نەرینا پەکەکێ بۆ پارچەیێن دی یێن کوردستانێ، نەرینا بەلاشخۆری بۆ مێڤانداری-4

نەرینا پەکەکێ بۆ پارچەیێن دی یێن کوردستانێ، نەرینا بەلاشخۆری بۆ مێڤانداری-4
  • به‌شێ چارێ

هەر وەکە مە د سێ بەشێن رابووری دا ب کورتی باس کری، پارتیا کارکەرێن کوردستانێ د پەیوەندیێن خۆ د گەل پارچەیێن دی یێن کوردستانێ رۆلا بەلاشخۆر (parasite) دگێریت و ژ بلی دەردەسەری و مالوێرانیێ چ خێرەک ژ بۆ بەشن دی یێن کوردستانێ نەبوویە.

پرسیار ئەڤەیە کو پەکەکە بۆچی ل هەمبەر ڤان هەموو خزمەت و هاریکاری یێن پارچەیێن دی یێن کوردستانێ، ب ڤی رەنگی ب خرابی و بەلاشخۆری سەرەدەریێ دکەت؟ نهاژی دگەلدا بیت پەکەکە هەم ژ ئالیێ هەژمارێ ڤە هەم ژی ژ ئالیێ پێکهاتەیێ ڤە، پترترین و باشترین هێزێن وێ یێن مرۆڤی ژ پارچەیێن دی یێن کوردستانێ، ب تایبەتی رۆژئاڤا و رۆژهلاتێ کوردستانێ نە. گەر ل ناسنامەیا وان گەریلایان بنێرین کو جانێ خوە کریە قوربانی، پرانیا وان خەلکێ رۆژئاڤا و رۆژهلاتێ کوردستانێ نە، لێ بەلێ سەبەب چییە کو پەکەکە ل هەمبەر پرسێن سەرەکی یێن نەتەوی یێن پارچەیێن دی یێن کوردستانێ نە ب تنێ بێ دەنگە بەلکو د بەرژەوەندیا داگیرکەران دا تەڤ دگەریت؟

بێ گۆمان ژ بۆ بەرسڤا ڤان پرسیاران پێویستە پیچەکێ ب هوویری ل شێواز و سەدەمێن راستەقینە یێن دامەزراندنا پارتیا کارکەرێن کوردستانێ بنێرین. ل گۆر ئاخافتنا ئۆجەلان و جەمیل بایک وەکو دامەزرینەرێن پەکەکێ، دەولەتا ترکیێ و ب تایبەتی سازییا میتێ هەر ل دەستپێکا دامەزراندنا پەکەکێ چوونە د ناڤا ڤێ رێکخستنێ دا، و ئەڤ رێکخستن کۆنترۆل و ئاراستە کرییە. ب تایبەتی باس ل دو کەسان دهێتە کرن کو د دامەزراندنا پەکەکێ دا جیهـ دگرن و دبێژن کو ئەڤ کەسە ئەندامێن میتێ و هنارتیێن دەولەتێ بوون. ئەڤ دو کەسە ژی “نەجاتی کایا” یێ بەرنیاس ب “پیلۆت” و هەر وەها “کەسیرە یلدرم” بەرنیاس ب “فاتیما” بوون. فاتیما د دەستپکا دامەزراندنا پەکەکێ دا ژنا ئۆجەلان بوویە. “نەجاتی کایا” ژی ژ وان کەسان بوو کو د پرۆسەیا دامەزراندنا پەکەکێ دا رۆلەکێ بەرچاڤ هەبوویە و ئۆجەلان دبێژیت پرانیا کۆمبوونان ژ لایێ وی ڤە هاتینە رێخستن و تێچوونێن وان کۆمبوونان ژی هەر وی ب خۆ دانە، ب گۆتنا ئۆجەلان ئالاڤ و جهێ ژیانا ئۆجەلان ژی هەر ژ لایێ “نەجاتی کایا”ڤە هاتینە دابینکرن کو ئاپۆ دبێژیت ئەڤ پارە یێن میتێ بوون! گەر ب ئاوایەکێ دوور ژ پارتایەتیێ نڤیساندنێن ئۆجەلان و جەمیل بایک ل سەر فاتیمایێ و پیلۆت بخوینین دێ بۆ مە زەلال بیت کو پەکەکە ب هزر و بەرنامە و پارەیێ دەولەتا ترکیێ و سازییا ئیستیخباراتی یا میتێ ڤە هاتیە دامەزراندن و وەرار کرییە.

