رژێما کۆمارا ئیسلامی یا ئیرانێ وەکو دەستهلاتەک داگیرکار و فاشیست بەردەوام تووند ترین بەرسڤ ژ بۆ داخوازێن کوردان هەبوویە و کورد بن دەست کرینە، ب ڤێ یەکێ ب نیشاندانا ئاستا توندی یا خوە ل بەرامبەر کوردان، خەلکێ ناڤچەیێن دی یێن ئیرانێ ژی پێ ترساندینە. سەدەما وێ ژی زەلالە، ژبەرکو کوردان چ جاران سەرێ خوە ل همبەر دەستهلاتا داگیرکارا تەهرانێ نەچەماندییە و هەردەم ل دژی وێ رژێمێ خەبات کریە و بوونە هێڤنێ خەباتا رزگاریخوازانە و ئازادیخوازانە یا نەتەوەیێن دی یێن بن دەست د ناڤا ئیرانێ دا. لێ ژبەر بەرەڤ پێش چوونا تەکنەلۆژییا پەیوەندیکرنێ، رژێمێ دخواست بەهانەیەکا پیچەک مەنتقی ژ بۆ ئێریشێن خوە یێن هووڤانە دەست خوە ڤە بینیت داکو د ئاستێ ناڤدەولەتی دا کێمتر فشار لێ بهێتە کرن. جیهێ داخێ یە زانیاری باس ل ڤێ یەکێ دکەن کو ل کوردستانێ یەک ژ ئامیرێن دروستکرنا بەهانەیان ژ بۆ کوشتنا زێدەتر، پارتییا کارکەرێن کوردستانێ بوویە.
رژێمێ هەر ژ دەستپێکا خوەپێشاندانا کو ب بەهانەیا ب بها بوونا بەنزینێ دەست پێ کرن لێ بەلێ پشت را وەکو خوەپێشاندانێن پێش خوە ب سلۆگانێن سیاسی و داخوازی ژ بۆ گوهەرینا رژێمێ بەردەوام کر، راگەهاند کو ئەڤە کارێ دوژمنایە و ئەڤێن ل سەر جادەیان ژ لایێ هندەک دوژمنێن دەرڤە هاتینە پالدان ژ بۆ دروستکرنا فەوزایێ و دەست دایە چەکی و تەقە ل هێزێن ئەولەهی و خوە خوەپێشاندەران ژی کریە.
ل رۆژهلاتێ کوردستانێ یا کو زەلال بوو، 3 بوویەرێن ب گومان یێن ب ڤی رەنگی ل هەر یەک ژ باژارێن کرمانشان، سنە و مەریوانێ هاتنە ئەنجامدان. ل کرمانشانێ فەرماندارەکێ رژێمێ ب چەکی هات کوشتن و هەڤدەم ئێریشی بارەگەهەکێ هێزێن ئەولەهیێ ل تاخا جافرئاوا هات کرن. پشت را ئاشکەرا بوو کو جیهێ داخێ یە ئێریش ژ لایێ هندەک کەسێن سەر ب پەکەکێ ڤە و ب ئاگەهدارییا رژێمێ هاتیە ئەنجامدان. پەکەکێ ب خوە ژی ژ بۆ پرۆپاگاندایێ د ناڤا خەلکی دا بەلاڤکر کو ژ بۆ پشتەڤانییا خەلکێ و دەست خستنا چەک و تەقەمەنیێن بارەگەهێ ئەولەهیێ ئێریش ئەنجام دایە. ژبەر ڤێ یەکێ یا کو مە پش نها باس کری دەست برن ژ بۆ چەکی نە ب تنێ د فایدێ خەلکی دا نەبوو بەلکو بەرەڤاژی بوو بەهانەیەک ژ بۆ ئێریشێن هووڤانە و کوشتنا خوەپێشاندەران و ب زرارا خوەپیشاندەران و داخوازیێن وان یێن رەوا ب دوماهی هات.
