رەفتارێن ب گومان یێن پەکەکێ ل بەرامبەر خوەپێشاندانێن ئیرانێ-5

رەفتارێن ب گومان یێن پەکەکێ ل بەرامبەر خوەپێشاندانێن ئیرانێ-5

باشترین بەلگە ژ بۆ ڤێ چەندێ کو غیابا پارتیێن نەتەوی یێن رۆژهلاتێ کوردستانێ دەرفەت ژ بۆ وەرارا پەکەکێ دروستکریە ئەڤەیە کو د دەمەکێ دا کو بەردەوام سڤکاتی ب وان رێخستنا دکر و ب روونشتڤانێن کامپان ناڤێ وان دبر لێ بەلێ دەماکو د چەند سالێن رابووری دا هێزێن پێشمەرگە یێن رۆژهلاتێ کوردستانێ د دەستپێکا قۆناغەک نوو یا پێشمەرگاتیێ دا ل بن ناڤێ “راسان” دا ڤەگەریای چیایێن دناڤبەرا باشوور و رۆژهلاتێ کوردستانێ، بەری کۆمارا ئیسلامی یا ئیرانێ، پەکەکە ل دژی وان سەکنی و شەر ب وان فرۆت و هەژمارەک ژ وان پێشمەرگەیان شەهید و بریندار کرن. پشت را دەما کو پێشمەرگە بجی بووی ژی د بۆمبەبارانکرنا بارەگەهـ و ستارگەهێن وان دا پەکەکێ هاریکارییا رژێما ئیرانێ کر و کۆردینات (احداثیات) ب سوپایێ ئیرانێ ددان. خۆ ئەگەر گرووپەکی پێشمەرگەیان خواستبا ژ بۆ ئەنجامدایینا چالاکیەکی بچیتە ناڤ کووراهییا رۆژهلاتێ کوردستانێ دا پێدڤی بوو خوە ژ پەکەکێ ڤەشێرن، گەر نا یان پەکەکە دا رێگریێ ل وان کەت یانژی دا راپۆرتان ل سەر وان بۆ ئیرانێ فرێکەت.

بەهانەیا وان ژی ئەڤە بوو کو دگۆت ئەڤ هێزە ب پلانا ترکیێ و پارتی هاتینە سنۆران و دخوازن هەدەپە د هلبژاردنێن پەرلەمانێ ترکیێ دا راستی شکەستنێ بهێت.! لێ د راستی دا هەدەپێ د وان هەلبژارتنان دا گەلەک دەنگ ئینان و بوو خوەدی 80 کورسی یێن پەرلەمانی و ئاستەنگا 10٪ دەرباس کر. لێ بەلێ ژ بەر سیاسەتێن شاش یێن گرووپا ئەنقەرێ ل قەندیلێ، ئەو بەشداری حکوومەتا ترکیێ نەبوون و جارەکا دی هەلبژارتن هاتنە کرن، د دوبارەکرنا هەلبژارتان دا هەدەپێ ب رێژەیەک بەرچاڤ دەنگێن خوە ژ دەست دان. ڤێ چەندێ ژی ئیسبات کر کو شەر فرۆتنێن پەکەکێ ب پارتیێن رۆژهلاتێ کوردستانێ هیچ پەیوەندیەک ب هەلبژارتنێن ترکیێ ڤە نەبوو بەلکو رێڤەبەرێن پەکەکێ دزانی  ب ڤەگەرینا پارتیێن رۆژهلاتێ کورەدستانێ و بەرەڤ پێش برنا چالاکیێن وان دێ گەل ل رۆژهلاتێ کوردستانێ کێمتر تەڤلی ناڤا ریزێن پەکەکێ بن.

