یێن دیرۆکا پەکەکێ خواندی و لێکۆلین ل سەر کری چەند تێگەهـ ھەنە کو پر دبھیزن. ژ ڤان تێگەهان یەکەم «رێبەری»یە. تێگەهـێ دویەمین «قەھرەمانی». تێگەهێ سێیەم یێ کو ھوون دێ گەلەک جاران بھیزن ژی پەیڤا «خاین-ئاژان»ە.
ھوون نکارن یەک دۆکۆمێنتا پەکەکێ پەیدا بکەن کو ئەڤ تێگەهە تێ دا نەبن. پەکەکە ژ بلی خوە ھەموو پارتی، تەڤگەر و کەسایەتیان خایین رادگەهینیت. ھەر کەس سیخور یان ژی خاینە. واتە ل گۆر پرۆپاگاندایا پەکەکێ تەنێ ئۆجالان و پارتیا وی قەھرەمانن. گەلۆ ئەڤ چەندە راستە؟ وەرن ئەم لێگەرینا خوە یا ژ بۆ بەرسڤا ڤێ پرسێ بەردەوام بکەین.
ب راستی ما عەڤدلا ئۆجالان قەهرەمانە؟ ژ بۆ کو ببتەە قەهرەمان وی چ کر؟ یان ژی عەڤدلا ئۆجالان خاینە؟ وی چ کر کو بوویە خاین؟ ژخوە پەکەکێ ھەموو ھێزا خوە بکارتینیت کو ئۆجالان وەکە قەهرەمان دەستنیشان بکەت. لێ دا ئەم تشتێن کو ل سەر عەڤدلا ئۆجالان نەھاتینە گۆتن ببێژین. د ھەلوەستا ئۆجالان دا هیچ بەرخوەدانڤانی نینە، ھەلوەستەکێ قەهرەمانانە نیشان نەدا، دەولەتێ چ خواست و چ پرسی بەرسڤا وان دا. ئۆجالان دانپیدان بۆ دەولەتا ترک کرن. ھەگەر کەسەکێ دن پشتی گرتنا عەڤدلا ئۆجالان ھەلوەستا وی نیشان دابا، دا پەکەکە وی وەک خاین-ئاژان راگەهینیت.
شەمدین ساکک ل سەر دانپێدانێن ئۆجالان چ گۆت ؟
بۆ نموونە شەمدین ساککێ کو ژ ئالیێ پەکەکێ ڤە وەکە خاینێ ھەری مەزن ھاتیە راگەهاندن ژی وەھا دگۆت: «گاڤا ئۆجالان ب مرنێ روو ب روو مای ھەر تشت گۆت. پەیوەندیێن خوە یێن ل سووریایێ ئیفشا کرن. لێ بەلێ د لێپرسینێ دا گۆتە من ئەو گوندی و شڤانێن کو هاریکاریا پەکەکێ کری کینە، من د بەرسڤا ڤێ پرسیارێ دا ناڤێ کەسێ نەگۆت. لێ ئۆجەلان ھەر تشت ژ بۆ دەولەتێ گۆت.» بەلێ، ئۆجالان ھەر تشت گۆت. بەریا ھەر تشتی، وی ناڤ و ژیانناما رێھەڤالێن خوە، رێخستنا خوە و دۆستێن خوە ژ بۆ دەولەتێ گۆتن.
میناک، گاڤا کو ئۆجالان ھاتیە گرتن پەکەکێ کۆنگرەیا 6ەمین لداردخست. ئۆجالان جیھ، بەشدارڤان و ئارمانجا کۆنگەرەیێ ھەموو ژ بۆ دوژمنی یەک ب یەک گۆتن. د بەلگەیێن فەرمی دا ئەم ڤێ یەکێ باش دزانین.
