• بەشێ چارەمین

بەشەکێ پرتووکا «پەکەکە پرۆژەیەک بۆ ژناڤبرنا بزاڤا نەتەوەیی یا کوردان، لێکۆلینەک ل سەر ئایدی و دیرۆکا پارتییا کارکەرێن کوردستانێ»

ژ نڤیسینا –  جەمیل کۆلاهی

د ڤێ بەشێ دە وێ باس ل داوی برگە ژ “تیپۆلۆژییا رەفتار و شەخسییەتا ئۆجالان” کین و تیدە درێژاهییا لەکۆلینێن ل سەر هەولێن ئۆجالان ژ بۆ هەڤبەرکرنا خوە د گەل پێغەمبەران و هەر وەها شیوازێ ئاخافتنا ئۆجالان د گەل دەورۆبەرێن وی ئێخین بەرچاڤێن وە یێن برێز.

بەردەوامییا گرێکا پێغەمبەریێ

ئۆجالان دبێژە: د راستی دە بەرا سالا 1979ان دەولەتێ ژ بۆ ژناڤبرنا مە گەلەک هەول دان، من ژی فێم کربوو کو ب وی تەرزێ بەرێ ئەم نکارن سەرکەڤن… من دوو رێ هەبوون: یان بچم سەرێ چیایان، یان ژی چوون ژ بۆ رۆژهلاتا ناڤین، من بەرێ هنەک هەڤالێن خوە دا چییا، ئەو کارێ حەزرەتێ ئیبراهیم کری من ژی کر و بەر ب رۆژهلاتا ناڤین ب رێ کەتم، بەر ب قودسێ، ژ بەر ڤێ یەکێ یە کو دبێژم حەزرەتێ ئیبراهیم د وی باژارێ کو ئەز تێدە ژ داییک بوومە، سەریهلدایە… نەمروود و کەسێن دن ژی ل ئۆرفایێ سەریهلدان، لێ بەلێ ئەز ئاپۆ مە نەنەمروود و کەسەکە دنم، ئەز ل سەر رێ یا پێغەمبەران تەڤگەرییامە، د دەمەکی دە کو نەمروود دیکتاتۆر بوو، سەرپێهاتییا من وەکە یا ئیبراهیمێ خەلیلە کو نەمروود رێیا کیستانا لێ گرت و ب نەچاری بەر ب باشوور ب رێ کەت، دگەل سەرپێهاتییا مووسا ژی هەڤشێوەیە، ب ڤی رەنگی د رۆژهلاتا ناڤین دە خوەجیهـ بووم، دەولەت هەرتم ل پەی مە دگەرییا هەیا کو دەربەیا 1980ان روودای، پشتی دەربەیێ فشارێن ل سەر مە زێدەتر بوون، 90٪ ژ هەڤالێن مە هاتن دەستەسەر کرن و ب تەنێ دگەل گرۆپەک بچووک دا ئەز کاریم بەرێ خوە بدم رۆژهلاتا ناڤین. «ئۆجالان: 2008، رووپەل 116 و 117»

ئۆجالان: “ئەز و ئیبراهیم ل ئۆرفایێ ژ داییک بووین، ئیبراهیم ل ئۆرفایێ سەرهلدان کر و بوو پێغەمبەر”

ل ڤڕ ئۆجالان پەکەکێ وەکە ئۆلێ ئیبراهیم ئێ سەدسالا بیست و یەکان ب ناڤ دکە و دبێژە: “ئەز و ئیبراهیم ل ئۆرفایێ ژ داییک بووین، ئیبراهیم ل ئۆرفایێ سەرهلدان کر و بوو پێغەمبەر”، ئۆجالان د ڤێ رستێ دە کو من ل سەری باسکرییە دبێژە: “ئەز ل سەر رێیا پێغەمبەران تەڤدگەرم”، ئەو باش فێم دکە گەر ئیدیعایا پێغەمبەراتیێ بکە، نابە وان پێغەمبەران رەد بکە، ژ بەر ڤێ یەکێ نە ب تەنێ وان رەد ناکە بەلکو ژ بۆ هەموو کارێن وان هێنجەتان دروست دکە و دبێژە: ئەز ژی وەکە وانم و سەرپێهاتیێن مە وەکهەڤن.

