محەمەد سەلیم چوروککایا یەک ژ دامەزرینەرێن پەکەکێ یە، ئەو رۆژنامەڤان، سیاسەتمەدار و نڤێسەرە، ژبەر ولاتپارێزی و کوردپەروەریا وی دەما 11 سالان د زندانێن جودا یێن ترکیێ دە د رەوشەک هەری خراب دە ل بەر خوە دا و تەسلیم نەبوو، دەما ژ زندانێ ئازاد دبە، بەرێ خوە ددە چیا، ب عەڤدللا ئۆجالان رە دیسا تێکلدار دبە، دەما ژ زندانێ ئازاد بووی و ڤەگەریای ناڤا پەکەکێ دە ژ گەلەک تشتێن د ناڤا پەکەکێ دا بووین یاسا نەرازی بوو، لێ نەکاری نەرازبوونا خوە ب ئازادانە بەیان بکە، ژ بەر کو دیارکرنا نەرازیبوونێ ب واتەیا دژاتیکرنا ئۆجالان تێ، بێی گومان ئەڤ یەک ژی دا ببە سەدەما سووچبارکرنا وی ب ئیخانەتێ و پشترە تەسفیەکرنا وی، ژ نەچاری بریارا رەڤین ژ ناڤا پەکەکێ و ڤەقەتینا ژ ڤێ پارتیێ ددە، وی ب نڤسیاندنا پرتووکەکێ ب ناڤێ “ئایەتێن ئاپۆ” هەول دا راستیا ئۆجالان و پەکەکێ ژ گەلێ کورد و جیهانێ رە ئەشکەرە بکە.
د ڤێ پرتووکێ دە باش خویا دبە کو گەلەک تەنگاسی دیتنە هەیا کو بکارە خوە بگهینە ئەورۆپایێ، دەما ژ پەکەکێ ڤەدقەتە و ل لبنانێ بێی پەرە و پاسپۆرت دکەڤە کۆچە و کۆلانێن بەیرۆتێ، پڕ جاران د خەیالێن خوە دە هن پرسێن گرینگ ژ خوە دکە کو مرۆڤ دکارە ووسا شیرۆڤە بکە کو گەر ئەو بهاتا گرتن دا ئۆجالان ژی هەمان پرسان ژ وی بکە. ئەمێ هەول بدن د چەند نڤیسان دە باسی هن ژ ئەگەرێن ڤەقەتینا چوروککایا ژ پەکەکێ و هەلوەست و بریارێن ئۆجالان د ناڤا پەکەکێ دە کو نڤێسەر ب “ئایەتێن ئاپۆ” ددە ناسکرن بکن.
دەما ئاپۆ پەسنا خوە ددە، د نەرینا محەمەد سەلیم چوروککایا دە:
هەیا نها هەر پێغەمبەرەکی یێک پرتووک ب تەنێ هەبوویە، هن ژ وان ژی پرتووک نەبوویە، لێ پێغەمبەر بوون، لێ ئەز ل پێشیا هەموویان کەتمە، نها ب مەلیۆنان کەس هەنە من دپەرێسن و ب دووڤ من کەتنە، پر ب جوانی ئەدەبیاتان ژ وان رە چێدکم، بەلێ، ئەز کەسایەتییا شیرۆڤە دکم، هەر پرتووکەک رۆمانەکە، یا کو یەشار کەمال نڤیساندی هەڤبەر یێن من نڤیساندی ت تشتەک نینە، ئەز دبێژم یەشار کەمال ب تەنێ چەتەیەک بوو، ئەز دوبارە کەسایەتیان ئاڤا دکم و ب رێیا جڤینان جارەکە دن دهەرفینم، ئەز مرۆڤان دوبارە دئافرینم، ب هەموو واتەیێن پەیڤێ ئەز مرۆڤان دئافرینم، مرۆڤ ئافراندن ژ بۆی من کارەکی ب زەحمەت نینە، ئەو کار پێش نها ژ ئەرکێن خوەدێ بوو و نها ئەز دکم.
بەری نها من پر حەز دکر بزانبم خوەدێ چەوا مرۆڤان دئافرینە، ووسا خوەیا بوو کارەکی پر هێسان و سادەیە، رێ و چەوانیا وێ دڤێت بزانبی، یێن تێن جەم من ب تەڤ هێز و دەستهلاتا خوە ئەز وان پڕ دکم: تو ببە سیخورەکی کارپێکری، تو کۆلەیێ کەمالیزمێ، تو کەسەکی ب فەرمان هاتیە دروستکرن، تو کەسەکی بێ بوهایی، تو یێ د سەردا چوویی، تو ل دووڤ سەرێ خوە دچی و ئەو کەتوارێ تو تێ دە ژیان دکی نە کەتوارێ تەیە، هەر وەکە تو هەیی تو چ نینی، یێن ژ نوو هاتنە جەم من ژی ب ئاقل گوهداریا من بکن.
کۆلەیێن من، نەزان، سەرداچوویی، نزم، ئاژان یێن من کرینە برێکارێن کارێ خوە، پێدڤییە ب دەستویرییا من بئاخڤن ووسا بئاخڤن: ئەم پر سڤکن، ئەم ت تشتەک نینە، ئەم بووینە کرێ گرتی و ئاژان، چما د ناڤا مە دە خەباتکار و رێبەرێن باش دەرناکەڤن؟ چما رێبەرتی ژ مە هەموویان پێتر کار دکە؟ ئەو رێبەرێ کو ب تەنا سەرێ خوە هەم رێبەراتییا ستراتەژی و هەم رێبەراتییا تاکتیکی برێڤە دبە رۆژانە گرنگیێ ب هەموویان ددە، ئەم رۆژانە گرنگیێ ب چەند کەسان ددن، و ژ بۆی خوە رادکێشین؟ بلا جارەکی بەرێ خوە بدین دووراتیا د نێڤبەرا خوە و رێبەراتییێ دە، رێبەر ل سەرێ چییایێ ئاراراتێیە و ئەم هێژان نەگەهشتنە بنێ چیای ژی.
