نه‌رینا په‌كه‌كێ بۆ پارچه‌یێن دی یێن كوردستانێ، نه‌رینا به‌لاشخۆری بۆ مێهڤانداری
د زانستێ زیندەوه‌رناسیێ دا چاوانییا پەیوەندییا د ناڤبەرا جانداران دا ب سەر چەندین جوران دا دابەش دبیت، دەما مرۆڤ ژ هێلا پەکەکێ و خواستەکێن پەکەکێ ل همبەر پارچەیێن دی یێن کوردستانێ دنێریت، پێناسا وی شێوازی ل بیرا مرۆڤان دهێت کو د زانستێ زیندەورناسیێ دا ژ بۆ چاوانییا پەیوەندییا د ناڤبەرا Parasite مفتخوەر و مێهڤاندار کرییە.
ل گۆر زانستێ زیندەوه‌رناسیێ پێناسا “مفتخوەر” ئەو جاندارن کو ل سەر جاندارەکی دی دژین کو ژێرە دبێژن مێهڤاندار، مفتخوەر ل سەر مێهڤانداری دژیت، لێ بەلێ ل بەرامبەر نە ب تەنێ چ مفایه‌كی ناگه‌هینیت مێهڤانداری، بەلکو زیانێ ژی دگەهینیتێ، گەر ل دیرۆکا پارتییا کارکەرێن کوردستانێ بنێرین، دێ بینین ئەڤ ریخستنە دگەل ڤێ یەکێ یه کو ل باکورێ کوردستانێ و ل سەر بژارده‌یێن به‌رده‌ست و هیزا ڤەشارتی یا وێ پارچه‌یا کوردستانێ و گەر سەرڤە سەرڤە ژی بیت ژ بۆ ئارمانجا تەکۆشینێ بۆ رزگارکرنا باکورێ کوردستانێ ل ژێر داگیرکارییا ترکیێ هاتییە دامەزراندن، لی بەلێ هەر ژ دەما هاتییە دامەزراندن پرانییا بار گرانییا وێ ل سەر ملێن پارچه‌یێن دی یێن کوردستانێ بوویە و پرانییا سەرمایە “کاپیتال” و هێزا مرۆڤی، مالییەتا خوە ژ رۆژهلات، باشوور و رۆژئاڤا کوردستانێ وەردگریت.
تشتێ بالکێش ئەڤه‌یه ل همبەر ڤێ هەموو خزمەتێ، ژ بلی زرار و زیانان، مالوێرانی، تەڤلیهەڤی و داگیرکاری زێدەتر نەبیت، چ دەستکەفتەک بۆ کوردێن رۆژهلات، باشوور و رۆژئاڤا کوردستانێ نەبوویە و ژ بۆ جارەکا ب تەنێ ژی کارەک یان هەلوەستەک نەبوویە کو کوردێن وان پارچەیان مفای ژێ وەرگرن.،ب کورتی هەر ل گۆر پێناسا زیندەوەرناسیێ، پەکەکە رۆلا مفتخوەر “Parasite” هەیە و پارچەیێن کوردستانێ ژی رۆلا مێهڤاندار کو ژ بلی کو پەکەکێ ب خودان دکن، نەچارن ب سەدەما وان راستی زیانان ژی ببن.
بەلگە ل سەر نەرینا مفتخوەرییا پەکەکێ ل همبه‌ر پارچەیێن دی یێن کوردستانێ پر زۆرن کو دبیت داوی هەڤدیتنا جەمیل باییکێ هەڤسەرۆکێ کەجەکێ ل سەر رۆژئاڤا کوردستانێ و لهەڤهاتنا پەترۆلی یا رێڤەبەرییا وێ پارچەیا کوردستانێ د گەل كۆمپانیایه‌كا ئەمەریکی وەک داوی میناک به‌حس بکه‌ین.
ب هێجەتا دژایەتیکرنا باییکی د گەل ئیرادەیا رزگاریخوازانە یا رۆژئاڤا کوردستانێ، ئەو ژی سەرباری وان هەموو باجێن کو رۆژئاڤا ل پێناڤی پەکەکێ داین و ژ بەر سیاسەتێن شاش یێن باییکی و رێڤەبەریا پەکەکێ تووشی مالوێرانی، داگیرکاری و دەربەدەربوونەکا زێدەتر بووینه، دێ هەول بده‌ین د چەندین گۆتاران دە په‌یوەندییا مفتخوەرانە یا پەکەکێ د گەل پارچەیێن دی یێن کوردستانێ زەلال بکه‌ین و ل دەستپێکێ ل گۆر رێکكەفتا دیرۆکی دێ ژ باشوورێ کوردستانێ دەست پێ بکه‌ین.
دەما ل سالێن نۆتان دا باشوورێ کوردستانێ ژ ئەنجاما خەباتەکا ب دەهان سالان یا ب خوین دخوەست بناغەیا ستاتۆیەکا سیاسی یا کوردستانی بدانیت، پەکەکە نە ب تەنێ هاریكار نەبوو، بەلکو ب هەموو هێزا خوە دەست هاڤێت دژایەتیکرنێ و یاکو د شیانێن وێ دا بوو ئەنجام دا ژ بۆ وێ یەکێ کو رێ نەدەت ئەو ستاتۆیا کوردی ئاڤا ببیت.
پەکەکە و رێڤەبەرێن وێ پر ب هێسانی هەموو ئەو خزمەت ژ بیر کرن کو کوردێن باشوورێ کوردستانێ دەرهەق وان دا ئەنجام داینه، ب بێ شەرمییەک زێدە ل دژی پێشمەرگەیێن وێ پارچەیا کوردستانێ دەست دا چەکی و چەندین سالان دگەل هێزێن سەرەکی یێن وێ پارچەیا کوردستانێ شەر کر، پەکەکێ شەر دکر، ژ بەر کو دامەزراندنا حکوومەت و پارلەمانتۆیا کوردی ب تاوان و زیانه‌كتا مەزن دزانی!
هەلبەت ئەڤ دەستکەفتا گرنگ یا کوردان د بەرینا داگیرکاران دا تاوانەکا مەزنە و زیان ژی ژ بۆ دەستهلاتا وان یا داگیرکار هەیە، لێ بەلێ چما پەکەکە وسا هزر دكه‌ت؟ ئەڤە پرسەکا زێده گرنگە و پێدڤییه هەر کوردەک دوور ژ حزباتیێ ل دووڤ پەرسڤا وێ بگەریت.
یاکو ئەم دبینین نها ژی باشوورێ کوردستانێ ژ بەر کو پەکەکێ ب خودان دکەت و بوویە مێهڤاندارا وێ پارتیێ، کەتییە بن ئێریشا هووڤ یا دەولەتا ترکیێ، ب دەهان گوند ب تەمامی هاتینە چۆل کرن و ب دەهان وه‌لاتیێن سڤیل ژبەر ئێریشێن ترکیێ و شەر و پەڤچوونان شەهید بووینە، نها ژی پەکەکە هەر ژ باشوورێ کوردستانێ هێزا خوە وەردگریت و د هەموو دیرۆکا خوە یا دامەزراندنێ ژی ژ بلی زیانان، بچووکترین مفا ژ بۆ ڤێ پارچەیا کوردستانێ نەبوویە.
