• بەشا شه‌شێ

بەشەکێ پرتووکا «پەکەکە پرۆژەیەک بۆ ژناڤبرنا بزاڤا نەتەوەیی یا کوردان، لێکۆلینەک ل سەر ئایدی و دیرۆکا پارتییا کارکەرێن کوردستانێ»

ژ نڤیسینا –  جەمیل کۆلاهی

قۆناغا سێیێ ژ ژیانا ئایدۆلۆژییا ئۆجالان، قۆناغا ناسیۆنالیزم – سۆسیالیزمێ

ئۆجالان د ڤێ قۆناغی دا جودا ژ ئایدۆلۆژییا مارکسیزم – لینینیزم، ناسیۆنالیزمێ ژی تێکه‌هه‌لی ئایدۆلۆژییا خۆ کرییە، ئەو د ڤێ ده‌ربارێ دا دبێژیت: «ل سالا 1974ێ د ده‌مەکی دا کو مژوولی دانانا هێلێن سیاسی یێن پەکەکێ بووم، من کۆنفرانسەک ئەنجام دا، د وی ده‌مێ دا من ل سەر دو پەیڤان كار دكر، کو “کوردستان کلۆنی یە” بوو و د ئاستەکی وەها دا نەبووم کو گه‌له‌ك ب زانین و رێختسی ب پەیڤم، لێ ب هەمبەر کرن د گەل خەلکێ نۆرمال ئەز د ئاستەکێ بلند دا بووم». «ئۆجالان: 2008 رۆپەل 53».

ئۆجالان ب هه‌لگرتنا تەکتیکی یا سلۆگانا «باکور، باشوور، رۆژهەلات یەک وەلات ویەک خەبات» ب ئاوایەکێ شەکلی ژ خوەسەری و فەدرالیزمێ ده‌رباز بوو و سلۆگانا سەرخوەبوونێ و کوردستانا یەک پارچە بلند کر، کو ئەڤه‌ نە ژ هێلا باوەرمەند بوونێ بوو ب سەرخوەبوونا کوردستانێ، بەلکو ژ بۆ کۆمکرنا هێزا زێده‌تر و دژاتی کرنا پارتیێن دی یێن کوردستانێ بوو، کو ل داویێ ئەو ب خوە ئێعترافێ پێ دکەت و د ڤێ پرتووکێ دا باس لێ دکەت، ئەو هه‌تا وی ئاستی دچیته‌ پێش کو پارتی و هێزێن دی یێن کوردستانێ ژ بەر کو سلۆگانێن سەرخوەبوونێ نینن، ب مامەلە کرن ل سەر مەسەلەیا کوردان تاوانبار دکەت و تەکئالی ب بال کێشانێ ل سەر حەز و داخوازییا سایکۆلۆژی یا نەتەوه‌یا کورد ئانکو سەرخوەبوونا کوردستانێ، پێنگاڤ ژ بۆ کۆنترۆل کرنا جەوێ سیاسی و رۆشەنبیری یێ کوردستانێ هاڤێتن، لێ پشترە «ئەو ب خۆ» د گرتیگەهێ دا بۆ دوژمنێ دامەزراندنا ده‌ولەتا کوردی.

ئۆجالان: ب ئاشکەرا دبێژم ئەز نە ئەو مرۆڤم کو د رێیا نه‌ته‌واتیێ دا ژیانا خۆ بێخمه‌ د خەتەرەیێ دا و ئەز ژیانا خۆ ژی د ڤێ رێكێ دا ناکه‌مه‌ قوربانی

ئۆجالان د بەرده‌وامیێ دا گەفا ل بزاڤا نەتەوه‌یی یا کوردان دكه‌ت و دبێژیت: «پەکەکێ راستی دیار کرن، ب ڤێ یەکێ بزاڤێن دی فۆنکسیۆنا خۆ ژ ده‌ست دا، ڤان بزاڤان دوو رێ زێده‌تر ل پێشییا وان نینن، یان دێ ڤان راستیان قەبوول که‌ن و ببنه‌ بەشەک ژ وان، یان ژی دێ ژناڤ بچن». «ئۆجالان: 2008 رۆپەل 62».

 هەڤده‌م ئۆجالان دبێژیت: «ئەز مرۆڤەک نەتەوەپەرەست نینم و ئەڤ یەک پڕ زەلالە، ئەگەر ل دووڤ خەباتا گەلێ کورد کەتبم ژبەر ڤێ یەکێ یە کو ئەز پر گرێدایی خەباتا تەپەسەرکرییا مە، ژ بەر ڤێ یەکێ نە کو ئەز کوردم، بەلکو ژ بەر کو کورد تەپەسەرکری نە، ئەز ژی نیشتیمانپەروەر و رزگاریخوازم، ب ئاشکرایی دبێژم ئەز ئەو مرۆڤە نینم کو د رێیا نەتەواتیێ دا ژیانا خوە بکه‌مه‌ د خەتەرەیێ دا و ئەز ژیانا خۆ ژی د ڤێ رێكێ دا ژی ناکه‌مه‌ قوربانی». «ئۆجالان: 1996، 46»

هه‌ژی ئاماژە پێدانێ یە کو بنەمایێن گوهۆرینا ئۆجالان د ڤێ قۆناغێ دا ده‌ست پێ دکەت، ژ بەر کو هەڤده‌م دگەل ڤێ یەکێ کو پەکەکە سلۆگانا کوردستانا یەکپارچە و سەرخوەبوونا کوردستانێ هه‌لگرتییە، ئۆجالان سەرخوەبوویی خوازییا پەکەکێ دبەته‌ ژێر پرسیارێ، دیارە د ڤێ قۆناغێ دا ئەلتەرناتیڤ نەبوویە، هه‌گەر نه‌ هەر دا د ڤێ قۆناغێ دا راگه‌هینیت.

ئۆجالان د هەڤپەیڤینەکێ دا دگەل ده‌یڤێد کرۆن دا دبێژیت: بانگەشە و پێداگیری ل سەر ڤێ یەکێ کو پارتییا مە رێخستنەکا سەرخوەبوون خوازە یان پارتییا مە هەر تشتەکی خۆ ئێخستییە د خزمەتا دامەزراندنا ده‌وله‌تا سەربخوه‌ دا، نەراستە و ئەڤه‌ مەزن کرنە، پلەبەندییا جور ب جورا ده‌ولەتێ ب ئاوایەکی رەها یان یەکپارچە یان سەربخوه‌ د گەل راستیێن جیهانا ئیرۆ دا ناگوجن، راستیێن ناڤ نەتەوەیی جودانە،  ب ل بەر چاڤ گرتنا ڤان راستییان زەلال دبیت کو باس کرن ل پەکەکێ كو ب هەر بوهایەکێ بیت سەرخوەبوون خوازە راست نینە. «ئۆجالان: 2002 رۆپەل 159، 162، 163».

هەتا ڤێ ده‌رێ بۆ مە زەلال بوویە کو ئایدۆلۆژییا ئۆجالان تێکەلەیەکە ژ ئیسلام، ناسیۆنالیزم و مارکسیزم – لینینیزمێ، ئەڤ قۆناغه‌ هەتا سالا 1999ێ و گرتنا ئۆجالان یا بەرده‌وام بوو، هەموو سیاسیەتێن پەکەکێ د سەرده‌ما شەری دگەل ترکیێ دا ل سالێن 80 و 90ان دا ژ سەدسالا 20ێ ل سەر هزرێ ڤێ قۆناغێ یێن ئۆجالان دهاتنه‌ سێرڤس كرن.