش خویا دبە کو گەلەک تەنگاسی دیتنە هەیا کو بکارە خوە بگهینە ئەورۆپایێ، دەما ژ پەکەکێ ڤەدقەتە و ل لبنانێ بێی پەرە و پاسپۆرت دکەڤە کۆچە و کۆلانێن بەیرۆتێ، پڕ جاران د خەیالێن خوە دە هن پرسێن گرینگ ژ خوە دکە کو مرۆڤ دکارە ووسا شیرۆڤە بکە کو گەر ئەو بهاتا گرتن دا ئۆجالان ژی هەمان پرسان ژ وی بکە. ئەمێ هەول بدن د چەند نڤیسان دە باسی هن ژ ئەگەرێن ڤەقەتینا چوروککایا ژ پەکەکێ و هەلوەست و بریارێن ئۆجالان د ناڤا پەکەکێ دە کو نڤێسەر ب “ئایەتێن ئاپۆ” ددە ناسکرن بکن.
د نەرینا محەمەد سەلیم چوروککایا دە ئۆجالان چەوا دەربارێ دادگەهێن پەکەکێ دفکرە؟
ل جەم مە چ کەسەک نکارە ل همبەر دادگەهێ بەرەڤانیێ ژ خوە بکە، مافێ بەرگریکرنێ ژ خوە ب تەنێ د دادگەهێن بورجوازان دە هەیە، دادگەهێن مە دادگەهێن گەلن، ئەڤ ئەو دادگەهێن سەربخوەنە یێن نوونەراتیا رێبەرتیا من دکن، ئانکو د دادگەهێن گەل دە کو نوونەراتیا رێبەرێ پارتیێ دکن، گەلۆ رێ تێ دایین کەسەک بەرگریێ ژ خوە بکە؟ نا، ئەز ووسا سڤک و بێ بها نەبوومە، بیرەوەریێن شەهیدێن عەزیز تێک نادم، بێ گۆمان ب باوەری مافێ ئاخافتنێ ددین کەسێن تاوانبار، ئانکو ئەو کەسێ بێ بها، لێ هەر کادرۆیەکی هەیا ئیرۆ هاتیە دادگەهکرن، بێی جوداهی ئەڤ گۆتنە کرنە: “من چ تشتەک دن تونەیە ببێژم، بەریا هەر کەسی ژ بۆ رێبەرێ پارتیێ و بەرخوەدانڤانێن چیا و زیندانیا سۆز ددم ئەز چاک ببم”، گەلۆ قەی من ژ وان کادرۆیان رە گۆتیە ووسا ببێژن؟ نا، لێ ئەز ل دۆسەیا ب هەزاران دادگەهکریان دنێرم هەموو وە دبێژن و هەموو ژی پەسنا من دکن، ئانکو ئەڤ شێوازەکی رێبەراتیێ یە، ب راستی ئەز هەرتم دبێژم: دەست ژ پەسندایینا من بەردن، تشتەکی بئافرینن کو گەل پەسنا وە بدە، لێ نکارن، ژ دەست وان نایێ، پڕ بێ مەژی نە.
ئارمانجا دادگەهێن مە ئەڤە کو کەسان بیننە سەر رێیا راستا من، ئارمانجا کوشتنێ ژی هەر ئەڤە، پەی رە ئارمانجا زیندانکرنێ ژی هەر ئەڤە، هەر وەها ئارمانجا ئیشکەنجەدانێ و هەر تشتی ئەڤە، ب ڤی ئاوا تێن سەر رێیێ، یا کو ئەز دبێژم بێی قەید و شەرت پشتراست دکن، وەکە هزرێن من هزر دکن، پەیڤێن کو ئەز بکارتینم دوبارە دکن، ئەو ب خوە دەست ژ هزرکرن و دیتنا بیرۆکەیان بەرددن، ئەو هزرێن ئەز حازر ددم دەست وان پشتەڤانیێ لێ دکن، تەڤ ژی وەک یەکن، سەرێ وان لێ بدە و جانێ وان ژێ بستینە، پر هەژارن، ل همبەر لەشکرێ ترکیێ مینا بەرخێن قوربنیانە، ژ بەر ڤێ یەکێ مینا پەزی نە و نکارن بفکرن، هەرتم دبێژم: هوون بەرخێن قوربانیانە، ئەو دبێژن: بەلێ سەرۆک.
ئەو پڕ لاوازن، ژ بەر کو من هێزا وان ژێ ستەندیە، نکارن بپەیڤن، ژ بەر کو هەرتم ئەز دپەیڤم، ئەو پڕ بچووک و بێ کەساتی و سڤکن، ژ بەر کو ئەز گەلەکی ژ هەژی و ئاست بلندم، نکارن هزر د چ تشتەکی دە بکن، ژ بەر کو ب تەنێ ئەز دفکرم، چ داهینانەکێ ناکن، ژ بەر کو ب تەنێ ئەز داهینەرم، چ کەسەکی ژ وان نکارە تەئۆریەکی دارێژە، ئەز دادرێژم، نکارن دو پەیڤان بینن با هەڤ، فەرماندارێن وان یێن هەری ژێهاتی ژی ل همبەری من دبێژن رێبەراتی راست دبێژە: راستە، بەلێ سەرۆک، وەیە سەرۆک، تەمام سەرۆک، ژ ڤێ زێدەتر چ پەیڤەک دن نابێژن، نها ما قەی ئەز دبێژم نەپەیڤن؟ نا، ئەز نە ئەو کەسم خەلکێ بێ دەنگ بکم، ئەز رێ ددم ئەو بپەیڤن، کی رێ ددە ب ملیۆنان کەس بپەیڤن؟ دەما ئەز وە دبێژم کەرێن کورێن کەرێ یەکسەر باوەریێ ب دەمۆکراتیکبوونا من تینن، ژ خوە د راستیێ دە کار ب وی ئاوا نینە، یێن کو من راکێشاینە سەر رێبازا رێبەراتیێ ئایەتێن من دوبارە دکن، ژ وێ یەکێ زێدەتر نکارن چ بیرۆکەیان دارێژن، چ پەیڤان ببێژن، من زەلامێن خوە خستینە ڤێ رەوشێ، بێی گۆمان ژ من قەبوول کریە کو هزر و بیرێن من هزر و بیرێن پارتیێ نە، ئایەتێن من ژی نەرینا حزبێ یە، کۆلە نکارن پارتیێ بدەن ئالیەکێ و نەرینا خوە ببێژن، بیرۆکەیێن پارتیێ بیرۆکەیێن منن.
