محەمەد سەلیم چوروککایا یەک ژ دامەزرینەرێن پەکەکێ یە، ئەو رۆژنامەڤان، سیاسەتمەدار و نڤێسەرە، ژبەر ولاتپارێزی و کوردپەروەریا وی دەما 11 سالان د زندانێن جودا یێن ترکیێ دە د رەوشەک هەری خراب دە ل بەر خوە دا و تەسلیم نەبوو، دەما ژ زندانێ ئازاد دبە، بەرێ خوە ددە چیا، ب عەڤدللا ئۆجالان رە دیسا تێکلدار دبە، دەما ژ زندانێ ئازاد بووی و ڤەگەریای ناڤا پەکەکێ دە ژ گەلەک تشتێن د ناڤا پەکەکێ دا بووین یاسا نەرازی بوو، لێ نەکاری نەرازبوونا خوە ب ئازادانە بەیان بکە، ژ بەر کو دیارکرنا نەرازیبوونێ ب واتەیا دژاتیکرنا ئۆجالان تێ، بێی گومان ئەڤ یەک ژی دا ببە سەدەما سووچبارکرنا وی ب ئیخانەتێ و پشترە تەسفیەکرنا وی، ژ نەچاری بریارا رەڤین ژ ناڤا پەکەکێ و ڤەقەتینا ژ ڤێ پارتیێ ددە، وی ب نڤسیاندنا پرتووکەکێ ب ناڤێ “ئایەتێن ئاپۆ” هەول دا راستیا ئۆجالان و پەکەکێ ژ گەلێ کورد و جیهانێ رە ئەشکەرە بکە.
د ڤێ پرتووکێ دە باش خویا دبە کو گەلەک تەنگاسی دیتنە هەیا کو بکارە خوە بگهینە ئەورۆپایێ، دەما ژ پەکەکێ ڤەدقەتە و ل لبنانێ بێی پەرە و پاسپۆرت دکەڤە کۆچە و کۆلانێن بەیرۆتێ، پڕ جاران د خەیالێن خوە دە هن پرسێن گرینگ ژ خوە دکە کو مرۆڤ دکارە ووسا شیرۆڤە بکە کو گەر ئەو بهاتا گرتن دا ئۆجالان ژی هەمان پرسان ژ وی بکە. ئەمێ هەول بدن د چەند نڤیسان دە باسی هن ژ ئەگەرێن ڤەقەتینا چوروککایا ژ پەکەکێ و هەلوەست و بریارێن ئۆجالان د ناڤا پەکەکێ دە کو نڤێسەر ب “ئایەتێن ئاپۆ” ددە ناسکرن بکن.
محەمەد سەلیم چوروککایا سەبارەت بەرسڤا عەڤدلا ئۆجالان دەما کادرۆیەکی پەکەکێ یێ وەکە مەزلووم دۆگان یان ژی محەمەد خەیری دورمۆش ئەو ب هەڤال عەبدوللا ب ناڤ دکر چ دبێژە؟
محەمەد سەلیم چوروککایا: ئەز وێ دنڤیسم یا کو ژ گۆتارێن درێژ تێگهشتیم و رێبەرێ مەزن دخوەست ب زمانێ خوە ژ مە رە ببێژە، ووسا خوەیا دکە هوون گیرۆ بوون، خەیری ژ مێژە گۆتبوو ئەم نەکارین دگەل ڤێ رەوشێ خوە ب رێخستن بکن، پێشی دڤێ ئەم شێوازێ خوە بگوهەرین، ژ من رە دبێژن هەڤال عەبدوللا، ئەڤ نە شێوازێ پەکەکێ یە، ب گۆتنا هەڤال عەبدوللا تو من بۆ ئاستێ خوە نزم دکی، ببێژن رێبەر و من پێش بێخن، پێدڤییە هوون فێر ببن و ببێژن رێبەر، ب شەهیدبوونا وە گەلەک تشت هاتن گوهەرتن، من پر تشت ژ نەبوونێ ئافراندن، من روح دا مرییان، یێ کو نەدکاری بئاخڤە من ئینا ئاخافتنێ، من یێن کورە ب چاڤ ئێخستن و یێن کەڕ ب گوهـ ئێخستن، من ل جیهێ ب قاسی سەرێ دەرزیەکێ چیایەک مەزن دروستکر، ئەز بلند بوومە، ئەز ب تەنا سەرێ خوە ب تەڤ دەولەتێن ئیمپریالیزم رە شەر دکم، کەس هەیا نها نەکاریە من فێم بکە، ئەز چووم ئاسیمان، بمەیزینن من هەر یەک ژ وە ژ جیهەکێ ڤێ جیهانێ ئانیە و هوون کۆمکرنە و ل ڤر ژ وە رە دئاخڤم.