 ئۆجالان هەر وەها دبێژە: رێکخستنا بزاڤا عیسا یا سەردەم پێویستی ب ئەڤ لا و ئەو لایە، د راستی دە ژی لێکچوون سەیر ژی هەیە، لڤینا ئەسنییێن سەر دەما عیسا خوەدی هنەک تایبەتمەندییانە کو د بزاڤێن ژێر دەست پڕ نێزیکە، یەحیا لێکچوونەک زێدە دگەل بانگەشەکارێن سۆسیالیست دە هەیە، ئا سەیر تر ژ وان گرۆپا یەکەم ئا دامەزرینەرێن پەکەکێ 12 کەس بوون کو یەک یان دو سیخءر ژی د ناڤا وان دە بوون. «ئۆجالان: 2001، 365»

ل ڤر مەبەست ژ عیسایێ سەردەم ئۆجالان ب خوە یە کو پێویستە سەرهلبدە، رێخستنا نهێنی و ئەندامێن پەکەکێ وەکە ئەسنییان و یەحیا باس کرینە، ئا ژ ڤێ سەیر و سەمەرتر دبێژە دامەزرینەرێن پەکەکێ 12 کەس بوون کو وان وەکە 12 هەڤالێن عیسا کو ناڤێ وان “حەواریون” بوو وێنه‌ دکە، پشتی هنگێ باس ل سیخۆران دکە، د ناڤا حەوارییان دە “یەهوودا” سیخۆر بوو، د ناڤا 12 کەسێن دامەزرینەرێن پەکەکێ ژی “فاتیمە” هەڤژینا ئۆجالان و “نەجاتی کایا” کو پیلۆت بوو و ب گۆتنا ئۆجالان سیخۆرێن دەولەتا ترکیێ بوون کو پاشان ب هوورگلی لس ەر وان دئاخڤە.

ئۆجالان خوە دگەل پێغەمبەرێ ئیسلامێ هەڤبەر دکە

ئۆجالان بەردەومە ل سەر هەڤبەرکرنا خوە دگەل پێغەمبەران هەیا کو دگەهە محەمەد پێغەمبەرێ ئیسلامێ، ئەو د ڤێ دەربارێ دە دبێژە: ژیانا حەزرەتێ محەمەد کێنجەک کوور ل سەر من هەبوویە و ژیانا وی گەلەک پرسیار ل جەم من چێکرینە، ژ بەر کو من ژی ل سەر چیا و شکەفتان دە ژیان کرییە، رەفتارێن من و وی گەلەک ژ هەڤ نێزیکن و لێکچوونەکی ئەز د رەفتارێن مە دە دبینم. «ئۆجالان: 2008، رووپەل 26»

6 شێوازێن ئاخافتنا ئۆجالان دگەل کەسێن دەردۆری وی

شیوازێ ئاخافتنا ئۆجالان د گەل دەردۆرێن وی خوە د دو تایبەتمەندیێن سەرەکە کو پێک دهێن ژ خوە ب مەزن زانین و گرێکا پێغەمبەریێ سەروکانیێ وەردگرن، ئەو ب ئاوایەکی د پەیڤە کو ئەو د سەر هەر کەسەکی دە یە و گەر ئەو نەبە وێ بەلایەک پڕ خەتەر بقەومە! ئۆجالان دبێژە کەسێن دەردۆرا خوە: هوون پەکەکێ وەکە مەیدانەکێ ژ بۆ بهێزکرنا خوە مێزە دکن، وەکە تشتەکی ژ بۆ بەدەلڤەکرنا کێموکاسیێن خوە و بێ دەستهلاتی و ئالۆزیێن خوە سوودێ ژێ وەردگرن… گەر نها رێبەرتیێ پێشکێشی باشترین خەباتکارێ پارتیێ بکم نزانم وێ د یەکەمین دەرفەت دە چ بکە؟ دبە بفرۆشە! ژبەر ڤێ یەکێ ئەز نەچارم پارێزڤانیێ ژێ بکم… ئەزێ ژ هەموو شیانێن خوە سوودێ وەرگرم داکو بکارم رێگریێ ل پارچه‌ كرنا نانەکێ ژی بگرم، لێ بەلێ هوون ب ملیۆنان هەدەر ددن، د ناڤبەرا چاڤ ل دارایی کرنا من و وە دە پڕ جوداهی هەنە، رەفتارێن وە د بیاڤێ دارایی دە وێ رێخستنێ د دەمەکە کورت دە هەلوەشینە، لێ بەلێ یا من وێ بەردەوامییا وێ مسۆگەر بکە… گەر رۆژەکی چاڤدێری ل سەر هەژمارەک زێدە ژ وە نەبە، د ناڤا پەکەکێ دە وێ ئەوقاس خوە مەزن نیشان بدن کو دێ بن کارەساتەک مەزن.. ئەشکەرەیە گەر پیچەکی دەری ڤەکین پیچەکی فشاران کێم بکین، هوونێ خوە ژناڤ ببن. «ئۆجالان: 2002- رووپەل 27، 28، 53، 82»

