نه‌رینا په‌كه‌كێ ژ بۆ پارچه‌‌یێن دی یێن كوردستانێ، نه‌رینا به‌لاشخۆری بۆ مێهڤانداری – 5

نه‌رینا په‌كه‌كێ ژ بۆ پارچه‌‌یێن دن یێن كوردستانێ، نه‌رینا به‌لاشخۆری بۆ مێهڤانداری - 5
  • به‌شێ پێنجێ

هه‌ر وه‌ك‌ مه‌ باس كری، هه‌تا نوكه‌ ل سه‌ر ئازاره‌كا تایبه‌ت یا پارچه‌‌یێن كوردستانێ، په‌كه‌كێ چ گاڤه‌كه‌ نه‌هاڤێتییه‌ كو جهێ دلخۆشیێ بیت، لێ مه‌ ب چاڤێ خوه‌ دیت كو ل ئه‌ورۆپایێ بۆ هه‌ر خۆپێشاندن و كۆمبوونه‌كا كو په‌كه‌كێ داخواز دكری و پێدڤی پێ هه‌بوو، خه‌لكێ پارچه‌‌یێن دی یێن كوردستانێ بێ كو ئه‌ندامێن په‌كه‌كێ ژی بن، ب هه‌موو شیانان ئاماده‌ دبوون، ئه‌ندامێن پارتیێن یه‌كێتی، كۆمه‌له‌ و دیمۆكرات مه‌ دیتن كو پشتگری ل خۆ‌پێشاندانێن په‌كه‌كێ دكر، لێ جاره‌كا‌ ب ته‌نێ ژی مه‌ نه‌دیت كو په‌كه‌كێ پشتگری ل پرسا پارچه‌‌یێن دی یێن كوردستانێ كری و داخواز ژ ئه‌ندامێن خوه‌ كربیت كو پشتگریێ بۆ بدن و د خۆپێشاندانه‌كا‌ تایبه‌ت ب وان پارچه‌‌یان ڤه‌ به‌شدار بن، ئه‌ڤ هه‌موو گه‌نجێن ل رۆژهلات هاتنه‌ سێداره‌دان، سالانه د هه‌لكه‌فتێن بیرهاتنا كیمیابارانا هه‌له‌بجه‌ و ئه‌نفال و هه‌ژماره‌كا‌ دی یا هه‌لكه‌فتنێن باشوور دا‌، چالاكی ل ده‌رڤه‌ی وه‌لاتی دهێنه‌ ئه‌نجام دان، لێ په‌كه‌كه‌ نه‌ ب ته‌نێ به‌شداریێ تێدا‌ ناكه‌ت به‌لكو هه‌ولا گوهۆرینا ئاراسته‌یا وان چالاكییان ژی دكه‌ت‌، بۆ نموونه‌ پرسا ئێریشا داعشێ یا ل سه‌ر شه‌نگالێ و ئه‌و جینایه‌تا هۆڤ یا ل دژی كوردێن ئێزدی هاتییه‌ ئه‌نجام دان كو وه‌ك كارته‌كێ ژ بۆ مفا وه‌رگرتنا رێخستنا خۆ ب كار دئینیت و راستییان به‌ره‌ڤاژی دكه‌ت.

