«پەکەکە پرۆژەیەک بۆ ژ ناڤ برنا بزاڤا نەتەوهیی یا کوردان»، ناڤ و نیشانێن لەکۆلینەک گرینگه کو یەک ژ نڤیسکارێن کورد ل وەلاتێ غەریبیا ب ناڤێ «جەمیل کولاهی» ئەنجام داییە و پشتره د پرتووکەکێ دە هەر ب ڤی ناڤی بەلاڤ کرییە.
ژ بەر گرینگییا ڤێ لەکۆلینێ و ئەو رۆلا کو دکارە د راستییا ناس کرنا راستیێن پەکەکێ و عەبدوللا ئۆجالانێ سەرۆکێ ڤێ رێخستنێ دە هەبە، پێگەها «دارکا مازی» وێ بخە د چەند گۆتاران دە، بەشێن گرینگ یێن ڤێ پرتووکێ بێخە بەرچاڤ و دیتنا خوێنەرێن خوە یێن برێز.
ئەم د وێ باوەرێ ده نە کو ئەڤ لەکۆلین دکارە ژ بۆ نێزی بوون ل سەرەکەترین ئارمانجا پێگەها «دارکا مازی» ئانکو چێکرنا جەوەکە هزری ئێ باش ژ بۆ سەرخوەبوون و رزگارییا کوردستانا پیرۆز، رۆلەک پۆزەتیڤ هەبە و وان خەتەرەیان زیدەتر زەلال بکە کو فەلسەفەیا ئاپۆچیتیێ و ستراتەژییا پەکەکێ ل سەر دامەزراندنا دەولەتا سەربخوە یا کوردستانێ و رزگارییا نەتەوهیی یا کوردان دروست دکن.
پرتووکا «پەکەکە پرۆژەیەک ژ بۆ ژناڤبرنا بزاڤا نەتەوهیی یا کوردان»، لەکۆلینەک ل سەر ئایدۆلۆژی و دیرۆکا پارتییا کارکەرێن کوردستانێ، بالێ دکشینە سەر ناڤەرۆکا ئاپۆئیزم و دیرۆکا پەکەکێ ل هەر 4 پهرچەیێن کوردستانێ و 4 بەشێن ژیاننامەیا ئۆجالان، «ئاپۆئیزم، دیرۆکا پەکەکێ و دیرۆکا پەکەکێ و ئاپۆئیزم و ژن ب خوە» ڤەدگرە.
«نها کو رۆژهلاتا ناڤین تەڤلیهەڤ بوویە و دەولەتێن داگیرکەر ل سەر لێڤا هلوەشینێ دانە، تاکە ئیدۆلۆژیەک کو ل سەر ئەساسا کورد بوونێ کو ستراتەژییا پێکئانینا دەولەتا نەتەوه هەبە، دکارە د خزمەتا کوردان دە بە. ئیدۆلۆژیەک کو دبیژە کوردان قۆناغا دەولەت نەتەوە دەرباس کرییە و ل دژی سەرخوەبوونا کوردستانێ یە تو جوداهییەک دگەل داگیرکەرێن کوردستانێ دە نینە و ژ وان پێتر بۆ پێشەرۆژا کوردستانێ خەتەرەیە، ژ بەر کو ئەڤ ئیدۆلۆژییە د ناڤا بەشەکی ژ بزاڤێن کوردی دە و ل دژی گۆتارێن نەتەوهیی ئا کوردان سەرهلددە کو دبە سەدەما ژ هەڤ قوت کرنا هێزا کوردان و پار ڤەکرنا وان ل سەر دو ئالیێن ب تەمامی دژی هەڤ، ئەڤ ناکۆکییا ئیدۆلۆژیک خەتەرەیەک پڕ مەزنە ل سەر پێشەرۆژا بزاڤا کوردان و هێزا کوردان د ناڤ خوە دە ژ ناڤ دبە، پرسگرێکا د ناڤبەرا هەر دو ئالییان ده ئەوقاس کوورە کو تو خالەکە هەڤبەش د ناڤبەرا وان دە نینە و ب تەمامی ل دژی ستراتەژیێن هەڤدونە، ژ بەر ڤێ یەکێ خەتەر هەیە ئەڤ شەرێ چاپەمەنیێ کو نها هەیە ببە دەستپیکەک ژ بۆ شەرێ ناڤخوەیی».
