پارتییا کارکەرێن کوردستانێ بۆچی د بەرژەوەندییا رژێما تەهڕانێ دا کار دکەت؟
پەیوەندیێن د ناڤبەرا پەکەکێ و ئیرانێ دا گەهشتینە ئاستا ستراتەژیک و هیچ یەک ژ وان ژی حاشاتیێ لێ ناکەت، لێ بەلێ پەکەکە دخوازیت ب رێیا دروتسکرنا حیزبێن سیبەر تووزێ بکەتە چاڤێن خەلکێ پارچەیێن دی یێن کوردستانێ. ژ بۆ رۆژهلاتێ کوردستانێ ژی ب ئاڤاکرنا پەژاکێ ل دووڤ ڤێ مەرەمێ بوو. هەرچەند کو د ئاڤاکرنا پەژاکێ دا ژی ئەو وێرەکی نەبوو کو خوە ب یەک سلۆگان ژی باس ل ژناڤبرنا رژێما ئیرانێ بکەت و د بەرنامەیا پەژاک و کۆدارێ ژی کو دو بالێن رۆژهلات یێن پەکەکێ نە، ب یەک پەیڤ ژی باس ل دژاتیکرن و ژناڤبرنا رژێما ئیسلامی یا ئیرانێ نەکریە. نە ب تەنێ باسی ژناڤبرنا رژێمێ نەکریە بەلکو تەکەزییێ ل سەر هەڤبەشی و گرێدانا توند دناڤبەرا فارس و کوردان دا ژی دکەت. د دەمەکێ دا کو ئەو پەیوەندییا نەڤەقەتیایی یا کو پەکەکە ب کەلەجان ڤە باس دکەت، د راستی دا پەیوەندییا دناڤبەرا دو نەتەوەیێن سەردەست “فارس” و ژێردەست “کورد” دکەت. ئەو دربا کو فارسان ل کوردان و چاندا وان دایی د دیرۆکێ دا هیچ داگیرکارەکی ل بن دەستێن خوە نەدایە. هەر ژ ژناڤچوونا ئیمپراتۆریەتا ماد بگرە حەتا دگەهیتە ژناڤچوونا کۆمارا کوردستانێ د دیرۆکا هەڤچەرخ و نها ژی دگەلدا بیت نەتەوەیا داگیرکار و سەردەست یا فارس بەردەوام هەول ددەت کوردان ئاسمیلە بکەت و ژ بلی نەخوەشی، کاولکاری، برین و ژانان نەبیت هیچ مفایەک ژ بۆ کوردان نەبوویە.
ئانکو پەکەکە خوە د ناڤا خوە دا د هزر و تێفکرینا خوە دا د ئەساس دا باوەری ب ژناڤچوونا کۆمارا ئیسلامی یا ئیرانێ نینە و وەکو دۆستەکێ ستراتەژیکێ خوە دبینیت، ژبەر ڤێ چەندێ د وان چالاکیان دا ژی کو ژ بۆ ژناڤبرنا رژێما ئیسلامی ل ئیرانێ تێن ب رێڤە برن بەشدار نابیت. لێ بەلێ یا کو جهێ سەرنجێ یە ئەڤەیە نە ب تەنێ بەشدار نابیت بەلکو ژ بۆ شکست و بەروڤاژیکرنا وان چالکیان ژی هەول ددەت. ب لێنێرینەک سادە د دیرۆکا پەکەکێ دا ژ بۆ مەئاشکرا دبیت کو ڤێ رێخستنێ د هەموو ژییانا سیاسی یا خوە دا بچووکترین گاڤ ل دژی کۆمارا ئیسلامی یا ئیرانێ نەهاڤێتییە و د قۆناغێن جور ب جور دا ژی مفایەک گەلەک زێدە ب ئیرانێ گەهاندیە.
