رەفتارێن ب گومان یێن پەکەکێ ل همبەر خۆپێشاندانێن ئیرانێ-1
د یەکەم سالڤەگەرا ڤان خۆپێشاندانان دا، دخوازین د چه‌ند گۆتاران دا، رەوشا رۆژهه‌لاتێ کوردستانێ ب گشتی و هەلوەستێن پەکەکێ ل همبەر ڤان خۆپیشاندانا و خوەپیشاندانێن بەری نها یێن گەلێن ئیرانێ و رۆژهه‌لاتا کوردستانێ، ل دژی رژێما ئیرانێ ب تایبەتی، شرۆڤە بکه‌ین.
پاییز و زڤستانا سالا رابووری، پێلەکە بەربەلاڤ یا خۆپێشاندانێن گەلێن ئیرانێ ل دژی رژێما ئیسلامی یا تەهرانێ، ده‌ستپێكر ب به‌هانه‌یا ب بوهابوونا نرخا بەنزینێ و پشتره ئێخستنا بالەفرەکا ئۆکراینی و جان ژ دەست دانا 176 کەسان و هەڤدەم هەولێن رژێمێ ژ بۆ شێلی کرن و ڤەشارتنا راستییان و درەوێن رایەدارێن مەزن یێن ئیرانێ و دەزگەهێن چاپەمەنیێ یێن سەر ب دەستهه‌لاتێ د ڤێ مژارێ دا، پرانییا پارێزگەهێن ئیرانێ و رۆژهه‌لاتێ کوردستانێ ب خوە ڤە گرتن.
سلۆگانێن خۆپێشاندەران و سۆشیال مەدیایێ ئاشكرا کر کو خۆپێشاندانێن پاییز و زڤستانا رابووری، ب هەڤبەر کرن دگەل یێن بەرا وێ، پێگەهشتی تر، ریخستی تر و ئارمانجدارتر بوو، ڤێ یەکێ ژی خه‌ته‌ره‌ك په‌یدا كر و هەڤدەم ژانا وێ ژ بۆ رایەدارێن رژێما ئیسلامی یا ئیرانێ ب ئێشتر بوو، ڤان خۆپێشاندانان دەستپێکێ ل باژارێ ئۆرمیێ و پشترە ل سنە و کرمانشان، 3 باژارێن مەزن یێن رۆژهه‌لاتا کوردستانێ ب ئاوایەکی بەرچاڤ ب رێڤە چوون.
ژ ئالیێن جودا، جودا شرۆڤە ژ بۆ ڤان خۆپێشاندانان هاتییە کرن، هەیا نها چەندین گۆتار و لێکۆلین ل سەر هاتینە پارڤەکرن و هەر هەموو تەکەزێ ل سەر ڤێ یەکێ دکه‌ن کێنج و گرنگییا وان خۆپێشاندانان ب رادەیەکی بوو کو گەر ڤیرۆسا کۆرۆنایێ نەبایە، دبیت هەیا نها دیسان هندەک كۆمبوونێن جەماوەری ل دژی رژێما ئیرانێ هاتبان کر، هەڤدەم د نها دا ژی ترس ل جەم رژێمێ پەیدا بوویە کو گەل د بیرئانینا وان خۆپێشاندانان دا بهێنه سەر جاددەیان و ئەڤجارە داویێ ب دەستهلاتا رژێمێ بینن، ژ بەر ڤێ یەکێ ژ بۆ ئاستەنگکرنا تەقینا ڤێ نەرازیبوونا خەلکێ یاکو پێویست بوو رایەدارێن ئیرانێ ژ بۆ بێدەنگکرنا دەنگێ جاددەیێ، ئەنجام دایە.
د دەمەکی دا کو نەرازیبوون ل دژی رایەدارێن مەزن یێن کۆمارا ئیسلامی یا ئیرانێ رۆژ بۆ رۆژێ زیدەتر دبن و رۆژهه‌لاتێ کوردستانێ ل رێزا پێشیێ یا وان خۆپێشاندانان بوویە و پێتر ترین خوین ژ بۆ هەرفاندنا کۆمارا ئیسلامی دا، یا بالكێش هەلوەستا پارتییا کارکەرێن کوردستانێ یە.
پەکەکە د رەوشەکی دا خۆ ب قەیۆما هەر 4 پارچەیێن کوردستانێ دده‌ته نیاسین و هەموو ئالیێن ناسیۆنالیست یێن وان پارچەیان دوور دئێخیت، هەلوەستێن وێ ل همبەر خۆپێشاندانان ب رادەیەکی نە زەلال و شێلی و د هەمان دەم دا ل دژی گەلێ کوردن کو مرۆڤ ل راستی ب گومانێ دهێت، کریارێن پەکەکێ ل همبەر ڤان خۆپێشاندانان گەلەک جاران د بەرژەوەندییا رژێما ستەمکارا کۆمارا ئیسلامی یا ئیرانێ دا بوویە، باشترین میناک خۆپێشاندانێن پاییزا رابووری بوو کو ب دەهان هەموەلاتیێن رۆژهه‌لاتێ کوردستانێ تیدا شەهید و بریندار بوون و ب سه‌دان کەس ژی هاتنه بنچاڤ کرن و ئه‌شکەنجەدان کو هەژمارەژک ژ وان د بن ئه‌شکەنجەیان دا شەهید بوون و بەشەکی دی هەیا نها د زیندانێن تاری یێن ئیرانێ دا نە.