پرسیار: دەر بارێ کۆنگرەیا 6 دا زانیاریان بدە؟
عەڤدلا ئۆجالان: ژ بۆ لدارخستنا کۆنگرەیێ ل قوونتارا چییایێ زاگرۆس یێ باکورێ ئیراقێ من فەرمان دا. جیهـ ناڤچەیا د ناڤبەرا چیایێ قەندیل و خاکوورکێ ل دەڤەرا خنێرە دایە. ئەو ژ داویا کانوونێ ڤە دهێتە لدارخستن. د تەلەفۆنێن کو من د بەرییا 15ێ شوباتا 1999ێ کری دا من زانی کو کۆنگرە بەردەوامە و نیقاش گەھشتنە مژارێن جەپھە.
ئۆجەلان د 16ێ شوباتێ دا دەست ب ڤان دانپیدانا کر. یانی دەما کو ئۆجالان ئەڤ زانیاریە دایە دەولەتێ، کۆنگرە ھێژ ژی بەردەوام بوو. ئۆجالان بێ دودلی زانیاریێن جھێ 350 رێڤەبرێن رێخستنا خوە دانە دژمنی.
پشترا ژی ئۆجالان دەربارێ کۆنگرەیێ دا وەھا بەردەوام کر:
عەڤدلا ئۆجالان: ئەڤ کۆنگرە کۆنگرەیا ژ نوو ڤە ئاڤاکرنا رێخستنێ یە. من کاسەتەک ژی ژ بۆ ڤێ کۆنگرەیێ شاند. خالێن رۆژەڤا کۆنگرەیێ؛ 1-ئیدەئۆلۆژیک 2-سیاسی 3-بابەتێن لەشکەری ٤4-خەباتێن ئەیالەت و ھەرێما 5-ئەنیێن خەباتێ 6-رەخنە-رەخنەدان 7-مژارێن ھلبژارتنێ تێنە گۆتووبێژکرن… د ئەنجاما کۆنگرەیا 6ێ دا دێ بەرپرسیارێ ئەورۆپا بیتە شاھین جیلۆ (مەزلووم عەبدی). بەرپرسیاریا بۆتانێ دێ هێتە خورتکرن، بەرپرسیاریا بەھدینان ب فەرماندارییەکا خورت هێتە سازکرن. ژ بۆ ھەرێما سۆران ئیدارەیەک زانا و بژارە دێ هێتە وەزیفەدارکرن. کانی یلماز ناشینن ئەورۆپایێ.
ئۆجەلان نە تەنێ ناڤێ شاھین جیلۆ( فەرماندارێ ھەسەدێ) دایە دەولەتێ، بەلکو ناڤێ گەلەک فەرماندارێن خوە دانە دەولەتێ. ھەموو رێڤەبەر ئاشکەرا کرن. نە تەنێ ل سەر پاشەرۆژێ د ھەمان دەمێ دا ل سەر تشتێن کو دبیت کو د پێشەرۆژێ دا بقەومن ژی زانیاری دانە دژمنی. بۆ میناک ئۆجالان د دەربارێ رێڤەبەریا کو دێ د کۆنگرەیا 6ێ دا هێتە ھلبژارتن وەھا دبێژیت.
عەڤدلا ئۆجالان: کەسێن وەک جومعا، فەرھاد، ئەبوبەکر، عەباس، ماھیر وەلات دکارن د کۆمیتەیا ناڤەندی دا جی بگرن. ھەمان دەم ژ خەباتکارێن ناڤەندی ژی زەکی، عیسا، فوئاد، ناسر، جەمال، فەلات و مستەفا قاراسوو ژ ناڤ کادرۆیێن کۆمیتەیا ناڤین دا بێنە ھلبژارتن.