هەڤدەم ئۆجەلان ب خۆ دبێژیت: “ل سالا 1966ان حەتا 1978ێ من پشتا خۆ دابوو دەولەتێ، پشت هنگێ ل سالا 1977ێ حەتا 1978ێ پرۆسەیا دوورکەفتنا من ژ دەولەتێ دەستپێکر”. ب رامانەک دی ل دەما دانانا بەرنامەیا دامەزراندنا پەکەکێ دا ئۆجەلان ب خۆ ژی ب گۆتنا وی ب خۆ پشتا خۆ دابوو دەولەتێ.

ئانکو رێکخستنەک کو دامەزراندنا وێ ب ئاگەهداری و بەرنامەیا دەولەتا ترکیێ و سازییا ئیستیخباراتی یا میتێ بووبیت، بێ گومان د بنەرەت دا نەشێت ژ بۆ ئارمانجا رزگارییا نەتەوا کوردستانێ هەولان بدەت و پارێزگاریێ ل ماف و شووناس و کەرامەتا نەتەوی یا کوردان ل هەموو پارچەیێن کوردستانێ  بکەت.

ئەز دزانم کو ئەڤ راستیە چەند تەعلە، ژ بۆ من ژی گەلەک تەعلە کو بەشەک بەرچاڤ ژ ژیێ زێرینێ خۆ من د ناڤا ریزێن ڤێ رێکخستنێ و ژ بۆ خزمەتکرن ب بەرنامە و ئەجیندایێن ڤێ رێکخستنێ دەرباسکریە. ژ بۆ هەر کوردەکێ تەعلە و نەخوەشە کو هەست بکەت رێکخستنەک کوردی، پرۆژەیا داگیرکەرێن کوردستانێ بیت. نە ب تنێ ژ بۆ کوردان ژ بۆ هەر نەتەوەیەکا دی دەما رێخستنەک ب سلۆگانێن رزگارییا نەتەوەیی بهێتە مەیدانێ و هەژمارەک زیدە ژ کەسێن وێ نەتەوەیێ ل دەردۆرا خۆ کۆم بکەت و هێڤییان ژ بۆ وان دروست بکەت و د پێناڤی وان هێڤییان ب هەزاران گەنجێن وێ نەتەوێ جانێ خوە فیدا بکەن و وێ نەتەوێ ژ پێخەمەت دەستەبەرکرنا ئارمانجێن وێ رێکخستنێ ب سالان خوین ژێ چووبیت، لێ بەلێ پشتی هنگی ئاشکرا ببیت کو پرۆژەیەکا ساختەیە و داگیرکاران دروستکریە، بێ گومان ب وی رادەی تەعلە کو ژبیرکرنا وێ گەلەک ب زەحمەتە.

ئەز ب خۆ دزانم کو ئاستێ تەعل بوونا ڤی کەتواری هندە زێدەیە کو چ کەسەک حەز ناکەت قەبوول بکەت. لێ بەلێ قەبوولکرنا کەتوارەک دیرۆکی چەند حاشا لێ بهێتە کرن و پشت گوهـ لااإفث هاڤێتن، ب وى راده ژی ئێش و ژانا قەبوولکرنا وێ زیدەتر دبیت. ژبەر ڤێ چەندێ دەم هاتیە گەلی کوردستانی ب گشتی و گەنجێن کورد ب تایبەتی، ئێدی زیدەباری تەعل بوونا وێ لێ ڤی کەتواری قەبوول بکەن کو پەکەکە هەر ژ دەما هەیی ژ بلی زەرەر و زییان و مالوێرانی نەبیت چ دەستکەفتەک دی ژ بۆ پرسگرێکا نەتەوی یا کوردان نەبوویە. یا ژ ڤێ گرنگتر گەنجێن پارچەیێن دی یێن کوردستانێ پێویستە ڤێ راستیێ ببینن، یا کو پەکەکە دخوازیت ل بن ناڤێ بنیات و سەرەکی بوونا رزگارییا بەشا باکورێ کوردستانێ دا، پارچەیێن دی پشت گوهـ بهاڤێژغف، رهێن وێ ژ بۆ فەلسەفە و ئارمانجا دامەزراندنا پەکەکێ ڤەدگەريت.

بلا ئەم ژ خوە بپرسين بۆچی حەتا نها ل سەر ئێشەک تایبەت ب پارچەیێن دی یێن کوردستانێ پەکەکێ چ پێنگاڤەک نەهاڤێتیە کو جهێ دلخۆشیێ بیت. ئەز ب خۆ ل ئەورۆپایێ دژیم، دەمەک بەرچاڤ ژی من وەکو ئەندامەکێ پەکەکێ ل ڤێرە ژیان کرییە، حەتا نها من نەدیتیە پەکەکە د چالاکیەکا تایبەت ب کوردێن پارچەیێن دی یێن کوردستانێ دا بەشدار ببیت.

پوستێن ھەمان بەش