پەکەکە پرۆژەیەک بۆ ژناڤبرنا بزاڤا نەتەوه‌یی یا کوردان -7

پەکەکە پرۆژەیەک بۆ ژناڤبرنا بزاڤا نەتەوه‌یی یا کوردان -7
  • بەشا حەفتێ

بەشەکێ پەرتووکا «پەکەکە پرۆژەیەک بۆ ژناڤبرنا بزاڤا نەتەوەیی یا کوردان، لێکۆلینەک ل سەر ئایدیا و دیرۆکا پارتییا کارکەرێن کوردستانێ» ژ نڤیسینا جەمیل کولاهی

قۆناغا چارێ ژ ژیانا ئایدۆلۆژی یا ئۆجەلان

د قۆناغا چارێ دا گوهرینەکا ئەساسی ل سەر ئۆجەلان دروست دبیت. ژ پشتا خوە دانە کوردستانا سەربخوە و دەولەتا کوردی بگرە حەتا دگەهیتە نێرینا وی ل سەر دایک و بابێ وی. ئەو ژ کارێن خوە یێن سەردەمێ زارۆکاتیێ پووشمانە و هەموو خەلەتیێن خوە تێخیتە ستوویێ مۆدەرنیتەیا کاپیتالیزمێ.

ئۆجەلان د قۆناغا “بۆکچینیزم” دا ب تەمامی دهێتە گەهورین و دبێژیت: ” پێویست دکەت دانپێدانێ ب ڤێ چەندێ بکەم کو د بەشەکێ ژ ژیانا خوە دا ئەز تووشی نەخوەشییا مۆدەرنیتەیێ بووم و من خاست ژ دەست هەموو تشتەکێ ڤی ولاتی، خۆ داییک و بابێ خوە برەڤم… چوونە باژێری و رەڤین ژ گوندی وەکو گوننەهەکێ دبینم.” ئۆجەلان د درێژاهیا ئاخفتنا خوە دا دبێژیت: “خاستەکا ئیدۆلۆژیکی یا من دگەل دابپێدانکرن ب ڤێ حەژێ کرنێ و گوننەها سەردەمێ زارۆکاتیا من د پەیوەندیێ دا یە…” «ئۆجەلان: 2009 رووپەل 47 و 48».

 نڤیسەر ل سەر ڤێ باوەرێ یە د هەلسەنگاندنا ڤان دو شێوازێن وەسفکرنێ دا دو جور ئیدۆلۆژی خوە دیار دکەن. د یا ئێکێ دا ئۆجەلان رێبەرێ پارتیەکێ بوویە کو مژوولی شەرێ چەکداری و ئاڤاکرنا دەولەتا کوردی بوو، د یا دویەمین دا ئۆجەلان رێبەرەکە کو باوەری ب دەولەتا کوردی و شۆرەشا سۆسیالیستی نەمایە و هەموو ب (ئاڤ کرنە د ئاشتێ سیستەمێ کاپیتالیزمێ دا) دزانی! هەر ژ بەر ڤێ یەکێ رەفتارێن خوە یێن خراب تێخیتە ستۆیێ مۆدەرنیتەیا کاپیتالیزمێ و ژ بۆ بەدەلڤەکرنا وان دخازیت سیستەما ئیکۆلۆژیکی ئاڤا بکەت.!

ئۆجەلان دبێژیت: “ژ 9ی ئۆکتۆبەرا سالا 1998ێ کو د رێیا ئەسینا دا ژ بۆ ئەورۆپایێ دچووم، نێرینا مۆدەرنیتێ د ناڤا هزر و نێرینا من دا شکەستن ئینا”. ئەو دبێژیت: “ئەز دانپێدانی ب ڤێ چەندێ دکەم کو ئەز نەشیام دۆگمبوونا نەرینا خوە ل سەر شارستانیەتا تەبەقی (چینایەتی) ب گشتی و ب تایبەتی کاپیتالیزمێ وەکو پێشکەفتی ترین قۆناغا وێ شارستانیەتێ و سیاسەت و رێکارێن ریال سۆسیالیزمێ کو ئیدیعایا جیهگرتنا کاپیتالیزمێ دکر، دەرباس بکەم. هەرچەند ئیسلام و مارکسیزم د ئەساس دا خوەدی رێبەراتی و ئیدۆلۆژیەک جودانە، لێ بەلێ د راستی دا د رێیەکا دۆگمە دا کەتم ناڤا رێیەکا دۆگم یا دی دا. د ڤێ دوماهیێ دا هەم هزرێن دینی و نەتەوی و هەم باسکێ چەپ و راست د جیهان و د رۆژهلاتا ناڤین دا ژی هاریکارێن هیزا ئیدۆلۆژییا کاپیتالیزمێ نە. «ئۆجەلان: 2003 رووپەل 8 و 21 و 22».