هەڤدەم یێن کو دبێژن ژ بۆ دەستخستنا چەکێ بارەگەهی ئێریش کریە ژ بەر چەند سەدەمان نە دروستە. یا یەکێ ئەڤەیە کو چەکدارکرنا پەکەکێ ژ لایێ ئیرانێ ڤە تشتەکێ نوو نینە و گەر پەکەکێ پێویستی ب چەکی هەبیت کۆمارا ئیسلامی یا ئیرانێ وان بێ چەک ناهێلیت و پێویست ناکەت پەکەکە ژ بۆ دەستخستنا چەند پارچەیێن چەکی ئێریشی بارەگەهەکی ئەولەهیێ بکەت، د دەمەکێ دا کو پرانییا چەکان ژی چەکێن سڤک بوون. سەدەما دویەمین ئەڤەیە کو پشتی هاتنا ئامەریکایێ ژ بۆ رۆژئاڤا کوردستانێ و پێدانا چەک و جەبلخانەیێن زێدە ب یەپەگێ کو بالێ رۆژئاڤا یێ پەکەکێ یە، د راستی دا چەک و جەبلخانەیەک زێدە و ب هێز و پێشکەفتی ب دەست پەکەکێ کەت. لاوازییا یەپەگێ ل بەرامبەر ئێرشێن سوپایێ ترکیێ ژ بۆ سەر رۆژئاڤا کوردستانێ هەم ل عەفرینێ هەم ژی ل سەرێ کانیێ بەشەکێ وێ ژبەر ڤێ سەدەمێ بوو کو پەکەکێ بەشەکی ژ وان چەکان ڤەگوهاستبوون قەندیلێ و زانیاریێن پشت راست کری ل بەر دەستن کو پەکەکە مژوولی فرۆتنا چەکی یە و بەشەکێ وان چەکان فرۆتنە. لایەنەکێ کو ئەو هندە چەک هەبیت کو ژێ زێدە بیت و ل بازارێ رەش بفرۆشیت بەرعاقل نینە ژبەر دەستخستنا چەند پارچەیێن چەکی ئێرشی بارەگەهەکێ ئەولەهی یێ رژێمەکا دوست بکەت کو خەتەرەیا سیاسی و سەربازی و ئیستخباراتی یا وێ هندە زۆرە کو ب هەزاران پارچە چەکان ژی ناهێتە بەدەلڤەکرن.
ژ ئالیەکێ دی چەکێن هێزێن ئەولەهیێ ل ئیرانێ د بارەگەهێن ئەولەهیێ دا ژ جوورەیێ “j-3” نە کو ب کێر هاتنا وان د شەرێن پارتیزانی دا گەلەک کێمە و ئەڤ جوورە چەکە ژ لایێ پەکەکێ ڤە ناهێنە بکارئینان. دبیت سەدەمەک دی هەبیت ژ بۆ ڤێ یەکێ کو مەبەستا پەکەکێ ژ ڤێ ئێریشێ و دەست خستنا چەک و جەبلخانەیان نەبوویە، لێ بەلێ ئەڤ سێ سەدەمە ب زەلالی دیار دکەن کو پرۆپاگاندا پەکەکێ تەمام دگەل مەنتق و لۆژیکێ دا یەک ناگریت و دبیت ئارمانجێن ل پشت ڤێ ئێریشێ هەبن.
ل باژارێ سنە و مەریوان ژی 2 بوویەرێن بێ ئەنجام یێن تەقەکرنێ روو دان کو لایەنگرێن پەکەکێ راگەهاندبوو ئەم بووین. ب کورتی دشێین بێژین بێ سەدەم تەقە کربوو. ڤان تەقە کرنا نە ب تنێ مفا ژ بۆ خوەپێشاندانان نەبوو بەلکو ب کێماسی ژ دو لایان ڤە زەرەر گەهاندە خوەپێشاندەران ب گشتی و خوەپێشاندەرێن رۆژهلاتێ کوردستانێ ب تایبەتی.