د کۆنگرەیا 6ێ دا جڤاتا لەشکەری کو ژ 25-30 کەسان پێک دهێت بهێتە ئاڤاکرن. دکارن ل شوونا سیستەما ئەیالەتان، سیستەما ساحا ئاڤا بکەن. بلا بریار بهێتە دایین کو ئالیێن سیاسی و لەشکەری پێکڤە تەڤبگەرن. دێ ئیدارە ژ کەسێن کەڤن و نوو پێک هێت. د شیاندایە ل باشوور پێتر پێشکەتن پێک بهێن. جارنان دبیت کو ئەو ھێزا خوە دەرباسی جییێن دن ژی بکەن. ل بۆتانێ، د بن فەرماندارییا باھۆز (سوورییە) دا (1000) گەریلا ھەنە. ل زاگرۆسێ ل گەل ئەبووبەکر دەردۆرا (700-800) گەریلا ھەنە. «در. عەلی ئامەد» (خوەندەکارێ پزیشکی، 7-8 سالان د رێخستنێ دا) د بن بەرپرسیاریا وی دا (400) کەس ھەنە. ل ئەرزەرۆمێ د بن بەرپرسیاریا یلماز دا (ک) دەردۆرا (150-200) نەفەر ھەنە. ل دێرسمێ ل گەل کازم (350-400) گەریلا ھەنە. ل «سەرحەدێ» د بن بەرپرسیاریا «سەبری» دا 150-200 کەس ھەنە. ل ئەیالەتا «کۆچگیری» دۆرا (40-50) کەسا د بن بەرپرسیاریا «ئالشار» دا ھەنە. ل دەریایا رەش یا د بن بەرپرسیاریا «ئایھان» (ک) دا (40-50) کەس ھەنە، ل گەل DHKP-C حەرەکەتێ دکەن. ل «گارزانێ» ھێز نینە، ھێزا وێ ل «ئامەدێ» یە. ل مێردینێ دەردۆرا 150ی کەسان کو بەرپرسێ وێ «فەلات» (ک) بوو لێ من وەها بھیست کو ئەو مریە. ل ور پرسگرێک کێمن و گەلەک ئیمکانێن وان یێن ئابۆری ھەنە. ل دو ھەرێمێن باکورێ ئیراقێ؛ (A) ھەرێما بەھدینان یا د بن بەرپرسیاریا «عەباس» دا (1500) گەریلا ھەنە، ئەو ھەرێما بارزانییا نە. (B) ل سۆران 2500 کەس د بن بەرپرسیارییا «جومعا» دا ھەنە. سۆران جیھەکێ د ناڤبەرا «خاکوورکێ و سلێمانیێ» دایە. ھێزا وان چار ژ سێ ل وێ دەڤارێ نە. ل «روحا»یێ د بن فەرماندارییا «کەمال ساوور» دا (25-30) کەس ھەنە. ل دەریایا سپی «سار ئیبراھیم» ژ (80-100) کەسان بەرپسریارە. ل باشوور(4500)، ل ترکیایێ ژی (3000) گەریلا ھەنە.
ئۆجالان یەک ب یەک ناڤێن ھەموو بەرپرسان و زانیاریان ل سەر وان ددەت. ب راستی، د داویا بەلگەیا فەرمی دا، دبێژیت: «ل سەر ڤێ مژارێ کاسەت و بەلگەیێن بەرفرەھ ھەنە«.