سەدەمەکێ دی ئەڤەیە کو پشتی شکەستنا سیاسەتن پەکەکێ ل بەرامبەر دەست ب سەرداگرتن و مۆنۆپۆل کرنا گۆرەپانا سیاسی ل باشوور و رۆژئاڤایێ کوردستانێ و ئاشکەرا بوونا خواستەکێن وێ ل ڤان 2 پارچەیێن کوردستانێ و شکستنا وێ ل باکورێ کوردستان، بهێزترین سەرۆکانییا هێزا مرۆڤی یا وێ ژ لایێ هەژمارێ ڤە د نها دا رۆژهلاتێ کوردستانێ یە. بێ گومان ئەڤ دەرفەتە ژی ژ لایێ کۆمارا ئیسلامی یا ئیرانێ ژ بۆ وان هاتیە چێکرن. پەکەکە ب راستی ژ ڤێ یەکێ دترسیت کو ئەگەر ئەڤ رژێمە ب رێیا خەلکێ و خوەپێشاندانێن وان ژناڤ بچیت، سەرێ وێ ل رۆژهلاتێ کوردستانێ بێ کولاڤ بمینیت. ژبەرکو سەرکردەیێن پەکەکێ گەلەک ب باشی ل ڤێ راستیێ گەهشتینە کو رەوشا سیاسی و جڤاکی یا رۆژهلاتێ کوردستانێ دگەل رۆژئاڤا جوداهیەک مەزن هەیە و ب ڤەگەرینا پارتییێن نەتەوی یێن رۆژهلاتێ کوردستانێ ژ بۆ ناڤا جەماوەرێ خوە و ئاشکەرا بوونا مەرەمێن راست یێن پەکەکێ ئەڤ رێخستنە دێ گرینگترین چاڤکانییا دەست خستنا هێزا خوە یا مرۆڤی ژ دەست دەت.
بێ گومان پرانیا وان کەسێن ل رۆژهلاتێ کوردستانێ تەڤلی پەکەکێ دبن، کەسێن شۆرەشگێر، ولاتپارێز و نیشتیمانپەروەرن کو داخواز و هێڤییا وان یا سەرەکی رزگارکرنا کوردستانێ یە و ژ بۆ بجی کرنا ڤێ ئارمانجێ ژی تەڤلی پەکەکێ دبن. تاکە رەخنەیا مرۆڤ دشێت ژ وان کەسان بگریت ئەڤەیە کو ب باشی پەکەکە ناس نەکریە و هایا وان ژ مەرەما رێڤەبەرێن پەکەکێ و پەیوەندییێن موکم یێن پەکەکێ دگەل ئیرانێ نینە. دیارە د ڤی واری دا ژی چەند ئەو گەنج هێژایی رەخنەکرنێ بن، هندە ژی ئەو کەس و ئالیێن روویێ راستێ پەکەکێ ناس دکەن و ل سەر نائاخڤن ژی هێژایی رەخنەکرنێ نە. هەرچەند کو هندەک ژ وان کەسان هێشتا ل هێڤییا وێ چەندێ نە کو پەکەکە ڤەگەریت سەر خەتا نەتەوی، لێ بەلێ بێ گومان بێدەنگییا زێدەتر د ڤی واری دا ب تەنێ ئەنەرژی یا زێدەتر یا خەباتا رزگاریخوازانە یا کوردستانێ ب با ددەت، و د زیانا کوردان ب تەڤاهی و گەریلا و شۆرەشگێر و لایەنگرێن دلسۆز و نیشتیمانپەروەرێن پەکەکێ ب تایبەتی ب دوماهی دهێت.
