ب فه‌رمانا قه‌ندیلێ، مه‌زلووم عه‌بدی «شاهین جیلۆ» ژ فه‌رماندارییا هێزێن سووریایا ده‌مۆكراتیك هات دوورخستن، ته‌ڤ ده‌ستهلات ژێ هاتنه سته‌ندن، نێز بوونا مه‌زلووم ژ هه‌رێما باشوورێ كوردستانێ، سه‌ده‌ما سه‌ره‌كه ئا ڤێ بریارا قه‌ندیلێ یه.
پێگه‌ها «داركا مازی» ئاگاهی ل ده‌ربارا فه‌رمانا قه‌ندیلێ، یا گوهه‌راندنا مه‌زلووم عه‌بدی ب ده‌ست خستنه و ل گۆری وان ئاگاهییان، چه‌ند رۆژان به‌رێ كۆنسه‌یا رێڤه‌به‌ر یا په‌كه‌كێ ل قه‌ندیلێ جڤیانه، مه‌زلووم مژارا سه‌ره‌كه ئا جڤینێ بوو.
د جڤینا كونسه‌یا په‌كه‌كێ ده، بریار هات گرتن كو مه‌زلووم عه‌بدی ژ فه‌رماندارییا هێزێن سووریایا ده‌مۆكراتیك هه‌سه‌دێ وه‌ره دوور خستن و كه‌سێ ب ناڤێ «مه‌حموود به‌رخوه‌دان» و كۆد ناڤێ «مه‌حموودێ ره‌ش» ل جیهێ وێ وه‌ره ئه‌ركدار كرن.
چاڤكانیێن پێگه‌ها «داركا مازی» ل رۆژئاڤا كوردستانێ ئه‌شكه‌ره كرن، مه‌زلووم ب ڤێ فه‌رمانێ هاتییه هایدار كرن، ئه‌و هێژان د ئه‌ركا خوه ده یه، لێ به‌لێ ته‌ڤ ده‌ستهلات ژێ هاتنه سته‌ندن، مایینا مه‌زلووم ب كوالیسیونا ناڤنه‌ته‌وی ئا دژی داعشێ ڤه عه‌لاقه‌داره، ژ به‌ر كو هه‌ڤپه‌یمان بژلی مه‌زلووم نه‌ئاماده‌نه سه‌ره‌ده‌ریێ ل گه‌ل تو كه‌سێن دن بكن.
ئاگاهیێن مه ده‌ست نیشان كرنه كو نێز بوونا مه‌زلووم ژ هه‌رێما باشوورێ كوردستانێ، حكوومه‌تا باشوور یێك ژ سه‌ده‌مێن سه‌ره‌كه یێن فه‌رمانا گوهه‌راندنێ بوون.
ل رۆژێن رابووری و به‌را جڤینا كۆنسه‌یا په‌كه‌كێ، قه‌ندیلێ هشیاری دا بوو مه‌زلووم، ژ به‌ر ڤێ سه‌ده‌مێ جه‌نه‌رال مه‌زلووم ل رۆژا 10 جۆتمه‌هێ ئه‌ڤ یێك ل تویته‌را خوه نڤیساندبوو:
«رێبەر و هزرمەند عه‌بدوللا ئۆجالان دامەزرینەرێ فکرا هەڤژیانا ئازادە، كلیلا چارەسەری و ئاشتییا رۆژهلاتا ناڤین د دەستێ وی ده یە، ئازادکرنا رێبەر ئاپۆ وێ ئاشتییا دۆمدار ل په‌ی خوه بینه».
یا راست ئه‌ڤ هه‌ولا مه‌زلووم یا په‌سن دایینێ ب عه‌بدوللا ئۆجالان ژ بۆ وێ بوو كو ووسا خوه نیشان بده كو هێژان مریدێ په‌كه‌كێ یه.
په‌كه‌كه چما ژ مه‌زلووم عاجز بوو؟
رێخستنا په‌كه‌كێ ژ ده‌ما ده‌ركه‌تنا ناڤێ مه‌زلووم وه‌كه جه‌نه‌رال، هه‌ر وها ناسیاربوونا وی، پڕ ژێ عاجز بوو، ته‌یبه‌ت ته‌ڤگه‌ریانا وی یا ب ئامه‌ریكییان ره و هه‌روه‌ها جڤاكا ناڤنه‌ته‌وه‌یی ئه‌و وه‌كه نوونه‌رێ كوردێن رۆژئاڤا كورستانێ ناس كر، زێده‌باری ڤێ نێز بوونا وی یا ژ هه‌رێما باشوورێ كوردستانێ و سپاس كرنا وێ ژ بۆی سه‌رۆكێ باشوورێ كوردستانێ نێچیرڤان بارزانی، عاجزییا په‌كه‌كێ گهانده لۆتكێ.
