نه‌رینا په‌كه‌كێ بۆ پارچه‌یێن دی یێن كوردستانێ، نه‌رینا به‌لاشخۆری بۆ مێهڤانداری-3
نه‌رینه‌كا بله‌ز ل ده‌ربارێ چاوانییا په‌یوه‌ندیێن ناڤبه‌را په‌كه‌كێ و پارچه‌یێن دی یێن كوردستانێ، ب ته‌ڤاهی ده‌ردكه‌ڤیت كو كوردێن رۆژئاڤا، باشوور و رۆژهه‌لاتا كوردستانێ ب خوین، خوه‌هـ و به‌ریكا خۆ و … ب كورتی وه‌ك ب كوردی دبێژن ب سه‌ر و مالێ خۆ هاریكارییا پارتییا كاركه‌رێن كوردستانێ كرییه و هه‌ر ژ ده‌ستپێكا دامه‌زراندنا وێ پارتیێ مێهڤاندارییا وان كرییه، ئه‌و ئێخستینه سه‌ر پێیان، قه‌لو كرینه و پشته‌ڤانی لێ كرینه، لێ ل همبه‌ر، پارتییا كاركه‌رێن كوردستانێ وه‌ها دیاره كو ب شوورێ دژه كوردستانێ خۆ راپێچایه.
ژ بلی مالوێرانی، خیانه‌ت و قرێژێ نه‌بیت، چ تشته‌كێ دی بۆ ڤان پارچه‌یان نه‌بوویه، هه‌ر وه‌ك مه به‌حس كری، په‌یوه‌ندییا په‌كه‌كێ ل همبه‌ر پارچه‌یێن دی یێن كوردستانێ وه‌ك په‌یوه‌ندییا ناڤبه‌را به‌لاشخۆر “ئه‌نگه‌ل” (Parasite) و مێهڤانداری “Definitive” د زانستێ زینده‌وه‌رناسیێ دا دهێته هه‌ژمارتن و 3 پارچه‌یێن كوردستانێ وەک مێهڤاندار كو ژ بلی نه‌هامه‌تی و نه‌خۆ‌شیێ نه‌بیت، چ خێره‌ك ژ په‌كه‌كه یا به‌لاشخۆر نه‌دیتینه.
پاش كو رژێما ئیرانێ رێككه‌فتنه‌كا ستراتیژی د گه‌ل په‌كه‌كێ ئیمزا كری و ئه‌ڤ رێخستنا كوردی بوویه به‌شه‌ك ژ پرۆژه‌یێ ناڤچه‌یی كو ئیران، سووریا و حزبوللا یا لبنانی و حه‌ماس و جیهادا ئیسلامی یا فه‌له‌ستینی و كۆمه‌له‌یه‌كا رێخستنێن دی یێن پاشكو بۆ رژێما ئیسلامی كار ژ بۆ كری و ل پێناڤێ ڤێ به‌شه‌ك ژ هێزا په‌كه‌كێ ل سنۆرێن رۆژهه‌لاتا كوردستانێ هاتن ب جهـ كرن، رۆژهه‌لاتا كوردستانێ ب دله‌كی پر به‌رفرهـ هاریكارییا په‌كه‌كێ ده‌ستپێكر، گه‌لێ رۆژهه‌لات نان ژ ده‌ڤێ زارۆكێن خۆ ده‌ردئێخست و ب ده‌ڤێ په‌كه‌كه‌ییان دا دكر و رێخستنێن نه‌ته‌وه‌ی یێن ڤی به‌شێ كوردستانێ كو دیرۆكه‌كا خه‌باتێ هه‌بوو ژبلی راوێژا له‌شكری، چه‌ك و ته‌مه‌نیێن خۆ ژی پێشكێشی په‌كه‌كێ كرن، دیارترین هاریكاری ژی یێن كۆمه‌لێ بوون بۆ پارتییا كاركه‌رێن كوردستانێ.
لێ جهێ داخێ یه رۆژهه‌لاتا كوردستانێ هه‌ڤشێوه‌یێ باشوور و رۆژئاڤا وه‌لات ژ قرێژ و خیانه‌تا په‌كه‌كێ بێ به‌هر نه‌بوو، په‌كه‌كه یا به‌لاشخۆر ل جهێ ڤان چاكی و وان هه‌موو هاریكارییا، ده‌ست ب لێدانا دیرۆكا خه‌باتا رۆژهه‌لات كر!
رۆژهه‌لات ل گه‌ل وێ كو یه‌كه‌م حكوومه‌تا مودێره‌‌ن یا كوردی (كۆمارا كوردستان) تێدا هاتبوو ئاڤا كرن و به‌شه‌ك ژ سه‌مبولێن نه‌ته‌وه‌ی یێن كورد وه‌ك (ئالایێ كوردستانێ، پێشمه‌رگه و سوپایێ مللی یێ كوردستانێ و ..) ب خه‌باتا رۆژهه‌لاتا كوردستانێ ب پشتگرییا خه‌با‌تگێرێن به‌شێن دی ب تایبه‌ت یێن باشوورێ كوردستانێ هاتبوون ب ده‌ست ئێخستن، ئه‌ڤ سه‌مبولێن نه‌ته‌وه‌ی ژ بال په‌كه‌كێ ڤه هه‌ولا ژ ناڤ برنا وان هاته كرن، ئالایێ كوردستانێ كو د كۆمارێ دا هاتبوو هه‌لدان و پاش ژ ناڤ برنا كۆمارێ وه‌ك ئه‌مانه‌ته‌ك بۆ ده‌ستێن ئێمن یێن بارزانی هاتبوو سپارتن، ژ بال په‌كه‌كێ ڤه هات نه‌شرین كرن و ئالایه‌كێ دی ل جهێ وی چێكرن كو پتر نێزیكی ئالایێن ولاتین ئه‌فریقی یه ژ كو نێزیكی ئالایێ كوردستانێ بیت.