گەنجێن رۆژهلاتێ کوردستانێ پێویستە هایداری ڤێ راستیێ بن کو کۆنسەیا سەرکرداتییا پەکەکێ هیچ بەرسڤەکا نەتەوی و مەنتقی ژ بۆ چارەسەرکرنا پرسا نەتەوی یا رۆژهلاتێ کوردستانێ و کوردا ب گشتی نینە. پەکەکە دخوازیت هەموو ئەنەرژی یا کوردان ل هەر 4 پەرچەیێن کوردستانێ ل بن ناڤێ باکورێ کوردستانێ ژ بۆ خزمەتکرن ب بەرژەوەندیێن رێخستنا خوە بکار بینیت. مژارەک سادەیە و نە ئالۆزە، رێخستنەک چەوا دشێت رزگارییا نەتەوی یا رۆژهلاتێ کوردستانێ بجی بینیت د دەمەکێ دا کو بارەگەهێن وێ د بن چاڤدێری و کنترۆلا رژێما داگیرکار یا وێ پارچەیا کوردستانێ دا یە و پێویستیێن لۆجیستی یێن وێ ژ لایێ رژێما ئیرانێ ڤە دهێنە دابینکرن و بریندارێن وێ ل نەخوەشخانەیێن ئۆرمیێ و باژارێن دی یێن ئیرانێ دا تێنە دەرمان کرن؟!!
چەوا دبیت ب پەکەکێ ب باوەر بن کو رۆژهلاتێ کوردستانێ رزگار بکەت د دەمەکێ دا کو ژ بۆ پارچەیا خوە ئانکو باکورێ کوردستانێ باس ل براتییا گەلان دکەت و کەمالیزمێ ب پێشکەفتن، ئەرێنی و د سوودا کوردان دا پیناسە دکەت؟ چەوا دبیت ب پەکەکێ ب باوەر بن د دەمەکێ دا کو هەموو ئەو سەمبۆلێن نەتەوی کو ل کۆمارا نەتەوی-دەمۆکراتی یا کوردان ب سەرۆکاتییا پێشەوایێ مەزن قازی محەمەد هاتبوون دانان، بهێنە پشت گوهکرن و هندەک کەس و تشتێن دی ل جیهێ وان بهێنە دانان؟ ئەو سەمبۆل وەکو ناڤێ پیرۆزێ پێشمەرگە و ئالا کوردستانێ و….
گەنجێن رۆژهلاتا کوردستانێ چەوا دبیت باوەر ژ پەکەکێ بکەن کو ئەندامێن خوە وسا پەروەردە کرینە کو ل رۆژهلاتێ کوردستانێ رێخستنێن نهێنی یێن پارتیێن دی یێن ڤێ پارچەیا کوردستانێ کو ژ بۆ مافێ نەتەوی خەباتێ دکەن، ژ بۆ رژێمێ بدنە ناساندن؟
گەنجێن رۆژهلاتێ کوردستانێ چەوا دشێن ل دووڤ پەکەکێ بکەڤن د دەمەکێ دا کو د بن پرۆژەیا “شەهید سازی”یێ دا کۆمەک ژ گەنجێن ڤێ پارچەیا کوردستانێ ب شەهیدکرن دان؟
جوانێن رۆژهلاتێ کوردستانی ژ بۆ کو باشتر پەکەکێ ناس بکەن ب تەنێ پێویست دکەت ل رابووری یا ڤێ ریخستنێ و بەرنامەیێن وێ ژ بۆ داهاتوویا کوردستانێ بنێرن و پاشان بۆ دەمەکی کورت دگەل ویژدان و مەنتقێ خوە ب تەنێ بمینن. ڤێ رێخستنێ د رابووری دا هیچ رێخستنەکا نەتەوی یا کوردان نەمایە کو شەر ل دژی وێ نەکربیت، ل همبەر ڤێ چەندێ هیچ داگیرکارەکێ کوردستانێ ژی نەمایە تێکەلی دگەل دا نەبیت و ئالیکاریا وێ نەکربیت.
نڤیسەرێ ڤان رێز رستەیان ب خوە ژ بۆ دەما چەندین سالان د گەل پەکەکێ کار کریە و ژ نێزیک ڤە هەست ب ڤێ چەندێ کریە کو سەرکردەیێن پەکەکێ چ قاس ب چاڤەکی خراب و سڤک ل رۆژهلاتێ کوردستانێ و خەباتا رابووری یا وێ پارچەیا کوردستانێ دنێرن. ئەڤ نەرینا پرانیا وان کەسانە کو کوردێن رۆژهلاتن و دگەل پەکەکێ کار کریە.