ئۆجالان ژ بۆ هەڤالێن خوە: هوون د ئاستەکی دە نینە کو ئیدیعایا شەرەفمەندیێ بکن

هوون د وێ ئاستێ دە نینن کو بکارن هەیا وێ رادەیێ «رادەیا ئۆجالان» ئازادییا دەستهلات و ئازادییا کریاران وە هەبە، خوە هوون د ئاستەکی دە نینە کو ئیدیعایا شەرەفمەندیێ و رزگاریێ د رەوشا خوە یا ب شەرم بکن، ئەز و پەکەکە جیاوازین، من کار ب ستوویێ خوە ڤە گرتینە و وان جی ب جی دکم، لێ بەلێ ئەڤ ب وێ رامانێ نایێ کو ب تەمامی وە شەرەف ب دەست خستییە و وە پێشرەوی کرییە بەر ب ئازادیێ و لایق بوونا چەک هلگرتنێ وە ب دەست خستییە. «ئۆجالان: 2002 رووپەل 83».

ئەو دبێژە “من د ژیێ 7 سالیێ دە خوە ئامادە کرییە، هوون د 23 سالیێ دە دگەهن وێ ئاستێ”… هەر وەها ل همبەر گەریلایان دبێژە: “تو هێژان نکاری دو بزنان بچەرینی، دەما دو رۆژە بوویە فەرماندارێ دەستەیەکێ یان گرۆپەکی یان فەرماندارێ ئەیالەتەکێ یان ناڤچەیەکێ، خوە دخاپینی… وە هێژان ئاگەهـ ژ ژیانێ نینە و واتەیا چەک، رێخستن و بەرخوەدان و راکێشانا مرۆڤەکی نزانن، هوون خوە تێخن جیێ رێبەریێ و سوپا و چەکداران بکارتینن، ئەڤ شاشتییەک پڕ مەزنە”. «ئۆجالان: 2002 رووپەل 84».

ئۆجالان د جڤینەکێ دە ل بەرانبەری گەریلا و رێڤەبەرییا پەکەکێ دە دبێژە: “یەک ژ تایبەتمەندیێن وە تێهنی بوونا وە یە ژ بۆ دەستهلاتێ و خولقاندنا رەوشەک خوەشە، ئەڤ یەک د شەخسییەتا وە دە هەیە یان ژی هوون ب ڤی ئاوایی مەزن بوونە، ئەڤ شێواز ئێ گرێدایی رەوشا مەزن بوونێ یە… گەر هوون ل جیێ من بانە یانژی دەستهلات و پلەیا من وە هەبایە، وێ دەمێ دا بەرانبەری خوە وەکە فەئۆدالەکی، باڤەکی یان زەلامەکی رەد کن، دا وی بن دەست کن یان ژی ب سۆزەک بێ بها وی خەندقینن… ئەز وها دفکرم کو ئێمانەتا بەر ب مەزنبوونا پەکەکێ هوون وەکە میراس خۆر لێکرینە”. «ئۆجالان: 2002 رووپەل 89، 193».

ل سەر قوت بوونا عوسمان ئۆجالان  ب ئاجزی ڤە دنڤیسینە و دبێژە: “عوسمان رۆلا کەرەکی هەیە کو ژ بۆ ناڤا مەیدانەک پڕ مین و تەقەمەنی وی پال ددن، کارێن وی ژ بلی بوون ب قرێژترین کەرەستەیێ دەست، تشتەکە دن نینە”! «ئۆجالان: 2008 رووپەل 334».

ئەمێ د بەشێ بهێت دە باس ل ژیانا ئایدۆلۆژی یا عەبدولا ئۆجالان بکین، یا کو ئالیگرێن وێ ب “ئاپۆئیزم” ناڤ دکن، داکو بزانین ئاپۆ ژ ئالیێ ئایدۆلۆژیێ ڤە، ب تو ئاوا ژ ئۆجالانەکە ئیسلامی دگەهە بووکچینیزم.