• سمکۆ عەبدولعەزیز

بەشا 2: ئه‌و واره‌ لێ نه ‌ئه‌و بوهاره‌

د به‌رده‌وامییا داخویانیا خوە دا یا لگەل ANFێ دا، سالح موسلم ل سەر دو مژارێن دی پەیڤی، مژار ژی گەریلا و پێشمەرگە بوون.

سالح موسلم ده‌ربارا گه‌ریلا دا دبێژیت‌: گه‌ریلا ل هه‌ر چار پەرچەیێن كوردستانێ ژبو رزگاربوونا كوردستانێ کۆمی سەر هەڤ بوونە.

ئه‌ڤ گوتن‌ هەیا رادەیەکێ راسته‌، لێ نه‌ ل جه‌م سه‌ركردایه‌تیا پەکەکێ، به‌لكو ل جه‌م گه‌ریلایان ب خوە، ژبەرکو روژا گه‌ریلا بریار دایی چه‌كی هه‌لگریت ژ بۆ رزگار بوونا كوردستانێ بوو.

 ناڤێ هیزا چەکداری یا پەکەکێ ل سه‌رده‌ما شه‌هید “مەعسوم قورقوماز” ب ناڤێ HRK ئانکو ( هێزا رزگاریا كوردستانێ ) بوو، ژبه‌ر ناڤێ رزگاریا كوردستانێ ب هەزاران كەچ و کورێن كورد ده‌ست ل ژیانا خوە یا سڤیل بەردان و چوون‌ چیا و چه‌كێ پاراستنا نامووس و به‌رخودانێ هلگرت و گیانێ خوە كر‌ قوربانێ کوردستانا داییک، ڤان جوانێن کورد نه‌ ژبۆی براتیا گه‌لان به‌لكو ژبۆی ئازادکرنا خاكا پیروزا كوردستانێ و مروڤێ كورد، كو د بن ئالا رەنگین یا کوردستانێ دا بژین جانێ خوە فەدا کر.

لێ نها ئه‌ڤ گه‌ریلایه‌ ژ ئالیێ سه‌ركرداتییا پەکەکێ هاتنه‌ خاپاندن و ئه‌م دكارین ببێژین، خیانەت ل ڤان جوانان هاتیه‌ كرن، ب چ ئاوا خیانەت ل وان هاته‌ كرن؟؟ گه‌ریلایێن قاهرەمان هاتبوون كو د بن سەیوانا هێزا رزگارییا كوردستانێ دا خه‌باتێ ژ بۆی رزگاریا کوردستانێ بكه‌ت و ژیانا خوە و مالباتا خوە خستە د مەترسییێ دا، ب هەزاران خیزانێن کورد هه‌نه‌ کو ب سەدەما تەڤلیبوونا زارۆکێن وان ژ بۆی ناڤا ریزێن گەریلایان دا ده‌ربه‌دەر بوونه‌ و ل كۆلانێن باژارێن مەزن یێن ترکیێ وه‌كو هێتیم و سێوییان ژیانێ دکەن، دەما کو ئه‌و گه‌ریلا بكه‌ڤیته‌ د ده‌ستێ ده‌وله‌تا ترکیێ دا یان دێ هێتە زیندانكرن یان دێ هێتە بێ سه‌روشوون كرن، لێ گه‌ریلا و مالباتێن وان باوه‌رى و ئومێد هه‌بوون كو روژه‌كێ ژ روژان دێ ولاتێ وان سه‌ربخوە بیت و ئەو تێدە ئازاد و سه‌ربه‌ست ژین، لەوما ئه‌ڤ بریارا مه‌زن دایه‌، یانی ب كورتاسى گه‌ریلا ب خیزانێن خوە ڤە قەهرەمان و بەرخوەدێر و کوردستانپەروەرن، لێ سه‌ركردایه‌تییا پەکەکێ خیانەت لێ کریە و وان ژ بۆی تەئۆری و خەیالێن ئۆجالان و ب خوەدێ ناساندنا وی ددەنە کوشتن، سەرکردایەتیا پەکەکێ کو تەڤ فەرمانێن خوە ل “هۆبەلێ” ل ئیمرالیێ رازایی دستینن، نها جانێ جوانێ کورد فەدایی “براتیا ساختە یا گەلان” و “ئازادیا ئۆجالان” دکەن و هەر کو دچیت ژی گەلێ کورد پێتر وەکو کۆلە و گەلێ ترک ژی پێتر وەکو خوەدیێ کۆلەیان خوەیا دبن.

ل ده‌ستپێكێ ناڤێ هێزا چەکداری یا پەکەکێ ئانکو هێزێن گەریلایان  HRK ئانکو (هێزا رزگاریا كوردستانێ) بوو، گەلۆ نها ناڤێ ڤێ هێزێ بوویە چ؟

ل باكور ب ناڤێ YPSێ ئانکو (یەکیتیا پاراستنا سڤیل) هێزەک چێکریە.

ل رۆژئاڤا ب ناڤێ YPG ئانکو (یه‌كینه‌ێن پاراستنا گه‌ل) هێزەک چێکریە.‌

ل باشوور ب ناڤێ YBŞ (یه‌كینه‌ێن پاراستنا شنگارێ) هێزەک چێکریە.