ل سه‌ر رۆژئاڤایێ كوردستانێ ره‌وش ژ ڤێ ژی خرابتره‌، په‌كه‌كه‌ نها ژی ب نه‌رینا ده‌مێ ئۆجالان ل دۆلا بیقاع، ل رۆژئاڤا كوردستانێ د نێریت، نوكه‌ ژی ب چاڤێ مێهڤانی ل كوردێن رۆژئاڤا د نێر‌یت، نوكه‌ ژی دهێته‌ گۆتن كو جه‌میل باییك ڤه‌گه‌ریایه‌‌ سووریێ و بریاره‌ ل وێرێ ئاكنجی ببیت، دیسان نه‌دووره‌ چاڤه‌رێیا دوریشما (باكور، باشوور، رۆژهلات) و ڤه‌ده‌ر كرنا رۆژئاڤا ژ بال په‌كه‌كێ ڤه‌ ببین، د راستی دا هه‌ڤدیتنا‌ تێله‌فزیوونی یا جه‌میل باییكی ل ده‌ربارێ رۆژئاڤایێ كوردستانێ و ب تا‌یبه‌ت بۆچوونێن وی یێن دژه‌ نه‌ته‌وه‌یی ل ده‌ربارێ رێككه‌فتنا ئالیێن كوردی یێن رۆژئاڤا و هه‌روه‌ها پرسا رێككه‌فتنا په‌ترۆلێ ل ناڤبه‌را رێڤه‌به‌رییا خوه‌سه‌ر و كۆمپانیایه‌كا ئامه‌ریكی و ڤه‌گه‌راندنا مافێ خودانبوونا په‌ترۆلا رۆژئاڤایێ كوردستانێ بۆ حكوومه‌تا سووریێ، بناغێ ئاشكه‌را‌ بوونا ڤێ بۆچوونێ یه‌ كو ده‌مه‌كێ درێژ بوو ل ژێر دوریشمێن جودا په‌چنی بوو و ئه‌مێن رۆژئاڤایی پێ خاپاندبووین.

ل دوماهیێ وه‌ك‌ گه‌نجه‌كێ رۆژئاڤایێ كوردستانێ كو من ده‌مه‌كێ‌ زێرین یێ ژیێ خۆ‌ بۆ رێزێن پارتییا كاركه‌رێن كوردستانێ و خزمه‌تا ڤێ رێخستنێ ته‌رخان كر و ل ده‌مێ خۆ ب باوه‌ر بووم كو خزمه‌تێ ب رزگارییا كوردستانێ دكه‌م، ژ گه‌نجان دخوازم كو بێی ده‌مارگیرییا حیزبی و ئایدۆلۆژی، جاره‌كا دی ب نه‌رینه‌كا‌ عه‌قلانه‌ و دوور ژ هه‌ستێن بێ بنه‌ما و بێ به‌لگه‌، جاره‌كا‌ دی ل شێواز و ئارمانجێن دامه‌زراندنا په‌كه‌كێ ب نێرن و ده‌ستكه‌فتێن ڤێ رێخستنێ بۆ كوردان بداننه‌ لایه‌كی و ل گه‌ل وێ زیان و ڤه‌رێژا كو ب ئه‌گه‌را په‌كه‌كێ راستی نه‌ته‌وه‌یا كورد و خاكا كوردستانێ بووی، همبه‌ر بكه‌ن.

ل وی ده‌می بریارێ بده‌ن، بزانن ئه‌ڤ رێخستنه‌ د راستی دا‌ بۆ خزمه‌ت كرنێ ب كوردان و رزگارییا كوردستانێ هاتییه‌ دامه‌زراندن، یان پرۆژه‌یه‌كێ سه‌خته‌ یێ داگیركه‌ران بوویه‌ و ژ بۆ ده‌رێخستنا ته‌ڤگه‌را نه‌ته‌وه‌یی یا كوردان ژ رێیا راست هه‌یه‌؟

بلا ل ده‌مێ هزر كرنا خۆ‌، ژبیر نه‌كین كو ل ده‌مێ دامه‌زراندنا په‌كه‌كێ، هێزا ڤه‌شارتی یا نه‌ته‌وه‌یه‌كێ ل باكورێ كوردستانێ په‌نگییا بوو و هه‌گه‌ر ب ئه‌گه‌رێ په‌كه‌كێ نه‌هاتبا كۆنترۆل كرن، بێ گومان دا شێت ب ساناهی ته‌خت و به‌ختێ ده‌وله‌تا ترك ب هه‌ژینیت‌.