ئیدیه‌ما پێشمه‌رگه گوهارتن و ل جهێ وێ گه‌ریلا بكارئینا و د په‌روه‌ده و نڤیسێن ئیدۆلۆژی یێن خۆ دا تشتێ خێرێ ل ده‌ربارا پێشه‌وا قازی محه‌مه‌د نابێژن و كێمترین ئاگاهی ژی ل ده‌ربارا وی نینه.
بۆ نموونه د ڤیدیۆیه‌كێ دا كو ژ بال په‌كه‌كێ ڤه هاتییه به‌لاڤ كرن، وه‌ختێ عه‌لی قازی یێ كوڕێ پێشوا سه‌ره‌دانا په‌كه‌كێ دكه‌ت و ئۆجالان به‌حسێ قازی محه‌مه‌دێ سه‌رۆك كۆمار دكه‌ت، ب ته‌مامی وه‌ها ده‌ردكه‌ڤیت كو ئاپۆی چ ئاگاهی ل سه‌ر پێشه‌وا نینن و چ رێزه‌كێ ژی بۆ ناگریت.
وه‌ختێ كوردێن رۆژهه‌لات ڤه‌گه‌راندنا ئۆجالان بۆ تركیێ شه‌رمه‌زار كری، د خوه‌پێشاندانه‌كه جه‌ماوه‌ری دا وان داخوازیێن خۆ یێن نه‌ته‌وه‌ی دیار كرن، ل وی ده‌می په‌كه‌كه پتر ژ رژێما ئیسلامی یا ئیرانێ دلگران بوو، رێبه‌رێن په‌كه‌كێ ب ئه‌نیێن گرێ ڤه گه‌لێ سه‌رهلدێر ب كۆله‌یێن ئه‌مه‌ریكا، ئیسرائیل و كه‌مالیزمێ ناڤ كرن.
وه‌ها دیاره خیانه‌تێن په‌كه‌كێ ل همبه‌ر رۆژهه‌لات نه‌ئێك و دوو نه، ڤه‌گوهاستنا كادر و رێبه‌رێن ئاگرێ سۆر، ته‌قه كرن ل تیمه‌كا یه‌كێتییا شۆرشگێران كو نها ناڤێ وان ژ بۆ پارتییا ئازادییا كوردستانێ هاتییه گوهه‌رین و شه‌هید كرنا ده‌هان پێشمه‌رگه‌یێن ڤێ پارتیێ، شه‌هید كرنا پێشمه‌رگه‌هێن دیمۆكرات و هه‌ولدان بۆ رێگریكرنێ ل سه‌رهلدانا رۆژهه‌لات و راپۆرت دان ل ده‌ربارا چالاكیێن له‌شكری یێن حزبێن رۆژهه‌لات ب كۆمارا ئیسلامی یا ئیرانێ و تیرۆر كرنا كاسبكارێن رۆژهه‌لات كو دوماهی ئێك تیرۆر كرنا سامان دانشوه‌ر و سۆران ئه‌خته‌ر سه‌مه‌ر ل ناوچه‌یا هه‌وارمانێ و ره‌ڤاندنا زارۆكان ژ پرانییا ده‌ڤه‌رێن رۆژهه‌لات، به‌شه‌كێ دی یێ خیانه‌یا په‌كه‌كێ یه ل دژی رۆژهه‌لاتا وه‌لات.
یا راست هه‌گه‌ر په‌كه‌كێ رۆلا “ئه‌نگه‌ل” ی بۆ رۆژهه‌لاتا كوردستانێ نینه، چ ئیدیه‌مه‌كا زانستی دشێت ئه‌ڤێ هه‌موو خزمه‌تا رۆژهه‌لات و هه‌ڤده‌م ڤێ هه‌موو خیانه‌ت و قرێژا په‌كه‌كێ پێكڤه د چارچووڤه‌یا پێناسه‌یه‌كێ دا كۆم بكه‌ت؟
هەرچەند کو کوردێن رۆژهەلاتێ کوردستانێ رۆژ ب رۆژ پتر پەکەکێ و مەبەستێن وێ یێن دژه نەتەوی ناس دکه‌ن و ب دەهان کەمپین ل دژی هەبوونا ڤێ رێخستنێ ل رۆژهه‌لاتێ کوردستانێ هاتینە ساز کرن، لێ گه‌نجێن میراتگرێن کۆمارا کوردستانێ و رێبازا پێشەوا قازی محەمەد، پێدڤییه ژ ڤێ یەکێ هۆشیارتر بن کو پەکەکە بکاریت وەک به‌لاشخۆری خوین و هێزا نەتەوه‌یی یا رۆژهه‌لاتێ کوردستانێ ل پێناڤی کۆمارا ترکیێ ل بن ناڤێ “براتییا گەلان” و هەروەها ل پێناڤی پرۆژەیا هیلالا شیعی یا ئیرانێ دا ب هەدەر بده‌ت.