ژ لایەکێ هەر وەکو مە باس کری هەر جوورە توندوتیژییەک د وێ کەلەجانا جەماوەری دا ب تنێ د مفایێ رژێمێ دا بوو. ئەڤ چەندە ب رامانا دژاتیکرنا خەباتا چەکداری ناهێت ژبەرکو ڤان کارێن پەکەکێ هیچ پەیوەندیەک ب خەباتا چەکداری ڤە نەبوو. گەر نە ئەگەر رێخستنێن رۆژهلاتا کوردستانێ دگەل پەکەکێ ژی، بشێن ب چەکی باژێرەکێ ئازاد بکەن و ژ لەشکەرێن داگیرکار پاکژ بکەن، ژ لایێ هەموو دلسۆزێن کورد ڤە دا هێتە پێشوازیکرن و دا ب پیرۆز ناڤ لێ هێتە کرن. لێ بەلێ ئاراستەکرنا کەلەجان و سەرهلدانەک جەماوەری بەر ب توندوتیژیێ د راستی دا خواستەکا رژێمێن دیکتاتۆرە، ژبەرکو گەلەک ئاشکەرا یە کو د گۆرەپانا توندوتیژیێ دا رژێمەک ب سوپایەک 1 ملیۆن کەسی ڤە ب هەزاران جاران ژ هندەک کەسێن سڤیل ب دەستێن ڤالا بهێزترە، و نە ب تنێ دێ شێت خوەپێشاندانان سناهی تر ژناڤ بەت، بەلکو ترس و سەهمەکا وسا ژی دێ ل جەم جڤاکێ دروست کەت کو جەسارەت نەکەت جارەکا دی نەرازیبوونا خوە دیار بکەت و هەڤدەم مۆرالا هێزا دژە گەل یا سەر ب رژێمێ ژی دێ بلند بیت.
پرسەکا دی کو پەیوەندی ب کوردان ڤە هەیە ئەڤە کو د ئیرانا فرە نەتەوە دا رژێما داگیرکارا کۆمارائیسلامی و شۆفینیستا نەتەوی یا سەردەستا فارسان بەردەوام باس ل ڤێ چەندێ کریە کو بزاڤا کوردستانێ بزاڤەکا توندوتیژی خولقینە و ئارمانجا وێ دابەشکرنا ئیرانێ یە. دیارە کو جودابوونا کوردستانێ ژ ئیرانێ و ولاتێن دی یێن داگیرکەرێن کوردستانێ ژ لایێ کوردان ڤە یەکگرتنا کوردستانێ یە و هەموو ولاتپارێزەکێ کورد ب شەڤ ب ڤێ هێڤیێ دنڤیت، لێ بەلێ ئەڤە د نێرینا فارسەکێ دا جودایە و دێ وان پال دەت پالپشتیا رژێمێ بکەن. بێ گومان ژبەرکو کوردان ب خوە ئەو هێز نینە ب تنێ کۆمارا ئیسلامی ژناڤ ببەت و چارەنڤیسا خوە دیار بکەت، ناچارە د قۆناغا هەلوەشاندنا رژێمێ دا د گەل دژبەرێن دەستهلاتێ ل ئیرانێ دگەل کەسێن فارس و نەیێن فارس هەماهەنگیێ بکەت. پشتی هەلوەشاندنا کۆمارا ئیسلامی یا ئیرانێ، کورد ب یەکیتی و هەڤدەنگی یا گەلێ خوە دشێت ژ بۆ مافێن خوە یێن رەوا کو سەرخوەبوونە پێنگاڤان بهاڤێژیت. ب کورتی ئەڤ جورە کارێن پەکەکێ ڤالاهیێ د ناڤا رێزێن دژبەرێن کۆمارا ئیسلامی یا ئیرانێ دا دروست دکەت و ب تنێ یێن ژ ڤێ رەوشێ مفا وەردگرن هەر ب تنێ رژێما دیکتاتۆرا تەهرانێ یە.
