نەرینا پەکەکێ بۆ پارچەیێن دی یێن کوردستانێ، نەرینا به‌لاشخۆری بۆ مێھڤانداری
هەر وەک به‌ری نها مە ئاماژە پێ دای، نەرین و خواستەکێن پەکەکێ ل بەرامبەر پارچەیێن دی یێن کوردستانێ وەک په‌یوەندییا د ناڤبەرا به‌لاشخۆر (Parasite) و مێهڤانداری (Definitive) یە د زانستێ زیندەوەرناسیێ دا و هەرچەند پرانییا بارگرانییا پەکەکێ ل سەر ملێن پارچەیێن دی یێن کوردستانێ یە، لێ ژ بلی زه‌ره‌ر و زیانان چ خێرەک بۆ وان پارچەیێن کوردستانێ نەبوویە.
ل دەستپێکا چالاکیێن پەکەکێ و دەرباسبوونا ئۆجەلان بۆ ناڤ ئاخا سووریێ و پاش چوونا دۆلا بیقاع، هەرچەنده رۆژئاڤا کوردستانێ ل بن داگیرکارییا حکوومەتا دیمەشقێ بوو، لێ بێ کو مە زیدەگاڤییەک کربیت، ئەم دشێین ببێژن ژێده‌رێ سەرەکی یێ سامانێن مرۆڤی و دارایی یێ پەکەکێ، رۆژئاڤایێ کوردستانێ و گه‌نج و خەلکێ وێ پارچه‌یا کوردستانێ نە.
دارایی یێن دەستپێکی یێن پەکەکێ، بەرا کو دەست ب وەرگرتنا گۆمرک و ئەنجام دانا قاچاغیێن جودا بکەت، ژێده‌رێ خۆ ژ رۆژئاڤایێ کوردستانێ و وان هاریكارییان وەردگرت کو خه‌لكێ رۆئاڤا ب گشتی و ب تایبەتی دەولەمەندێن ڤێ پارچه‌یا کوردستانێ ددانه پەکەکێ، حاشایی لێ ناهێته کرن کو فیداکارترین ئەندام و گەریلایێن پەکەکێ ژ وان گه‌نجان پێک دهێن کو ژ بەشێن دی یێن کوردستانێ و ب تایبەتی ژ رۆژئاڤا کوردستانێ تەڤلی پەکەکێ دبن، ئەم دشێین ببێژین کوردێن رۆژئاڤا کوردستانێ ب سەر و مالێ خۆ ڤە کەتینە د خزمەتا پەکەکێ دا.
ل سەر دەمێ بوهارا ئەرەبی و کەلەجانا جەماوەری یا خەلکێ سووریێ ل دژی حکوومەتا داگیرکەر و زالما بەشار ئەسەدی، دەلیڤەیەک زێرین بۆ کوردێن رۆژئاڤا ساز بوو کو پشتی چەندین سالان ژ داگیركاریێ و سته‌مێ، پشتی چەندین سالان ژ ئینکار کرنا ناسنامه‌یا، بشێن ل سەر ئاخا خۆ ب شوناسییەکا کوردی و ب ئازادی و سەربەستی بژین، لێ جهێ داخێ یە ئەڤ دەلیڤە بوو فەدایا مامەلەیەکا د ناڤبەرا پەکەکێ دگەل وەلاتێن ئیرانێ و سووریێ دا و سوپایێ بەشار ئەسەدی رۆژئاڤایێ کوردستانێ وەک ئێمانەتەک دا دەستێ پەکەکێ داکو بشێت ب هێزەکا زێدەتر کەلەجانا جەماوەرییا وێ ژناڤ ببەت.
هەرچەند ب گه‌هشتنا پەکەکێ هەژمارەک ژ رێبەرێن کورد یێن رۆژئاڤایێ کوردستانێ هاتن تیرۆر کرن، بارەگەهێن پارتیێن نەتەوه‌یی هاتنه سۆتن و یێن نه‌گۆتینه په‌كه‌كێ “بەلێ” ل رۆژئاڤا ب دارێ زۆریێ هاتنه دەرێخستن، لێ دیسان ژی کوردێن رۆژئاڤا هیڤییا کو پەکەکە جارەکا دی ڤەگەریته سەر رێیا راست، ژ بۆ ئاخا خۆ خوین دا و خۆ کره قوربانی.