ئۆجەلان دبێژیت گوهرینا ئیدۆلۆژییا من ب رەنگەکێ گەلەک ئاشکەرا د شرۆڤەکرنا سیاسەتێ، دەولەت و شارستانییەتا سەردەم دا هاتییە وجودێ. ب باوەریا ئۆجەلان پێویستیا ئاڤاکرنا جڤاکێ ئیدۆلۆژیک ب پشتەڤانییا زانستی رۆژ ل دیڤ رۆژێ ئاشکەرا دبیت. «ئۆجەلان: 2003 رووپەل 22 و 23».

ئۆجەلان: فەئۆدالیزما ئیسلامی و کاپیتالیزما نەتەوی هندەک تشتن کو پێویستە کورد ژێ دەرباس ببن.

ئۆجەلان دبیژیت: “پیویستە پرسگرێکا کوردان و رێیێن چارەسەرکرنێ یێن گرێدایی پێڤە ل سەر ئەساسێ ڤێ گوهرینێ (جڤاکا ئیدۆلۆژی)، بهێنە شرۆڤەکرن و هەلسەنگاندن. هەم رێیێن چارەسەرکرنێن کلاسیکی یێن ئیسلامی یێن رۆژهلاتا ناڤین و هەم ژی رێیێن چارەسەرکرنێن رۆژئاڤا د دەمەک زوو دا راستی شکەستنێ هاتینە. رێیا چارەسەرکرنا پرسگرێکا کوردان د گوهەرین و پێشکەتنا ئیدۆلۆژییا من دا ب رەنگەکێ راست و درست دەرکەتیە.. ژبەر ڤێ چەندێ رێیا چارەسەرکرنا پرسگرێکا کوردان نە ئیسلامی یە نە نەتەوی. فەئۆدالیزما ئیسلامی و کاپیتالیزما نەتەوی هندەک تشتن کو پێویستە کورد ژێ دەرباس ببن. «ئۆجەلان: 2003 رووپەل 24 و 25».

د قۆناغا چارێ دا ئۆجەلان حەتا وی رادەی پێشڤە چوویە کو دبێژیت: “ئارمانج ژ شۆرەشا نوو ئاڤاکرنا دەولەتێ یان ژی شارستانیەتا تەبەقی نینە، بەلکو وەکو ئەلتەرناتیڤا وان دەردکەڤیت. ئارمانجا بێ دەولەت بوونێ و بێ تەبەقەبوونا جڤاکی بگرنە پێش و ب هەبوونا پەیوەندیێن کوور د گەل زانست، جڤاکا ئیدۆلۆژیک دگەل گییا و گیانەوەران بخولقینن. ژ بەر ڤێ چەندێ گەر د ڤێ راستیێ دا شۆرەشا خوە ب (شۆرەشا ئیدۆلۆژیک و دەمۆکراتیک) ب ناڤ بکەین، راستترە”. «ئۆجەلان: 2009 ، 26».

ئۆجەلان کو د قۆناغا بەرێ دا وەکو مارکسیست-لینینیستەکێ ئۆرتۆدۆکس دەردکەڤیت، د قۆناغا چارێ یان ژی بوکچینیزمێ دا ب توندی رەخنەیان ژ مارکس دگریت و دبێژیت ب ئاستێ پێویست زەلال بوویە کو سۆسیالیزما مارکس-ئەنگلس کو وەکو بووچوونا دژبەرا (سیستەما کاپیتالیزمێ) دەردکەڤیتە پێش، لاوازترین شرۆڤە د جڤاکی دا یە و بەرەڤاژی هەموو ئیدیعایان، زیدەتر ژ هەر لیبرالیزمەکێ خزمەت ب کاپیتالیزمێ کریە. «ئۆجەلان: 2009 ، 11».