رێخستنا په‌كه‌كێ ژ بۆ كو رێ ل به‌ر مه‌زلووم بگره، توهمه‌ت ژ بۆی چێكرن و هه‌ر وها هه‌ولا ته‌رۆر كرنا وی دا، لێ به‌لێ ئامه‌ریكییان زێره‌ڤانی ل مه‌زلووم دكر، لۆما ئه‌ڤ پیلانا په‌كه‌كێ راستی شكه‌ستنێ هات.
په‌كه‌كێ دگۆ: مه‌زلووم ل گه‌ل ئامه‌ریكییان و باشوورێ كوردستانێ ل دژی رێخستنا په‌كه‌كێ كه‌تییه ته‌ڤگه‌رێ، ژ به‌ر ڤێ په‌كه‌كێ رێ ل به‌ر هه‌موو هه‌نگاڤێن مه‌زلووم گرتن و نه‌هشت دانوستاندنێن رۆژئاڤا ژی ئێنجامان بگرن.
پاش ئێریشا داگیركه‌رییا تركیێ یا ل سه‌ر رۆژئاڤایێ كوردستانێ، مه‌زلووم عه‌بدی كو ب «كۆبانی» ژی تێ ناس كرن، بێی رێڤه‌به‌رییا په‌كه‌كێ هه‌لوه‌ست گرت و ل گه‌ل رووسیا و تركیێ په‌یمان ژ بۆی راوه‌ستاندنا شه‌ر چێكر، ڤێ یه‌كێ ناڤوده‌نگییا مه‌زلووم چێكر و ل هنه‌ك ناڤه‌ندان ئه‌و وه‌كه قاره‌مانه‌كی نه‌ته‌وه‌یی ناسكر.
پشتره ل سالا رابووری ژی، ب هه‌ولێن ئامه‌ریكا و فرانسایێ، مه‌زلووم ل گه‌ل ئالیێن كوردستانی یێن رۆژئاڤا ده‌ست ب دانوستاندنان كر و ئه‌ڤ یێك بۆ هێڤی كو قووناغه‌كه نوو ئا ژیانا سیاسی ل رۆژئاڤا ده‌ست پێ بكه، ئه‌ڤ یێك و ل گه‌ل پێوه‌ندیێن مه‌زلووم یێن ل گه‌ل سه‌ركرداتییا سیاسی یا هه‌رێما باشوورێ كوردستانێ بوون سه‌ده‌م كو په‌كه‌كه ژێ عاجز ببه، یا راست په‌كه‌كه د ترسییا ئه‌و ل رۆژئاڤا ب ڤان لڤ و ته‌ڤگه‌رێن مه‌زلووم بێ باندۆر ببه، ژ به‌ر كو ئامه‌ریكییان ژ مه‌زلووم خوه‌ست بوو كو په‌كه‌كه ژ رۆژئاڤا وه‌ره ده‌رخستن.
یێك ژ سه‌ده‌مێن دن یێن عاجزبوونا په‌كه‌كێ ژ مه‌زلووم، «سه‌بری ئۆك» یێ به‌رپرسێ ئیستخباراتا په‌كه‌كێ و ئەندامێ کۆنسەیا رێڤەبەر یا کەجەکێ ل رۆژئاڤا بوو كو ب فه‌رمانا مه‌زلووم، ژ رۆژئاڤا هاتبوو ده‌رخستن.
مه‌حموودێ ره‌ش كی یه؟
مەحموودێ رەش یەک ژ فەرماندارێن پەکەکێ یێن ل رۆژئاڤایێ کوردستانێ یە، ل سالا 1986ێ تەڤلی رەفێن پەکەکێ بوویە، ل رۆژئاڤا هن بەرپرساتیێن مەزن وەرگرتنە، یەک ژ فەرماندارێن بەرپرسیار ژ شکەستنا عەفرینێ بوویە، ئەو ب مەحموودێ جەبلخانەچی ژی تێ ناسکرن، ب یەک ژ کادرۆیێن پەکەکێ یێن هەری رادیکال تێ ناسین، هن جاران د مەدیایا پەکەکێ دە دەرکەتیە و ل دژی حکوومەتا هەرێما کوردستانێ و پێشمەرگەیان گەف خوارنە، داوی جار مەحموودێ رەش راگهاندبوو، «گەر پێشمەرگە هێرشی هەرێمێن گەریلایان بکە، ئەمێ بێئالی نەمینن، دیارە کو ئەمێ کێ بپارێزن».
پێگه‌ها «داركا مازی» ژ ده‌ستپێكا وه‌شانا خوه ل سالا 2019ێ، چه‌ندین مژارێن نهێنی ل سه‌ر ناكۆكیێن مه‌زلووم و قه‌ندیلێ و هه‌روه‌ها هه‌ولا ته‌رۆر كرنا وی، هه‌ر وها ئێریشێن بێئه‌خلاق یێن مه‌حموودێ ره‌ش ل سه‌ر باشوورێ كوردستانێ و پێشمه‌رگه‌هان به‌لاڤ كر بوون، ئه‌ڤ ژی لینكێن وان مژارانه.
