رەفتارێن ب گومان یێن پەکەکێ ل بەرامبەر خوەپێشاندانێن ئیرانێ-6

رەفتارێن ب گومان یێن پەکەکێ ل بەرامبەر خوەپێشاندانێن ئیرانێ-6

چەندین فاکتەرێن ب هێز هەنە کو ئیسبات دکەن ئەندیشدارییا پەکەکێ ل پاشەرۆژا خوە ل رۆژهلاتێ کوردستانێ، لۆژیکی نە. یا یەکێ ئەڤەیە کو بەرەڤاژی رۆژئاڤا، ل رۆژهلاتێ کوردستانی ریخستنێن نەتەوی یێن وەها هەنە کو ب هەزاران شەهید ل رێیا رزگارییا نیشتیمانی دا دانە و ریهێن خوە ئەو قاس د ناڤا کوراهییا خاکا کوردستانێ دا برینە خوارێ کو کۆمارا ئیسلامی یا ئیرانێ ب هەموو هێزا خوە ڤە نکاریت وان ژناڤ ببە و بێ گومان پەکەکە ژی نکاریت. هەرچەند قوت بوون د ناڤا وان رێخستنان دا دروست بوویە لێ بەلێ هەموو بالێن وان رێخستنان ل دژی پەکەکێ یەک هەلوەست هەیە. هەڤدەم ڤان رێخستنان ب هزاران پێشمەرگە هەنە و ژ بلی ڤێ ژی ب دەهان هزار کەس ل گەلێ رۆژهلات هەنە کو بوونە پێشمەرگە و پەروەردەیا سیاسی و لەشکری دیتینە پشت را ب سەدەمێن جودا ڤەگەرینە رۆژهلات کو ئەڤە ژی وەکو هێزا ڤەشارتی یا ڤان رێخستنان دهێتە هەژمارتن و دکارن د پاشەرۆژێ دا مفا ژ وان بهێتە وەرگرن. ژ بلی ڤێ ژی یەکەم حکوومەتا مۆدەرن یا کوردی (کۆمارا کوردستانێ) ل رۆژهلاتێ کوردستانێ هاتیە ئاڤاکرن، ڤێ ژی ئاستا خوەناسینا نەتەوی ل رۆژهلات دا هندە بلند کریە کو پەکەکە نکاریت وان بخاپینیت.

ژ بلی کۆمارا کوردستانێ و پێشەوا قازی محەمەد کو بوونە سەمبۆلێن هەموو کوردان، هەژمارەک ژ رێبەرێن دی ل رۆژهلاتێ کوردستانێ یێن بووی سەمبۆل و هەر یەک ژ وان ژ لایێ بەشەک ژ جڤاکا رۆژهلات حەتا ئاستا پەرستنێ رێز لێ دهێتە گرتن و هزرێن وان وەکو رێبازا پاشەرۆژا خەباتا خوە دبینن. پەکەکە نکاریت ڤان سەمبۆلا کێم رەنگ بکەت.

دیارە پەکەکێ ب ئاوایەکی نهێنی ھندەک خەون ژ بۆ پاشەرۆژا ئیرانێ و رۆژھلاتێ کوردستانێ ھەنە

تایبەتمەندیەکا دی یا رۆژهلاتێ کوردستانێ ئەڤەیە کو کەسێن بژاردە د جڤاکا رۆژهلات دا هەم هەژمارا وان گەلەکن و هەم ژی چالاکترن و رۆل و باندۆرا وان ل سەر جڤاکی پێشچاڤە. ئەڤە ب وێ واتەیێ ناهێت کو پارچەیێن دی یێن کوردستانێ کەسێن بژاردە نینە، لێ بەلێ ب سەدەما وێ رەوشا ل رۆژهلات دروست بووی، رۆلا بژاردەیان پر زیدەتر و ب باندۆرترە ب هەڤبەرکرن د گەل پارچەیێن دی و ئەڤ کەسێن بژاردە ب باشی و ب لەزگینی خواستەکێن پەکەکێ فام دکن و هەموو هەولێن پەکەکێ یێن ژ بۆ ل رێ برنە دەرا پرسا نەتەوی یا کوردا بێ باندۆر دکن و قەبوول ناکن.

دیارە پەکەکێ ب ئاوایەکی نهێنی هندەک خەون ژ بۆ پێشەرۆژا ئیرانێ و رۆژهلاتێ کوردستانێ هەنە. د دەما چەند سالێن رابووری دا پەکەکێ هندەک چەک شاندییە رۆژهلاتێ کوردستانی و هندەک شانەیێن نڤستی دروست کرینە. ئەڤ ژی ل گۆر کار و بەرنامەیا پەکەکێ دبیت وەکو مەرتالەک ژ بۆ شەرێ ناڤخوە د پاشەرۆژا رۆژهلاتێ کوردستانێ دا بهێتە دیتن.