بلا ل ده‌مێ هزركرنێ وه‌ك‌ گه‌نجێن پارچه‌‌یێن دی یێن كوردستانێ ئه‌ڤێ یه‌كێ ژبیر نه‌كین كو هه‌گه‌ر ئه‌و هێزا ل ڤان پارچه‌‌یان كه‌تییه‌ ل ژێر خزمه‌تا په‌كه‌كێ، ژ بۆ خه‌باتا پارچه‌‌یا مه‌ هاتبا ته‌رخان كرن و هه‌ڤده‌م هه‌گه‌ر ئه‌و تێچیوویێن ب ئه‌گه‌رێ په‌كه‌كێ ژ ڤان پارچه‌‌یان چووین نه‌بانه‌، چه‌ند هێز و شیانێن پۆزه‌تیڤ یێن نه‌ته‌وه‌یی ل ڤان پارچه‌‌یان دا زێده‌ بن، نموونه‌ هه‌گه‌ر باشوورێ كوردستانێ چه‌ندین سالان ب شه‌رێ ل گه‌ل په‌كه‌كێ نه‌هاتبا نه‌چار كرن و هه‌ر ب ئه‌گه‌را په‌كه‌كێ راستی شه‌رێ تركیێ و داگیركرنا به‌شه‌ك ژ ده‌ڤه‌رێن خۆ‌ ژ ئالیێ سوپایێ تركیێ نه‌بایه‌، نوكو ب هێزتر نه‌دبوو؟ هه‌گه‌ر رۆژئاڤایێ كوردستانێ ل پێناڤێ مامه‌له‌یه‌كا نه‌شیرین و گوماناوی ب په‌كه‌كێ نه‌هاتبا فرۆشتن و ب هێجه‌تا په‌كه‌كێ راستی داگیركارییا زێده‌تر یا تركیێ و شه‌ر و مالوێرانیێ نه‌بایه‌، ئایا كوردستان و ته‌ڤگه‌را رزگاریخوازا كورد دا مفای وه‌رگرت یان نه‌؟

ل رۆژهلاتا كوردستانێ ژی هه‌گه‌ر هێزا نه‌ته‌وه‌یی د رێیا پرۆژه‌یا سه‌خته‌ یا په‌كه‌كێ دا‌ ژ رێیا راست نه‌هاتبا دوورئێخستن و هه‌موو ژ بۆ هه‌مبێزا ریفۆرمێستێن فارس و كۆماریێن ترك نه‌هاتبا برن، هه‌گه‌ر په‌كه‌كه‌ ب گازییا ئیرانێ ل قه‌ندیلێ و ده‌ڤه‌رێن سنۆری یێن ناڤبه‌را باشوور و رۆژهلات دا نه‌هاتبا جێگیر كرن و رۆلێ وێ یێ تێكده‌ر نه‌بایه‌، ب راستی كوردان و ته‌ڤگه‌را نه‌ته‌وه‌یی یا كوردستانێ دا مفادار بیت یا نه‌؟

ب كورتی هه‌گه‌ر ب لۆژیك بخوازین بریارێ بدین، پێدڤییه‌ ئه‌ڤ راستییه‌ هه‌گه‌ر چ یا ته‌حله‌ ژی قه‌بوول بكه‌ین كو كوردستان بێ هه‌بوونا په‌كه‌كێ دا بهێزتر بیت، ته‌ڤگه‌را نه‌ته‌وه‌یی یا كورد دا پێشكه‌فتنه‌كا به‌رچاڤ ب خۆ‌ ڤه‌ بینیت و پارچه‌‌یێن دی یێن كوردستانێ هێزا وان یا هه‌ره‌ كێم ژی ب هه‌ده‌ر نه‌دچوو و پرسا وان ژ رێیا راست نه‌دهاته‌ ده‌رێخستن، ب وێ هیڤیێ ل پاشه‌رۆژێ خۆ‌ناسینا نه‌ته‌وه‌یا كورد بگه‌هیته‌ ئاسته‌كی كو داگیركار نه‌شێن ب رێیا پرۆژه‌یێن سه‌خته‌ و لاده‌ر یێن وه‌كی په‌كه‌كێ پرسا وان تووشی گرفتان بكه‌ن، هێز و شیان ب هه‌ده‌ر نه‌چن و ب ناڤێ براتییا گه‌لان ژ رێبازا راسته‌قینه‌ یا كورداتیێ دوور نه‌كه‌ن، ب وێ هیڤیێ رۆلێ به‌لاشخۆری یێ په‌كه‌كێ ل پارچه‌‌یێن دی یێن كوردستانێ بۆ هه‌تا هه‌تایێ ب دوماهی بهێت.