جهێ داخێ یە پەکەکە ب هندەک کارێن وەک کارێن زارۆکان وەک بلندکرنا ئالایێ خۆ و وێنەیێن ئۆجەلان ل رۆژئاڤا کوردستانێ و ب تایبەتی ل ناڤچەیێن سنۆری، هێجەت دانه دەستێ حکوومەتا فاشێستا ترکیێ داکو ئێریشی رۆژئاڤا بکه‌ت، ل دەمێ ئێریشێن حکوومەتا ئەنقەرێ ل جهێ کو هزرا خۆ بکەت و گوهێ خۆ بدەت رێنمایێن خەلکێ بسپۆر و وه‌لات پارێز، دەست هاڤێت گەف كرنێن بێ بنه‌ما و راگهاند ئەم دێ ستەمبۆلێ كه‌ینه ئاگر و وەک هەرجار دوریشمێن ئاگرین و بێ ئەنجام بلند کرن، لێ ترکیا هات و بەشەک ژ ئاخا رۆژئاڤایێ کوردستانێ داگیر کر و چەتەیێن دووڤەلانکێن خۆ ژی ل وێرێ جێگیر کرن و پەکەکە نه‌شیا خوە تەقتەقۆشکەکا زارۆکان ژی ل ستەمبۆلێ بتەقینیت!
پاش ب ئه‌گه‌رێ پەکەکێ چەندین ناڤچەیێن دی یێن رۆژئاڤایێ کوردستانێ هاتنه داگیر کرن، نها کوردێن رۆژئاڤا خه‌باتێ دکه‌ن، یا کو د دەست دا مای بپارێزن و پێگەهێ خۆ تێدا بهێز بکه‌ن داکو ل پاشەرۆژێ بشێن ناڤچەیێن ژ دەست چوویی ژی جارەکا دی ب دەست بێخن، لێ ژ بەر کو دخوازن شوناسییا نەتەوه‌یی یا رۆژئاڤا ب خەباتا خۆ بده‌ن و وەک کوردستانا رۆژئاڤا ناخوازن جارەکا دی چارەنڤیسێ وان ببیته قوربانییا دەستێ سیاسەتێن شاش یێن پەکەکێ، لێ ڤێ پارتیێ پشتی کو هنده ئەڤ پارچه‌یا کوردستانێ کرییه قوربانییا بەرژەوەندی و خواستەکێن خۆ یێن حزبی، چاڤێ وان ل وێ یەکێ یە ئەو ئارامییا نها هەیی ژی ژ ناڤ ببه‌ن.
پەکەکە و رێڤەبەرێن وێ ل سەر رێككه‌فتنه‌كێ کو کوردێن رۆژئاڤا دگەل كۆمپانیایه‌كا ئەمه‌ریکی یا تایبەت ب پەترۆلێ ئیمزا کری و دخوازن ب وێ رییێ داهاتەکی ب دەست خۆ ڤە بینن و رۆژئاڤایێ کوردستانێ پێ ئیدارە بکه‌ن و ژ نوو ڤە ئاڤەدان بکه‌ن، تەڤلیهەڤییەک چیکرییە و هەڤسەرۆکێ کەجەکێ دبێژیت ئەڤ یەک خیانه‌ته ل حکوومەتا سووریێ، جەمیل باییک وەختە سه‌را بەشار ئەسەدی زکێ رێڤەبەرێن رۆژئاڤا بدرینیت.
ل همبەر ڤان هەموو دەردەسەری و کاڤلکاریێن کو رۆژئاڤایێ کوردستانێ ب ئه‌گه‌را پەکەکێ ب خۆ ڤە دبینیت، ڤێ پارتیێ چ مفایه‌ك ژ بۆ ڤێ پارچەیا کوردستانێ هەبوویە؟ بلا ئەم وەکە کورد و کوردستانی بێ چ دەمارگیرییەکا حزبی، ل بەرسڤا ڤان پرسیاران بگەرین، بلا ئەم په‌یوەندییا پەکەکێ دگەل رۆژئاڤا هەمبەر بکه‌ین دگەل وێ پێناسا زانستی کو زانستا زیندەوه‌رناسیێ بۆ په‌یوەندییا د ناڤبەرا به‌لاشخۆر و مێهڤاندارای دا کری، وی دەمی دێ بۆ مە ئاشکرا بیت د ژینگەهێ دا چ به‌لاشخۆره‌ك هندی کو دەستکەفت ژ مێهڤانداری گه‌هشتینێ، هنده زه‌ره‌ر و زیان بۆ مێڤاندارێ خۆ نەبوویە.