ب راستی، عەڤدلا ئۆجەلان یەک ب یەک ناڤێ ھەموو فەرماندار و دەڤەرا دانە دەولەتێ. د بەلگەیێن فەرمی دا وەھا ھاتییە نڤیسن «ل سەر ڤێ مژارێ ب ھورگولی کاسەت و نەخشە ل گەل مە مەوجودن» ب راستی ل سەر ڤان گۆتنان عەڤدلا ئۆجەلان، دەولەتا ترک ژی ماتمایی دھێلیت. سەرفەرماندارێ ئارتێشا ترک «حەسەن ئاتیلا ئۆگور»، کەسێ کو ل سەر ناڤێ دەولەتێ لگەل ئۆجالان دا ھەڤدیتن ئەنجامدای، پرتووکەک ب ناڤێ «من لێپرسین لگەل عەڤدلا ئۆجەلان کر-ئەڤەنە راستی» دا وەھا دنڤیسیت: «من نڤیساند کو ئەو چەند حەز ژ مستافا کەمال «ئاتاتورک» دکەت و تەنێ ژ بۆ کو ئەو نەهێتە دارڤەکرن ما چ گۆت و چ نەگۆت.«
ئۆجالان چما ھاتە گرتن؟
هێژ ئۆجەلان نوو ھاتیە ترکییێ خواستیە ببیتە خزمەتکارێ دەولەتێ و ژ بۆ دەولەتێ پلانێن بھەڤرا کارکرنێ پێشکێش دکەت. ئۆجالان ئەو قاس زانیاری دانە دەولەتا ترک، چما ژ رۆژا دەستپێکێ خواست بھەڤرا پرۆژەیان بمەشینن؟ ژ بەر کو ئۆجالان رۆژا پشتی گرتنێ د بەلگەیێن لێپرسینێ دا دبێژیت: من خواند. من دیرۆکا ترکان و مژارێن کو سبەرۆژا ترکیایێ زەلال دکەن شۆپاندن. ئەز دخوازم بەشداری ڤێ پێڤاژۆیێ ببم. د ناڤ مە دا ژ بەر کادرۆیێن گوندی خەلەتی ھاتنە کرن. %5 شاشیێن دەولەتێ بوون، %95 ژی شاشیێن مە بوون. لێ ئەز خەلەتیێ قەبوول دکەم.
ئۆجالان یەکسەر پشتی ڤان گۆتنان وەھا لێ زێدە دکەت: «ل ترکیایێ 7 ملیۆن کورد ھەنە، گرسە ژ بۆ خەباتا مەیا دن بەسە. کۆنترۆلکرنا پشتەڤانان گرینگە. گرسە پر چالاکە و د ھەر چالاکیێ دا ژ کۆنترۆلێ دەردکەڤیت. گەل پر حەز ژ من دکەت. ژ بەر ڤێ یەکێ یە کو ل سەر بنگەھێ من ھەیی بەردەوام دکەت، لێ سەرۆکێ کو ل دژی فکرێن من بیت، نکاریت ببیتە سەرۆک و سەرناکەڤیت» ئۆجالان دەما دبێژیتە دەولەتا ترک «خەباتا ل پێشییا مە» د خوازە چ بێژیت؟ ئۆجالان و دەولەتا ترک ب گرسەیا پەکەکێ یا ل باکورێ کوردستانێ دێ چ کەن؟ پرسا ھەری گرینگ ئەڤەیە، هەوە کیژان ھەلوەستا قەهرەمانی یا ئۆجالان د نڤیسا 13 ھەزار پەیڤی یا لێپرسینا ئۆجالان دا دیت کو مە د ڤان ڤیدیۆیان دا بەحسا وێ کری؟ ئۆجالان د ھەموو نڤیسینێ دا جارەکێ ژی پەیڤا کوردستانێ ژ بۆ ناڤێ وەلاتێ خوە ب کار نەئانییە، دەما بەحسا باشوورێ کوردستانێ ژی دکەت دبێژیت باکورێ ئیراقێ. ناڤێ ھەموو ھەڤالێن خوە یەک ب یەک ددەت. ھەتا ئەو دبێژیت کا برایێ وی عۆسمان ئۆجالان دکاریت چ بکەت. ئەو پەیمانەکێ پێشکێشی دەولەتێ دکە.ت
ئەم ژی دپرسین: دەما کو بەلگەیەکێ وەھا ل ھۆلێ ھەبیت و ئۆجالان ئەڤ تشتە گۆتبنە دەولەتا ترکیێ، گەلۆ؛ ئۆجالان خاینە یان ژی قەھرەمانە؟
