• بەشا پێنجێ

بەشەکێ پرتووکا «پەکەکە پرۆژەیەک بۆ ژناڤبرنا بزاڤا نەتەوەیی یا کوردان، لێکۆلینەک ل سەر ئایدی و دیرۆکا پارتییا کارکەرێن کوردستانێ»

ژ نڤیسینا –  جەمیل کۆلاهی

ئاپۆئیزم و ژیانا ئایدۆلۆژی یا عه‌بدوللا ئۆجالان

ژبەرکو ئاپۆئیزم پێک دهێت ژ هزر و بیر و باوەرێن ئۆجالانی، پێدڤییه‌ ژ بۆ شرۆڤەکرنا ڤێ ئایدۆلۆژیایێ، بالێ بكێشینه‌ سەر ژیانا ئایدۆلۆژی یا ناڤبری، عه‌بدوللا ئۆجالان دبێژیت: “پەکەکە ئانکو ئاپۆ” «ئۆجالان: 2008 رۆپەل 186» و دبێژیت: “پەکەکە مالباتا منە” «ئۆجالان: 2002 رۆپەل 144».

ژیانا ئایدۆلۆژی یا عه‌بدوللا ئۆجالان ل سەر 4 قۆناغێن جودا دهێته‌ دابه‌ش كرن:

• قۆناغا پێش دامەزراندنا پەکەکێ: ئۆجالانێ ئیسلامی

• قۆناغا پشتی دامەزراندنا پەکەکێ: ئۆجالانێ مارکسی – لینینی

• قۆناغا ناسیۆنالیست – سۆسیالیست

• قۆناغا پاش دەستەسەرکرنا ئۆجالان: بووکچینیزم

قۆناغا یەکەمین ژ ژیانا ئایدۆلۆژی یا ئۆجالانی

ئۆجالان هەر ژ دەستپێکا زارۆکینیێ کەسەک ئیسلامی بوویە، ب ئاخفتنا وی ب خۆ ل قوتابخانێ مەلایەکێ باش بوویە و هەتا ئاستێ پێشنڤێژێ گوندێ خۆ چوویە پێش، پاشان ب ئاخفتنا وی ب خۆ دەما کو ل ئەنقەرەیێ قۆتابی بوویە پرتووکا «ئەڤە دین» ژ نڤیسینا سەیید قوتب دخوینیت هەتا دەمەکی هەموو بیاڤێن ژیانا خۆ ل سەر ئامۆژگاریێن ڤێ پرتووکێ رێكئێخستینە، ل ئەنقەرەیێ ب بەردەوامی سەرەدانا مزگەفتا «مال تەپە» دکەت و دبێژیت، من ب کەلەجانەک بێ میناک د کۆنفەرانسێن «نەجیب فاسل کساکۆرەک» ئیدئۆلۆگ و ئیسلامیستێ ترک بەشداری دکر. «ئۆجالان: 2008 رۆپەل 28، 37، 22». هەروەها دبێژیت: “هێڤییا من یا یەکەمین بەردەوامیدان ب خواندنێ بوو ل قوتابخانه‌یێن ئۆلی، من بۆ خۆ دگۆت دڤێت ئەز بچم زانینگەها ئەزهەرێ.” «ئۆجالان: 1996 23، 22».

ئەڤ پاشخانا ئیسلامی یا ئۆجالان خوە دەما کو سەرۆکێ پەکەکێ یە «کو پارتییەکا ل سەر بنەمایێن مارکسیزم – لینینیزم هاتییە ئاڤاکرن» بەرۆکا وی بەر نادەت، ئەو دبیژیت رۆژهلاتا ناڤین دەرکەتنەک پێغەمبەرانە دڤێت و رێبەرێن ڤێ ناڤچەیێ پێدڤییه‌ پێغەمبەر بن.!