سەدەمەکێ دی ژ بۆ تەڤلی بوونا گەنجێن رۆژهلاتێ کوردستانێ بۆ ناڤا رێزێن پەکەکێ، ڤەدگەریت بۆ سیاسەتا پۆپۆلیستی یا ڤێ رێخستنێ کو ئەو ژی دیسان ب هەڤکارییا رژێما ئیسلام یا ئیرانێ دهێتە جێبەجێکرن. ئەندامێن پەکەکێ گەر دگەل شیعەیەکی باژارێ ئیلامێ باخڤن وی دەمی ئاپۆ دێ کەنە شیعە، گەر د گەل یارسانیەکی باخڤن دێ بێژن ئاپۆ گەلەک ژ یارسانێ حەز دکەت و یارسانی یە، ب رەنگەکێ کو هندەک ژ کەسێن نێزیکی رژێما ئیرانێ پرتووکەک دەربارێ ئۆلێ یارسان ب زمانێ کوردی “دەڤۆکا کەلهۆری” و زمانێ فارسی نڤیساندبوو و رژێما ئیرانێ ئەو پرتووک د ناڤا یارسانیان ب ناڤێ ئاپۆ بەلاڤ دکر. پەکەکە د گەل مۆکرییانیان روودنن و خوە ب قۆتابیێن پێشەوا دیار دکەن و ل ناڤچەیێن ئۆرمیێ و خوێ و سەلماس باس ل دەڤۆکا کورمانجی دکەن.

سەدەمەکا دی ئەڤەیە کو ئەڤ گەنجێن رۆژهلاتێ کوردستانێ دەما ب مەرەما تەڤلیبوون د شۆرەشێ دا بەرێ خوە ددەنە ناڤچەیێن سینۆری یێن باشوورێ کوردستانێ ژ لایێ هندەک ئالیێن هەڤپەیمانی و پەکەکێ و کۆمارا ئیسلامی یا ئیرانێ ڤە ب گەف خوارن و خاپاندنێ، تێنە شاندن ژ بۆ قەندیلێ و دەما کو دزانن ب شاشی هاتینە ئێدی نکارن خوە دەرباس بکەن. ژبەرکو د ناڤا پەکەکێ دە قوت بوونێ ئەنجامەکی گەلەکی گران هەیە و دبیت ب بوهایێ ژ دەست دایینا جانێ وان ب داوی بێت، ژ بەر ڤێ یەکێ کەس نکاریت ب ئاشکەرا ژ پەکەکێ قوت ببیت و ب نەچاری ل وێرێ دمینن.

ژ بلی وان کەسێن کو ب حەزا خوە تەڤلی پەکەکێ دبن یان تێن خاپاندن، پەکەکە وەکو پارچەیێن دی یێن کوردستانێ ل رۆژهلات ژی مفا ژ میتۆدا رەڤاندنا زارۆکان دبینیت. ژ بۆ ڤێ یەکێ ژی باشترین میناک رەڤاندنا چەند زارۆکێن گوندێ نێی یێ مەریوانێ نە. د تۆمارەکا ڤیدیۆیی دا کو ژ وان زارۆکان هاتیە بەلاڤکرن ب ئاشکەرا دیار دبیت کو ئەڤ زارۆکە هاتینە رەڤاندن. یەک ژ وان زارۆکێن کو هاتینە رەڤاندن خوە ناڤێ ئاپۆ ژی نزانیت و دەما دبێژنێ بێژیت: “بژی سەرۆک ئاپۆ”، ئەو دبێژیت بژیت سەرۆک ئاکۆ.!

سەرپێهاتیا ئەسرین محەمەدی یا بەرنیاس ب سۆنیا، کچە کوردا 13 سالی ژ مالباتەک نیشتیمانپەروەرا سەردەشتا رۆژهلاتێ کوردستانێ، میناکەک دی یە ژ رەڤاندنا زارۆکان ل رۆژهلاتێ کوردستانێ ژ لایێ پەکەکێ ڤە. ئەسرین محەمەدی ل هاڤینا سالا 2017ێ دا ژ لایێ پەکەکێ ڤە هاتە رەڤاندن. مالباتا وێ کو گەلەک خزمەتا گەریلایێن پەکەکێ/پەژاکێ کربوو، گەلەک هەول دان جارەکێ زارۆکا خوە ببینن یان ژی هەر چ نەبیت بێژنە وان ئەو زارۆک ل کۆڤەیە لێ بەلێ وەکو هەموو خیزانێن گەریلایێن دی ئەو ژی بێ بەرسڤ مان. حەسەن محەمەدی و مەریەم خزری، باب و داییکێن ئەسرینێ، د سکالا نامەیا خوە دا کو دایە دەست حکوومەتا هەرێما کوردستانێ و ئیرانێ و سازیێن ناڤ دەولەتی داخوازێ ژ وان دکەن کو ل هەوارا وان بچن. لێ بەلێ سکالا نامەیا وان وەکو سکالا نامەیێن پرانیا نیشتیمانپەروەرێن دی کارتێکرنا خوە ل پەکەکێ ناکەت.