چارەنووسا پەکەکێ ل رۆژھلاتێ کوردستانێ ب چارەنووسا کۆمارا ئیسلام ڤە گرێدایی یە

رێڤەبەرێن پەکەکێ هەڤدەم ل گەل هێزێن ئۆپۆزسیۆنا ئیرانێ دا ژی مژوولی دانووستاندنێ یە کو گرینگترین جڤینا نوونەرێن وێ دگەل نوونەرێن موجاهدێنی خەلق بوویە. یا ژ بۆی پەکەکێ د پاشەرۆژا ئیرانێ دا گرینگ رەوشا وێ ب خوە یە و هەر وەک چەوا ژ بەر پەیوەندیێن خوە ل گەل دەولەتا داگیرکارا سووری، دەمەک درێژ باس ل رۆژئاڤا کوردستانێ نەدکر و هەر وها نها ژی ب هەموو رەنگا هەولا بەرەڤاژیکرنا هێزا رزگاریخوازانە یا رۆژهلاتێ کوردستانێ ددەت د پاشەرۆژێ دا ژی دێ ئامادە بیت وان کارا ژبۆی هەر رژێمەکێ بکەت کو ل تەهرانێ ببیتە دەستهلاتدار.

دبیت پەکەکێ ئەجیندا و خەونێن دی ژی هەبن لێ بەلێ یا کو ئاشکەرا یە ئەڤەیە کو مخابن رێڤەبەرێن پەکەکێ د تێکەلیێن خوە دا دگەل رژێما ئیسلامی یا ئیرانێ هند چوویە پێش کو رێیا ڤەگەرینێ بەرزەکریە و ئەڤە کارەکێ گەلەک زەحمەتە، ئەم دکارین ببێژین ب ڤێ نەرینا نها یا رێڤەبەرێن خوە ڤە، چارەنووسا پەکەکێ ل رۆژهلاتێ کوردستانێ ب چارەنووسا کۆمارا ئیسلام ڤە گرێدایی یە.

دەما ڤێ یەکێ ھاتییە کو چ دی رێ نەهێتە دان رێڤەبەرێن پەکەکێ گەنجێن دل پاقژ و ولاتپارێزێن کوردستانێ بکەتە فەدایێن ئارمانجێن خوەیێن بەرتەنگ

پێویستە ئەو ولاتپارێزێن کو نێزیکی پەکەکێ نە و دەستێ وان دگەهیتە بریاردەرێن پەکەکێ ل قەندیلێ، هەموو هەولێن خوە بدن ژ بۆ کو زیدەتر درەنگ نەبیت و رێبەرێن پەکەکێ د وێ راستیێ بگهینن کو کۆمارا ئیسلامی یا ئیرانێ بەر ب ژناڤچوونێ دچیت و ڤەگەرین ژ بۆ سەر رێیا کورداتیێ چەند د سوودا کوردان دایە هندە پتر ژی د سوودا پەکەکێ ب خوە دایە. دەما ڤێ یەکێ هاتییە کو چ دی رێ نەهێتە دایین رێڤەبەرێن پەکەکێ جوانێن دل پاقژ و ولاتپارێزێن کوردستانێ بکەتە فەدایێ ئارمانجن خوە یێن بەرتەنگ و وان ژ بۆ خزمەتا دەولەتێن داگیرکار بکار بینیت و ب شەهید کرن بدەن.

پێویستە رێڤەبەرێن پەکەکێ ڤێ راستیێ فام بکەن کو چەند رژێما داگیرکارا بەعس یا سووریێ وەک خوە ما و پەکەکە پاراست، رژێما ئیسلامی یا ئرانێ ژی هەر هند دێ مینیت و وێ پارێزیت. پەکەکە گەر دخازیت بهێز بیت دڤێت پشتا خوە ب هیزا بێ دوماهی یا نەتەوا کورد گەرم بکەت. چ پێ نەڤێت کو گەریلایێن سەر چییا نەشێن ڤێ نڤیسینێ بخوینن ژبەرکو ل چییا ژ بلی نڤیساندنێن رێڤەبەرێن پەکەکی، موان ماف نینە هیچ نڤیسین یان مژارەک جودا ژ ئایدۆلۆژیا خوە بخوینن.  لێ بەلێ ئالیگر و دۆستێن پەکەکێ ل کوردستانێ و ب تایبەتی ل رۆژهلاتێ کوردستانێ، پیویستە ب تێهزرین ل کار و بەرنامەیێن رێبەرێن پەکەکێ باشتر مەرەمێن ڤێ ریخستنێ فام بکەن و رێ نەدەن چ دی ژ بال هندەک کەسان ڤە کو خوە ب رێبەرێن پەکەکێ دهەژمێرن، وەکو کێم فام و خەشیم بهێنە دیتن و ئیرادە و هێزا وان یا نەتەوی د راستا بەرژەوەندێن داگیرکارێن کوردستانێ دا ب هەر وە بهێتە بەرزەکرن.

پاشەرۆژەکا گەش ل بەندا رۆژهلاتێ کوردستانێ یە وەرن ئەم ب فشار خستنە سەر بریار ب دەستێن پەکەکێ و ئاشکەرا کرنا سیاسەتێن وان یێن شاش، رێ نەدین شاشتی و چەواشەکاریێن کۆنسەیا سەرۆکاتیا پەکەکێ وێ پاشەرۆژا گەش شوولی بکەن. پێویستە هەلوەستێن پەکەکێ ل باشوور و رۆژئاڤا کوردستانێ ببنە دەرسەک ژ بۆ گەنجێن رۆژهلات و خوە ژ بۆ رێڤەبەرێن پەکەکێ ژی کو رێکارێن یەکئالی و مامەلەکرن د گەل داگیرکاران ژ بلی شەرێ ناڤخوە و مالوێرانی و نەخوەشییان زێدەتر و ژ دەست دانا دەرفەتێن زێرین و داگیرکرنا زێدەتر یا کوردستانێ هیچ ئەنجامەک دی نابیت.