ئۆجالان دبێژیت: گەر پەروەردە ب شێوازێ جیهادا ئەکبەر نەبایە، وی دەمی دا پێغەمبەرێ ئیسلامێ ژی راستی شکەستنێ هێت، ژبەر ڤێ یەکێ من ژ بۆ رێبەریکرنی، شێوازێ حەواریوونێن عیسا و خیلافەتا موحەمەد پێغەمبەرێ ئیسلامێ هه‌لبژارتییە، «ئۆجالان: 2008 106، 114». ئۆجالان شیوازێ سەرۆکاتییا خۆ و دروست نەبوونا کەسێ دویەمین و سێیەمین د ناڤا پەکەکێ دا ڤەدگەرینیت‌ بۆ پەروەردەیا خۆ و رێبەراتیێ ل سەر بنەمایا جیهادی یا ئەکبەر و د ڤێ دەربارێ دا خۆ دگەل پێغەمبەرێ ئیسلامێ و خەلیفەیێن پشتی موحەمەد پێغەمبەر هەڤبەر دکەت!

قۆناغا دوویەمین ژ ژیانا ئایدۆلۆژی یا ئۆجالانی

دەستپێکا ڤێ قۆناغێ ڤەدگەریت بۆ خواندنا پرتووکا «ئەلف و بێ یا سۆسیالیزمێ» یا “لێئۆ هۆبێرمان”. د خواندنا پرتووکێ دا هەر چ قاس بەر ب پێش چوویە، د ڤێ یەکێ گه‌هشتییە کو «ئۆل راستی شکەستنێ هاتییە و مارکس سەرکەفتن ئینایه‌». ئۆجالان دبێژیت هەڤدەم هەڤالەکێ من یێ زارۆکینیێ کو ئالیگرێ “چەتین ئالتان” کەساتیێ چەپێ ترکیێ بوو ل سەر سۆسیالیزمێ دپەیڤی. ل سالا 1969ێ گه‌هشتییە ڤێ بریارێ کو ئایدۆلۆژییا به‌رێ “گەلەری” دێ راستی شکەستنێ هێت و هزرا سۆسیالیستی دێ سەرکەفتنێ ئینیت، “بریارا گوهۆرینا ئایدۆلۆژی”! «ئۆجالان: 2008: 39»

ئۆجالان دبێژیت: “پشتی کو من ئەڤ پرتووک «ئەلف و بێ یا سۆسیالیزمێ» خواندی، ئەز تێگه‌هشتم کو هزرا کۆمۆنیستێ ژ هزرا نەتەوه‌یی ب هێزتر بوویە، شێوازێ وان په‌یوەندیێن کو من دگەل دا شەر دکری، د ڤێ پرتووکێ دا هەبوون، ژ بەر ڤێ یەکێ  من بۆ خۆ دگۆت یاکو ئەز هەتا نها ل دووڤ دگەریام د سۆسیالیزمێ دا هەیە. «ئۆجالان: 2007- رۆپەل 31»

ئۆجالان هنده‌ د سۆسیالیزمێ دا چوویە پێش کو د بوهارا سالا 1978ان دە مانیفێستا رێیا شۆرشا کوردستانێ نڤیسی، د داوییا هەمان سالێ دا پەکەکێ ل سەر بنیاتێ ئایدۆلۆژییا مارکسیزم – لینینیزم ئاڤاکر.

ئۆجالان د ناساندنا پەکەکێ دا دبێژیت ئەم ل دژی دیکتاتۆرێن دی دای نه‌ وه‌ك دیکتاتۆری یا پرۆلیتاری و دیکتاتۆری یا مە ژی یا رەوایە ژ بەر کو بەرهەمێ تەکۆشینا تەخا کارکەر و رێنجبەرانە. «ئۆجالان: 2007- رۆپەل 31» پەکەکە پارتییا تەکەز کرنێ یه‌ ل سەر سۆسیالیزمێ و بزاڤا راست ژی سۆسیالیزمە. «ئۆجالان: 2002- رۆپەل 198، 240»

هەر چەند کو ئۆجالان ب توندی باس ل سۆسیالیزمێ دکەت لێ بەلێ د شێوازێ رێبەراتی کرنا پەکەکێ دا دیسان دەستێ خوە دبەته‌ گرتنا دەهمەنێ ئۆلین ئیبراهیمی. ئۆجالان دبێژیت: “مەکتەبا سیاسی، کۆمیتەیا ناڤەندی و سكرتارییا گشتی ل جەم من وەکە ناسناڤ و پر شەکلی دهاتن پێش چاڤ”. «ئۆجالان: 2008- رۆپەل 105، 106».