د چەند مەهێن رابووری دا “مەریەم خزری” داییکا ئەسرینێ، ب رێیا تۆمارەک ڤیدیۆیی نووچەیا جان ژ دەست دانا کچا خوە راگەهاند و گۆت، هەرچەند کو پەکەکە بێ کو ئاماژە ب جیهێ وێ بکەن ب تەنێ راگەهاندیە کو ئەسرین شەهید بوویە، لێ بەلێ د راستی دا د دەمەکێ دا کو دخواست د ناڤا رێزێن پەکەکێ دا برەڤیت ژ لایێ وێ رێخستنێ ڤە هاتیە شەهید کرن.

ژ بلی چاڤکانیێن مرۆڤی، هەڤدەم سنۆرێن دەست چێکری یێن رۆژهلاتا کوردستانێ د گەل باشوور و باکورێ کوردستانی چاڤکانیەک گرینگە ژ بۆ پەکەکێ و وێ داهاتا کو ب رێیا کەرەستەیێن رێ پێ نەدایی و نە قانوونی (مادەیێن هشبەر و چەک و جبلخانە) ب دەست وان دکەڤیت، د وارێ ئابووری دا ژی پەکەکە گەهاندیە ئاستەک وەها کو بوویە یەک ژ دەولەمەندترین رێخستنان د ئاستێ جیهانی دا. بێ گومان هەر گوهەرینەک د ئیرانێ دا کو ببیتە سەدەما ژناڤچوونا رژێما ئیرانێ دێ ڤێ خەزینەیا بێ دوماهی ژی ژناڤ بەت.

د بەشا دوماهیێ ژ ڤێ مژارێ ئەم دێ باس ل ترسا پەکەکێ ژ پاشەرۆژا پێگەها خوە ل رۆژهلاتێ کوردستانێ کین. دیارە ل گۆر فەلسەفەیا سیاسی یاکو پەکەکە بکار تینیت (فەلسەفەیا ماکیاڤێلی) پر هێسانە گەر بزانی ژناڤچوونا کۆمارا ئیسلامی راستیەک حاشا هەلنەگرە، پشتا وێ رژێمێ بەردەی. لێ بەلێ یا کو رێڤەبەرێن پەکەکێ نە رحەت کری ئەو ترسا وانە کو ژ پاشەرۆژێ هەیی. پەکەکە فام دکەت کو ل رۆژهلاتێ کوردستانێ بێ کۆمارا ئیسلامی رەوشا پارتییا وێ یا سیبەر ئانکو پەژاکێ دبیت ژ پەچەدەکە یا باشوور باشتر نەبیت. ژبەر ڤێ یەکێ ل دەستپێکێ دخوازیت کۆمارا ئیسلامی ژناڤ نەچیت، پشت را گەر هەر بریار بیت ئەو رژێم ژناڤ بچیت ب کەلەجان و خوەپێشاندانێن گرسەیی ژ ناڤ نەچیت. خەونا پەکەکێ ژ بۆ رۆژهلات سیناریۆیا رۆژئاڤایە. ب وێ واتەیێ کو ئیران ئەو قاس بێ هێز ببیت کو ناچار بیت برێڤەبرنا هندەک ژ ناڤچەیان بدەتە دەست دۆستا خوە یا ستراتەژیک پەکەکێ.

ئەڤ مژارە بەردەوامە…