نڤیسکار ل وێ باوەرێ یە پەکەکە ب دیتنەکە پڕ ژ پارادۆکس دخوازە هەڤدەم دگەل ڤێ یەکێ کو هەڤپەیمانەکە نێزیک ئا داگیرکەرێن کوردستانێ یە، خوە وەکە رزگارکەرا کوردستانا بندەستا وان داگیرکەران نیشان بدە، پەکەکە هەموو رۆژان ل دژی بزاڤێن نەتەوهیی یێن پورچەیێن دن ئێن کوردستانێ پرۆپاگندهیان دکە، پارتییان ژ بۆ وان ئاڤا دکە و شەرێ ب وەکالەت ئێ ولاتان ب بهایێ رێشتنا خوینا جوانێن کورد دکە، ژ بەر ڤێ یەکێ د نڤیسینە نها ژی پڕانییا گەلێ کوردستانێ پەکەکێ ب رێیا دەزگەهێن وێ یێن چاپەمەنیێ ناس دکن، لێ پەکەکە ب خوە بەرەڤاژی وێ یە ئهوا کو د چاپەمەنییا وێ دا تێ ناس کرن، خوە ئەندامێن رێخستنێن نهێنی یێن پەکەکێ ژی کو ل پهرچەیێن دن ئێن کوردستانێ دە پرۆپاگندایێ ژ بۆ پەکەکێ دکن راستیێن ڤێ پارتیێ ژ بۆ خەلکێ دیار ناکن، بۆ میناک ل رۆژهلاتێ کوردستانێ تەکۆشینێ دکن ب رێیا ناکۆکیێن ئۆلی و زاری هیزێ ژ بۆ پەکەکێ پەیدا بکن.
عهبدوللا ئۆجالان شیعهیه
ل باژارێ کرماشانێ وها پرۆپاگنەیان دکن کو ئاپۆ شیعە یە و بزاڤا نەتەوهیی یا رۆژهلات سوننە یە و ل دژی شیعهیانە و پەکەکە خوە مەراسیمێن تاسووعا و عاشوورایێ ژی وێ ژ رەژێما ئیرانێ باشتر برێڤە ببە، هەر ئەو گرۆپ دەما تێ سنە یان مەریوانێ، جارەکە دن ئاپۆ دکن سوننە مەزهەب و ب ئاوایەک دن ل دژی بزاڤا رۆژهلاتێ کوردستانی دئاخڤە، د ناڤا هەورامی و یارسان و ناڤچەیێن کرمانجی ژوور، تاکتیکا وان تێ گوهەرین و دخوازن ب دروست کرنا پلاتفۆرمان وان ژ کوردێن رۆژهلات قوت بکن.
فەلسەفەیا هەبوونا پەکەکێ ل رۆژهلاتێ کوردستانێ، ژ بۆ کۆمکرنا هیزێ یە نە ژ بۆ رزگارییا کوردستانا رۆژهلاته، ژ بەر کو کۆمارا ئیسلامی یا ئیرانێ ل پشت بهرهیێ پەکەکێ یە و ئەگەر مەبەستا پەکەکێ ئازادییا رۆژهلاتێ کوردستانێ بایە، ب پشتراستی رەژێما ئیرانێ رێ ب چالاکیێن وێ نەددا، رەژیم بۆ ژ ناڤ برنا گۆتارا نەتەوهیی و ناسیۆنالیزمی یا کوردان د 3 گۆتارێن رەفۆرمخوازی، ئیسلامی و پەکەکهیی سوودێ دبینە، لێ بەلێ گۆتارا پەکەکێ ژ بەر کو هەڤجنسا بزاڤا کوردانە و پێش نها گۆتارا سەرخوەبوونخوازیێ هەبوویە ژ هەموویان خەتەر ترە و نەتەنێ تو خەتەرەیەک ل سەر رەژیما کۆمارا ئیسلامی یا ئیرانێ نینە، بەلکو رەژێم ب ڤێ رێ یێ خەباتێ دکە بزاڤا نەتەوهیی یا کوردان ل رۆژهلاتێ کوردستانێ ژ ناڤ ببە، رەژێم ب بکارئانینا ڤێ کورداتییا ب دەست چێکری دخوازە کورداتییا رەسەن کو ریهێن وێ د دیرۆکا کوردان دە هەیە ژ ناڤ ببە.