ل داوییێ ژی تەڤ هێزێن خوە د بن ناڤێ HPG ئانکو هێزێن پاراستنا گەل دا کۆم کرینە، لێ بەلێ ب قاسی کو گەل ب نەخوەشی، کوشتن، دەربەدەری و وەنداهیان دایە، ئەو قاس گەل نەپاراستیە.

ل ڤڕ پرس ئەڤە: گەلۆ ناڤێ كوردستانێ، ناڤێ كورد و ناڤێ كوردستانا مه‌زن ل کودەرێ یە؟؟!!

ئانکو دەما مرۆڤ ل ڤان ناڤان مێزە دکەت، مرۆڤ دزانیت‌ كو ناڤێ كورد و كوردستانێ ل جه‌م سه‌ركردایه‌تیا پەکەکێ هاتیە قەدەغە کرن. ترکیا دبێژیتە کوردان، توركێن چیایی، ژبەرکو ناخوازن ناڤێ کوردان ب لێڤ بکەن، سەرکرداتیا پەکەکێ ژی ووسا دکەت، ناڤێ کوردستانێ د فەرهەنگا خوە دا دەرکریە و ولاتپەروەری و باسکرن ل دەولەتبووینا کوردان ب کەڤنەپەرستی ب ناڤ دکەت، بەلێ، ب ڤی ئاوا پشتی تەسلیمبوونا ئۆجالان و ڤەگەرا وی ژ بۆی ترکیێ، گوهەرین د ستراتەژیا پەکەکێ دا دروست بوویە، تەڤ گوهەرین ژی ب تەنێ ژ بۆی یەک ئارمانج بوویە، ئەو ژی پاراستنا ئۆجالان و زیندی کرنا میساقا مللی یا ترکیێ. ب ڤێ یەکێ پەکەکە ڤەگریا سەر راستیا دامەزراندنا خوە ل ئه‌نقەرەیێ‌، و راستیا ڤێ یەکێ کو ژ لایێ سازییا ئیستیخباراتیا ترکیێ ئانکو میتێ ڤە ژ بۆی ژناڤبرنا خەتا نەتەوی د ناڤا کوردان دا هاتیە دامەزراندن.

سالح موسلم ئەز و تو باش دزانین كو ده‌ستپێكا دامه‌‌زراندنا ڤێ ریخستنێ ژ بۆی چ ئارمانج بوویە، دێ میناكێن حاشاهەلنەگر ل بیرا ته‌ ئینم.

میناكا یه‌كێ: ل ده‌ستپێكا سالێن هه‌فتێیان دا، ل زانینگەها ئه‌نقەرێ‌ هندەک رێخستنێن قۆتابیێن كورد هاتنە دامەزراندن، ئارمانجا وان خزمه‌تکرنا پرسگرێکا كوردى بوو، هەمبەری ڤێ یەکێ هندەک قۆتابیێن ترک یێن نه‌ژادپەرێس لگەل عەڤدلا ئوجه‌لان دا هاتن رێخستنه‌كا قۆتابیێن ترك یێن چه‌پرەو دانان و ئارمانجا ڤێ رێخستنا چەپ یا ترکیێ ئه‌ڤە بوو كو دژاتیا رێخستنێن قۆتابیێن كورد بكەن و کارین زرارێن هەری مه‌زن ل وان رێخستنێن كوردی بدەن و ب پشتگریا ئیستیخباراتا ده‌وله‌تا توركیێ رێخستنێن نەتەوی یێن کوردی یەک ل پەی یەک تەسفیە کرن.

میناكا دویەمین:

تو باش فێم دکەی ل ده‌ستپێكا دامەزراندنا رێخستنا پەکەکێ، كه‌سێ یه‌كێ (كمال پیر)ێ ب نه‌ژاد ترك و ب فکر ماركسى بوو،

ل ده‌ما كه‌مال پیر دهێتە گرتن، دادوەر ژ وی دپرسیت: گەلۆ بۆچی تو وەکو كه‌سه‌ك ترك و ب هزرێن خوە چه‌پ خه‌باتێ ژ بۆی پرسگرێکا كوردى دكەى؟؟

کەس نەزانیت، تو باش دازنی کو کەمال پیر ب چ ئاوا پرسیارا دادوەرێ ترک بەرسڤ ددەت، لێ نه‌چارم ئەز ل بیرا ته‌ بینم. كمال پیر دبێژیت‌، ب چ ئاوا ئه‌ز ژ بۆی پرسگرێکا كوردی ناخەبتم، من باوه‌رى ب نەته‌وی بوونێ نینە، لێ من ناڤچەیێن كوردستنانێ و كورد هه‌لبژارتنه‌ ژبۆی ئارمانجا خوە یا سه‌ره‌كی کو ئه‌و ئارمانج ژی مرۆڤ بوونه‌، چه‌وا مرۆڤ ئەردەکی ب پیت ژ بۆ چاندنێ هەلدبژێریت داکو چاندنێ تیدا بکەت، ووسا من ژى جهێ كوردان و كورد ژ بۆی چاندنا هزرێن خوە هه‌لبژارتنه‌.

یا نها عەڤدلا ئوجه‌لان ژی دبێژیت‌، هەر ئەڤەیە یا کو ل ده‌ستپێكێ كه‌مال پیر گۆتیە دادوەرێ ترک. ب رامانەکا دی، كورد دبێژن ئه‌و واره‌ لێ نه‌ ئه‌و بوهاره‌ .