گەر هوون د ژیانێ دە مابانە من ئەڤ هەموو تایبەتمەندی نەدبوون، دەست ژ چوونا ئاسیمانی بەردن، پێش کۆدەتایا 12 ئیلۆنێ وە ل جورنەرەشێ و گرێ سۆر چەک دتەقاندن، من و هەڤال ئەدهەم ب زۆری سینۆر دەرباس کرن و مە خوە رزگار کر، لێ نها ب وە شەهیدان رە دئاخڤم و بریاران ددم، ئەڤە دبینن، رێبەریا مە وەکە رێبەریا چ کەسەک دن نییە، ژ بەر ڤێ یەکێ هنەکێ رێز ل وە دگرم من هوون ئانینە ڤێ سازیێ.
ئەندامێن د ژیانێ دە مایین نکارن د سازیا سەرکردایەتیێ دە ببن ئەندام، ئەڤ سازیەک مەزن و بلندە، یێن د ژیانێ دە مایین من هەموو بچووک کرنە و کەس تونەیە خوەدی ڤان تایبەتمەندیان بە کو وان بینم د ڤێ سازیا بلند دە، هەموو ئاست نزمن، هنەک ژ وان بازدایە و بوونە ئاژانێن ئیمپریالیزمێ، هنەک ئەشکەرە بوون کو ئاژانێن بولگاریانە، هنەک ژ وان خوە کوشت هن ژی ژ ئالیێ مە ڤە ووسا لێ هاتن، ئەشکەرەیە کو وان نەدخوەست ئەز هەرم ئاسیمانان و ب وە هەڤالێن ب رۆمەت رە من پەیوەندی هەبن، بەلێ من دخوەست هەرم ئاسیمانان هەیا کو ببم عیسایێ مەسیح، من لێنێری ئەڤ یەک ب رێیێن سادە نایێ کرن.
هەر کەسێ کو نەدخوەست ئەز بفرم ئاسیمان و ئەز وەکە خوەداوەند میزە نەدکرم و نەدخوەست من بپەرێسە من ئەو کوشتن، رەڤاندن و ب رێیا شێوازێن خوە یێن تایبەت ئەو بەر ب خوە کوشتنێ ڤە برن، یێن مایی ژی تەڤ من کرن کۆلە، یێن مایی ژی ب کێری چ تشتەکی نایێن، گەلەک مەژی هشکن، نکارن نیسکەکی ژ سۆتنێ رزگار بکن، بەردەوام من بلند دکن، ب راستی ژی ئەز پڕ خوەشیێ ژێ دبینم، لێ ژ وان رە دبێژم: دەست ژ پەسندایینا من بەردن و تشتەکی ژ خوە رە بکن، هنەکێ پەسنا خوە بدن و خوە بلند بکن، ئەرکا من بلندکرنا وە یە، باوەر دکن، یا راست تام بەرەڤاژیییە، ئەرکا وان بلندکرنا من بوو و ئەرکا من نزمکرنا وان بوو، ب بلندبوونا من رە ئەو نزم دبوون، ب نزمبوونا وان ژی ئەز بلندتر دبووم، وان ب باشترین رێ بچووک دکم و ژ وان رە دبێژم:
سەرسەریێن سەرسەری، بێی شەرەفینە، کورێن کەرێ، ڤان ئاخافتنان وەکە تەئۆری رادخم بەر سینگا وان، پڕ کێف خوەش دبن دەما ئەز ب ڤی ئاوا ب وان رە دپەیڤم، ئەو ژی دبێژن: مە هێزەکە مەزن ژ ئایاتێن رێبەر وەرگرتن، چ بکم کۆلەنە و ب لێبۆرین سەرەدەریێ ب وان رە دکم، یان ژی دبێژم وان: باشە سەرسەریێن کورێن سەرسەریان، ئەز ژ وە رە دبێژم کەرێن کورێن کەران، وە ئەڤ خوەند و وە هێز ژ چ وەرگرت؟ ژ بەر وێ یەکێ وەکو بەخشەندەیەکی مەزن ئەز ل بەندەیێن خوە دبوورم.
پاش کو هوون مرن، پشکەک ژ زیندانیان ژی من ژناڤ برن، بەرێ هنەک ژ وان دا خوە کوشتنێ و یێن مایی ژی من کرن عەبد، ئەیاتان دەستپێکر و ژ من رە هاتن خوارێ، هەر هەفتەیەکی دێ ژ وە رە پرتووکەک ژ ئایاتان ببێژم، پەیڤان وەکە وەحی ژ وان رە دبێژم بێی دەستکاریکرن، ب سەدان پرتووکان ژ وان ئایاتان دەرکەتنە، هەر پرتووکەکی ژی شۆرەشەک دەستپێکرییە، بەندەیێن من دخوینن، لێ فێم ناکن، تێ دگهیژن ژی لێ یا کو ئەز ژ وان رە دبێژم نکارن همبەری وێ چێبکن.
