بەشێک لە کتێبی “PKK پرۆژەیەک بۆ سڕینەوەی بزووتنەوەی نەتەوەیی کورد، لێکۆڵینەوەیەک لەسەر ئایدیا و مێژووی پارتی کرێکارانی کوردستان”، لەنووسینی: جەمیل کولاهی
قۆناغی چوارەم لە ژیانی ئیدئۆلۆژیكی ئۆجەلان و دەوڵەت – نەتەوە
ئۆجەلان بنەما ئیدئۆلۆژیكەكانی دەوڵەت-نەتەوە یان هەمان سەرخان بە ناسیۆنالیزم، زانستی پۆزیتیڤیستی، سێكسیزم و دین دەزانێ. ئەو ئەم باسەی لە تێئۆریی كاری كارل ماركس وەرگرتووە، بەڵام ئۆجەلان هاتووە ئەمەی پێچەوانە كردۆتەوە و هەموو كێشەكانی ناو كۆمەڵگە لە كار و سەرمایەوە بگرە تا ناكۆكییە نەتەوایەتییەكانی خستۆتە ئەستۆی دەوڵەت-نەتەوە.! ئۆجەلان پێیوایە ئەگەر دەوڵەت نەتەوە نەمێنێ، كێشەكان چارەسەر دەبن.
ئۆجەلان دەڵێ: “لە رابردوودا دروشمی کوردستانی سەربەخۆ، یەکپارچە و سوسیالیستی بەرز کرایەوە. ئەم دروشمە ریشەی لە زەینییەتی نەتەوەپەروەرییە، کە هەم لە باری ئیدئۆلۆژیکی و هەم لە باری سیاسییەوە واقعبینانە نیە! عەرەبەکان بوونەتە زیاتر لە بیست دەوڵەت، تورکەکان و ئێرانییەکانیش هەروەها، دابەشبوونی کوردەکان جیاوازترە و جیاوازی تایبەت بە خۆی هەیە. ئەگەر هەر بەشێک لە گەل بە جیا شەڕی نەتەوەیی و نیشتمانی دەستپێبکات، هەموو ڕۆژهەڵاتی ناڤین دەبێتە مەیدانی شەڕ. بە جیابوونەوەی زیاتر، کێشە جۆغرافیاییەکان و دینییەکان قوڵتر دەبنە. هەموو شوێنێک دەبێتە شەڕی فەلەستین و ئیسرائیل. روونە کە ئەم روانگەیە لە سەر نەتەوە و وڵاتی یەکپارچە لە زەینییەتێکی نەتەوەپەروەرەوە سەرچاوەی دەگرت و دەبووە هۆی خوێنینترین شەڕەکانی ئەم دوو سەدەیە. رێگەی دروست ئەوەیە کە سنوورەکانی ڕۆژهەڵاتی ناڤینی هەنووکەیی وەک ئەساس وەربگرین و بە خەبات بۆ دیموکراسی و مافە ئەساسییەکان لە هەموو وڵاتان و دەوڵەتەکاندا و بە پاراستنی یەکپارچەیی خاکی ئەو وڵاتانە، مافی وەک یەک و پێکەوەژیانی ئازادانە دەستەبەر بکەین”. (ئۆجەلان: ٢٠٠٦-ب، ٢١-٢٠)
ئۆجەلان لەم پێوندییەدا دەڵێ: “لە دەیەكانی دواییدا كوردەكان تەنیا بە مەبەستی ناساندنی خۆیان خەباتیان دژی هێزە زاڵەكان نەكردووە، بەڵكوو بۆ ئازادكردنی كۆمەڵگە لە دەستی فیۆداڵیزمیش خەباتیان كردووە. دامەزراندنی دەوڵەتی نەتەوەیی ئاڵتێرناتیڤ نیە بۆ من. چارەسەری كێشەی كورد پێویستی بە دۆزینەوەی ڕێگایەكە كە لەودا یان مۆدێڕنیتەی كاپیتالیستی لاواز بكرێ یان بەرەو دواوە پاڵی پێوە بنرێت.! ئەوە کە شوێنی نیشتەجێبوونی كورد دابەشبكرێ بە سەر چوار وڵاتدا و بۆتە هۆی پێكهاتنی ڕێگە چارەیەكی دێموكراتیكی پێویست.! هەڵكەوتی ژێئۆستراتێژیكی خاكی كورد، شانسێكی گەورە دەدات بە پڕۆژەی دێموكراتیكی كورد بۆ دێموكراتیزە كردنی ڕۆژهەڵاتی ناڤین. ناوی ئەم پڕۆژەیە كۆنفیدرالیزمی دێموكراتیكە.” (ئۆجەلان: ٢٠١١ ،١٩-٢٠)
شتێكی گرینگ كە ئۆجەلان لێرەدا ئاماژەی پێدەكات ئەوەیە كە كورد هێشتا لە قۆناغی “فیۆدالیزم”دایە، بەڵام بیرۆكەی كۆنفیدرالیزمی دیموكراتیك بیرۆكەی بووكچینە. لەم بیرۆكەیەی ئۆجەلان ئەوەی كە پێكهێنەری چەوساندنەوە و نادادپەروەرییە، سەرمایەداری نیە، بەڵكوو دەوڵەتی نەتەوەییە.