هەر وەکە ئاماژە پێ هاتە دان یه‌هانه‌یا خەلکێ ژ بۆ خۆپێشاندانێن سالا رابووری، بلند بوونا بوهایێ بەنزین و خستنەخوارا بالەفرا ئۆکراینی و کوشتنا 176 رێڤینگێن وێ بالەفرێ بوو ژ بال سپایێ پاسداران ڤە و پشترە حاشاکرن و خەبات ژ بۆ ڤەشارتنا وێ بوویەرێ ژ بال رایەدارێن رژێمێ ڤە، ئانکو رژێمێ ل ژێر ناڤێ تۆلهلدانا ل دژی کوشتنا قاسم سولەیمانی چەند مووشەک ئاراستەی ئیراقێ و هەرێما کوردستانێ کرن و ل گۆر گۆتنا فەرماندارێن سپایێ پاسدارێن ئیرانێ ژبەر ترسا وان ل بەرسڤا ئەمەریکایێ بالەفرا رێڤینگا ل بەر چاڤێن وان بوو ب مووشەکەکا کرۆز و ئێخست.
تشتی بالكێش داخویانییا کەجەکێ یە ل سەر کوشتنا قاسم سولەیمانی، د ناڤا ریزە نڤیسینێن پەکەکێ د ڤێ داخویانیێ دا ب زەلالی باندۆرا ئیرانێ ل سەر ڤێ ریخستنێ دیار دبیت، د داخویانییا نڤیسکی دە باس ل شەرێ جیهانی هاتبوو کرن، دیارە رێخستنەکە دی یا کوردی یا هەڤپەیمانا کۆمارا ئیسلامی و ئالیگرێن دی یێن رژێمێ ژی ئەڤ دەستەواژە بکار ئینابوون، دەستەواژەیا شەرێ جیهانی ب وێ واتەیێ کو ئیران زلهێزەکا جیهانی یە و ل همبەر وێ “سته‌ما” ئەمەریکایێ لێ کری، بێدەنگ نابیت و دێ دنیایێ ل سەر ئەمەریکایێ خەراب بکەت و ئیسرائیلێ ژ ناڤ ببه‌ت! ب ڤێ یەکێ ژی دێ شەرێ جیهانی یێ سێیەمین روو ده‌ت، لێ بەلێ، پشترە دەرکەت کو رایەدارێن پەکەکێ یان دەستهلاتدارێن ئیرانێ ب راستی ناس نەکرینە و ژ شیانێن وان بێ ئاگەهن و ب باوەرا وان ب درەوێن کۆمارا ئیسلامی یا ئیرانێ دهێت، یان ژی دخوازن و ل هیڤییا وێ یەکێ نە کو ئیران هند بهیز بیت کو زلهێزەک هەڤالێ وان یێ ستراتیژی بیت، یان ژی ئەڤە کو جیهانا وان ئەو قاس بچووکە کو پشتی دەمەکی کورت ژ کوشتنا قاسم سولەیمانی ب دەهان هەزار کەس ل ولاتێ ئیرانێ هاتن سەر جادەیان و راگهاند ئەو بکوژ بوویە، وێ شەرەکی جیهانی روو بده‌ت.
پشتی دەستپێکرنا خۆپێشاندانان ئەو کەسێن کو بەرنیاسن و ب لیدەرێن رێخستنێن پەکەکێ ل ئیرانێ و رۆژهه‌لاتێ کوردستانی تێن هه‌ژمارتن ل جهێ کو ب ئاوایەک جددی کار ل سەر وان خۆپێشاندانان بکه‌ن، خوە ب تشتێن بێ بوها و روودانێن بچووک ڤە مژوول کر. هەر وەها هەول دا ب ڤەشارتی نا راستەراست خەلکێ بێ هێڤی بکه‌ن.
د راستی دا ئەڤ بێ هەلوەستی و خوە شاشکرنا پەکەکێ بوو بناغەیەک ژ بۆ نڤیساندنا ڤێ نڤیسێ، ژبەرکو جارا یەکەمین نینە کو پەکەکە ب ڤی ئاوایی ل سەر وان روودانێن کو ب ئاوایەک جددی خەتەرەیێ دئێخن سەر کۆمارا ئیسلامی هەلوەستەک نه‌زه‌لال و ب گومان دیار دکەت. ئەڤه ژی ب تایبەت ئەڤ لڤ و تەڤگەرێن ل پاییز و زڤستانا رابووری کو ب سلۆگان و تەخێن بەشدار د خۆپێشاندانێ دا دیار بوو کو ژ خوەپێساندانێن بەرێ رێكخستیتر، رادیکالتر، سیاسیتر و جدیتر بوو و هەرچەند نەبوونە ئه‌گه‌را ژناڤبرنا رژێما ئیسلامی یا ئیرانێ، لێ بەلی بێ گومان بناغەیەک ب هێز و باش دروست کر ژ بۆ کو گاڤێن ژناڤبرنا رژێما ئیسلامی یا ئیرانێ ل سەر بهێته ئاڤاکرن، ژ بەر ڤێ یەکێ هەول دهێته دان ب ئانالیزەیەک کوورتر ژ بۆ کار و کریارێن پەکەکێ ل همبەر خۆپێشاندانێن پاییزا رابووری، شرۆڤەیا پۆلەتیکایێن ڤێ رێخستنێ ل همبەر ئیرانێ و رۆژهه‌لاتێ کوردستانێ بهێنه کرن.
ئەڤێ مژارێ به‌رده‌وامی هه‌یه
