محەمەد سەلیم چوروککایا یەک ژ دامەزرینەرێن پەکەکێ یە، ئەو رۆژنامەڤان، سیاسەتمەدار و نڤێسەرە، ژبەر ولاتپارێزی و کوردپەروەریا وی دەما 11 سالان د زندانێن جودا یێن ترکیێ دە د رەوشەک هەری خراب دە ل بەر خوە دا و تەسلیم نەبوو، دەما ژ زندانێ ئازاد دبە، بەرێ خوە ددە چیا، ب عەڤدللا ئۆجالان رە دیسا تێکلدار دبە، دەما ژ زندانێ ئازاد بووی و ڤەگەریای ناڤا پەکەکێ دە ژ گەلەک تشتێن د ناڤا پەکەکێ دا بووین یاسا نەرازی بوو، لێ نەکاری نەرازبوونا خوە ب ئازادانە بەیان بکە، ژ بەر کو دیارکرنا نەرازیبوونێ ب واتەیا دژاتیکرنا ئۆجالان تێ، بێی گومان ئەڤ یەک ژی دا ببە سەدەما سووچبارکرنا وی ب ئیخانەتێ و پشترە تەسفیەکرنا وی، ژ نەچاری بریارا رەڤین ژ ناڤا پەکەکێ و ڤەقەتینا ژ ڤێ پارتیێ ددە، وی ب نڤسیاندنا پرتووکەکێ ب ناڤێ “ئایەتێن ئاپۆ” هەول دا راستیا ئۆجالان و پەکەکێ ژ گەلێ کورد و جیهانێ رە ئەشکەرە بکە.
د ڤێ پرتووکێ دە باش خویا دبە کو گەلەک تەنگاسی دیتنە هەیا کو بکارە خوە بگهینە ئەورۆپایێ، دەما ژ پەکەکێ ڤەدقەتە و ل لبنانێ بێی پەرە و پاسپۆرت دکەڤە کۆچە و کۆلانێن بەیرۆتێ، پڕ جاران د خەیالێن خوە دە هن پرسێن گرینگ ژ خوە دکە کو مرۆڤ دکارە ووسا شیرۆڤە بکە کو گەر ئەو بهاتا گرتن دا ئۆجالان ژی هەمان پرسان ژ وی بکە. ئەمێ هەول بدن د چەند نڤیسان دە باسی هن ژ ئەگەرێن ڤەقەتینا چوروککایا ژ پەکەکێ و هەلوەست و بریارێن ئۆجالان د ناڤا پەکەکێ دە کو نڤێسەر ب “ئایەتێن ئاپۆ” ددە ناسکرن بکن.
چما ئۆجالان رێ نادە کادرۆیێن پەکەکێ بفکرن؟
د ڤێ دەربارێ دە ل گۆر ئاخافتنا محەمەد سەلیم چروککایا ئۆجالان ب ڤی ئاوا دفکرە و دبێژە: دەما مرۆڤ دەست ب هزر کرنێ دکە پر مەترسیدارە، ژ بەر کو ئەو ب خوە نزانە چ دکە، گەر کادرۆیان هەلوەست وەرگرت و هزر ئافراندن دێ خوە ئینن رێزا من، یان ژی من ئاست و پۆستێن خوە نزم کرنە، چ جوداهی نینە، هەر دو هەمان تشتن، لێ بەلێ ئەو یەک تاوانەکا مەزنە، ژ بەر ڤێ یەکێ ئەز ئایەتان ژ بۆی بەندەیێن خوە رێ دکم هەتا کو دادگەهێ دامەزرینن و کەسێن تاوانبار داگەهی بکن، دۆزگەرێ گشتی د هەمان دەم دە داخوازناما تاوانبارکرنێ بەرهەڤ دکە، بێی گومان داخوازناما تاوانبارکرنێ ل گۆر شێوازا پەکەکی ئانکو شێوازا من تێ بەرهەڤکرن.
دەما کارێ سووچبارکرنێ ب داوی هات، تەڤ خوەندکارێن ئاکادەمیێ دێ د هۆلێ دە کۆم ببن، دەستەیا دادوەریێ دێ ل جیهەکی ئاشکەرا روونە، ئەو کەسێ بێی بوها دێ هێت بانگ کرن و دۆزگەرێ گشتی دێ داخوازناما خوە خوینت، پرانیا جاران تەڤ داخوازنامە وەک هەڤن، تاوانا کەسێ هاتیە بانگ کرن ژی هەمان تاوانا کەسێن پێش وی هاتیە بانگ کرنە، ئەو فکرن یێن ژ دەرڤەی فکرێن من هاتینە ئافراندن، ئایەتێن من وەکە خوە دوبارە نەکرنە، ئایەتێن من کرنە مژارا دانوستاندنێ، نەرینا من وەکە مرۆڤەکی سادە دیتن و ئاخافتن ب شێوازا خوە، بێی گۆمان ژ تاوانێن هەری مەزنن، کەسێ کو ئایەتێن من وەکە من نڤیساندین دوبارە نەکە و جیبجی نەکە بێ گۆمان وی گوهداریا دژمنان کریە، دژمنان ئەو شاندیە ناڤا پارتیێ دە، سیخورە، ئەو کەسێ وان زاراوەیان بکار نەئینە یێن ئەز بکار تینم و دەبارە نەکە، ئەو کەس شێوازا خوە بکار تینە، بکارئانینا شێوازا خوە د ناڤا پارتیێ دە تاوانە، ژ بەر کو د ناڤا پارتیێ دە ب تەنێ ئەز ب شێوازا خوە دپەیڤم، ئاخافتن ب شێوازا من ژ بۆی من مەزناهیە، لێ بەلێ گەر کەسەک دن ب شێوازا خوە بپەیڤە تاوانەکە مەزنە، ئەڤ قانوونا پارتیێ یە، گەلۆ قەی من ئەڤ قانوون ژ بۆی خوە دانایە؟ ژ بلی من یێ کو ب شێوازا خوە بپەیڤە، وی چاڤێ خوە بریە رێبەراتیێ یان ژی جورەکە دن یێ رێبەراتیێ کو سەرناکەڤە، داویێ ژی ئەو بوونە سیخورێن کەمالیزمێ یانژی یێن ئیمپریالیزمێ ئەز نزانم، دەما شێوازا رێبەراتیێ هەبە جی ژ بۆی رێبازا بورجوازی و دژمنان تونەیە، ما نە ووسایە؟ شێوازا رێبەراتیێ زەلال و ئاشکەرایە و ئەنجام هەنە.