لە ئاکامدا ئۆجەلان دەڵێ: کاتی سەرهەڵدان بە مەبەستی پێکهێنانی دەوڵەتی سەربەخۆ و شۆڕشی رزگاریدەر وەک ئەوەی لە رابردوودا بوو بەسەرچووە. سەرهەڵدان بە مەبەستی پێکهێنانی دەوڵەت و رزگاریی نەتەوەیی لە ئاکامدا شتێک زیاتر لە دەوڵەتێکی کاپیتالیستی نیە. نە تەنیا هیچکام لە کێشەکانی گەلی پێ چارەسەر ناکرێ، بەڵکو کێشەکان قووڵتر دەکاتەوە. (ئۆجەلان: ٢٠٠٦-ب، ٤٤ و ٤٩ و ٥٠ )
بە بڕوای رێبەر ئاپۆ کوردەکان دەبێ ببنە گەرەنتیی یەکپارچەیی [مەبەستی ئێران، تورکیە، عێراق و سووریایە] لە چوارچێوەیەکی دیمۆکراتیکدا و لە حاڵەتی هێزێکی جوداییخواز و شۆڕشگێڕ بۆ ئەو وڵاتانە کە تێیایدا ژیان دەکەن بێنە دەر. رێگەچارە نە سەرهەڵدانە و نە جوداییخوازی، بەڵکو سازشی دیمۆکراتیک و ئاشتیخوازانەیە. دابەشبوونی کوردەکان لە ڕۆژهەڵاتی ناڤیندا ئێستا بۆ ئەوان ئیمتیازێکە. تەنانەت ژاراوخۆر کردنی کورد بە نەتەوەپەروەری ئاکامگەلێکی پۆزێتیڤی پێکهێناوە. ئەگەر گەلی کورد گۆڕانی دیمۆکراتیک لە خۆی پێکبێنێ، نەتەوەی ئەویش ناچار بە گۆڕانی دیمۆکراتیک دەکات. لە رابردوودا کوردەکان ببوونە بە کەرەستەی جوداییخوازی و کەرەستەی دەستی بیانییەکان. ئەمڕۆ بە پێچەوانەی رابردوو پێکهاتنی ئازادی، ئاشتی و برایەتی گەرەنتی دەکەن. بزووتنەوەی کورد بنەمای یەکیەتی دەوڵەت و پاراستنی یەکپارچەیی خاکی ئەو وڵاتانەیە. لەمە بە دوا، کوردەکان لە هەر کوێ بژین، وەبیرهێنەرەوەی پەرەپێدانی ئازادی و دیمۆکراسین. کوردەکان لە ئێران وەرگرتنی رۆڵی مێژوویی، هەنگاوی پتەو بۆ چێکردنی کۆماری دیمۆکراتیکی ئیسلامی و یان سیستمێکی مۆدێڕنتر هەڵدەگرن. لە عێراق لە چوارچێوەی فیدراسیونێکی دیمۆکراتیک گەرەنتی سەرەکی پێکهاتنی عێراقی دیمۆکراتیک یان فیدراسیونی عێراقن. لە تورکیەدا بۆ سەرکەوتنی کۆماری دیمۆکراتیک و الئیک بە هەڵگرتنی هەنگاوگەلی وشیارانە و دیمۆکراتیک رۆڵی سەرەکی دەبینن. لەلایەک دیکەوە رۆڵی ئەوان لە پێکهاتنی سوریەی دیمۆکراتیک نابێ لە بەرچاو نەگیردرێ. (ئۆجەلان: ٢٠٠٨-ئا، ١٠٠)
بۆ بینینی بەشی 8 کرتە لێرە بکە
