پەکەکە پرۆژەیەک بۆ ژناڤبرنا بزاڤا نەتەوی یا کوردان – 3

پەکەکە پرۆژەیەک بۆ ژناڤبرنا بزاڤا نەتەوی یا کوردان
  • بەشا سێیێ

بەشەکێ پرتووکا «پەکەکە پرۆژەیەک بۆ ژناڤبرنا بزاڤا نەتەوەیی یا کوردان، لێکۆلینەک ل سەر ئایدی و دیرۆکا پارتییا کارکەرێن کوردستانێ»

ژ نڤیسینا –  جەمیل کۆلاهی

نڤیسەرێ پرتووکێ، د بەشەکی لەکۆلینا خوە دە ب پشت بەستن ب نڤیسان و داخوەیانیێن شەخسێ عەبدولا ئۆجەلان، بابەتەک بەلگەیی ل سەر “تیپۆلۆژیا رەفتار و کەساتیا ئۆجەلان” د شەش برگەیان دە شیرۆڤە دکە کو د بەشا رابووری دە مە ئێماژە ب ٢ بەرگەیان کر و د ڤێ بەشێ دە دێ باس ل ٣ برگەیێن دن کین.

٣- دزیکرن و بەرتیل وەرگرتنا ئۆجەلان

یەک ژ وان فاکتەرێن کو بۆیە سەدەما کریارێن ئۆجەلان د دەما زارۆکتیێ و خوە ل دەما مەزن ژی بووی، هەژاریا مالباتا وی د وارێ ئابووری و فەرهەنگی دە بوویە و ژبەر برچیتیێ و بێ پەرەیی یێ ئەڤ کارانە ئەنجام دایینە. د ڤێ دەربارێ دە دبێژە مە ل دەستپێکێ نانێ جەهی هەبوو، لێ پاشان مە نان ب گەنمی چێکر. هێشتا من ئەو شەر ل بیرن کو من دگەل داییکا خوە کری ژ بۆ ب دەست خستنا پرتە نانەکی، ب دەست خستنا پرتەک نانێ زێدە د مالا مە دە وەکە ئارمانجەکی بوو. هەرچەند کو داییکا من نان ل جیەکێ دڤەشارت لێ ئەز ب دزی دچووم و من ژ خوە رە دبر. گەر وەکە پێویست نان ب دەست من نەکەتبا ئەز دچووم چوول و چیا و ریهێن گیا و فێقی من ژ خوە رە پەیدا دکرن و دخوارن و هنەک جاران ژی من دزی دکرن. ل گۆر ئاخافتنا وی ب خوە رۆژەکی چوویە ناڤا باغەکی مەرۆڤەکی خوە و ب دزی ڤە هنەک فستەق برینە، خوەدیێ باغی پێ دزانە، و ل وی دخە. «ئۆجەلان ٢٠٠٨ رووپەل ٢٠ و ١٦»

ئەو دبێژە: هنەک ژ فێقیێ وەکە تری و فستەقێن خوەدیێن مولک و مەرۆڤێن دەولەمەند من ددزین! تری و فستەق کو ب کەد و تەکۆشین و ریسک کرنێ من ب دەست دخستن ل جەم من ژ وان فێقیێن دن کو من بێ ت زەحمەت کشاندن ب دەست دخست پر ب بهاتر بوو! «ئۆجەلان ٢٠٠٨ رووپەل ٣٣»

دەما کو ل ئامەدێ کارمەندێ دەولەتێ بووی، خەلکێ ئەو ب عەبدولا بەگ بانگ دکر. وی جۆتکار پڕ ئێشاندینە و فەشارەک زێدە ل سەر وان دروست کریە! «ئۆجەلان ٢٠٠٧ رووپەل ١٤٦» ب ئاوایەکی کو جۆتکاران ژێ رە گۆتیە تە خوین ژ دفنا مە ئانییە. ئۆجالان دبێژە هەر ب راستی ژی وسا بوو، ئەو قاس من فەشار ل وان دکر کو وان خوهـ ددا «ئۆجەلان ٢٠٠٨ رووپەل ٣٩» هەر وها باس ل ڤێ یەکێ دکە کو ل ئامەدێ پر پەرە بدەست خستینە و ژ بۆ جارا یەکەمین فێری وەرگرتنا ریشوێ “بەرتیلێ” بوویە و پر ریشوە ژ جۆتکاران وەرگرتینە. ئەڤ یەک د دەمەکی دایە کو دبێژە ل ئامەدێ مەسەلا کوردان و سۆسیالیزمێ بەشەکی مەژیکێ من ب خوە ڤە مژوول کربوو! «ئۆجەلان ٢٠٠٨ رووپەل ٣٧ و ٣٨»

٤- تایبەتمەندیا خوە ب مەزن دیتنێ

خوە ب مەزن زانین یەک ژ تایبەتمەندیێن سەرەکە یێن ئۆجەلانە، ئەڤ تایبەتمەندی ب ئاوایەکی یە کو ئۆجالان خوە دبە رێزا پێغەمبەران و کەسێن ل دەردووری خوە ب کۆلە و بێ فام دزانە. گەر چاڤەکی ل پرتووکێن وی بگێرین وێ ببینین ئەوقاس کو پەیڤا “من” بکار تینە و دوبارە دکە کو مرۆڤی دبە دناڤا تێفکرینێ دە. د دو پرتووکێن وی دە هنەک رستە وەکە “من گرووپ دروست کر”، بابەتێ کردان ب تەنێ ب من وێ وەرە چارەسەرکرن”… ب زێدەیی ب بەرچاڤ دکەڤن. ئەو دبێژە: شەخسیەتا من ب ئاوایەک بێ میناک ب هێزە، «ئۆجەلان ٢٠٠٨ رووپەل ٢٢٢» نە دۆست و نە دوژمن نکارن ژ شەخسیەتا من بلندتر بچن، «ئۆجەلان ٢٠٠٨ رووپەل ١٥٢» دەرکەتنا من دژە کارەکە ل همبەر وان هەموو شووندەمایی یێن جڤاکی، ئەز رێبەرم و بەرامبەرم دگەل کوردستانێ. «ئۆجەلان ٢٠٠٢ رووپەل ٢٣ و ٢٥٠» هەر ژ رۆژا یەکێ هەیا نها، د وێ دەمێ دە کو من خوە ناسکری ب ئاوایەک بێ میناک ئەز زیندیکەر بوومە. «ئۆجەلان ٢٠٠٧ رووپەل ١٢٨»

٥-گرێکا پێغەمبەرتیێ

ئۆجەلان د خوەندنا دیرۆکێ دە ب بەردەوامی ل دووڤ وەکهەڤیێن خوە دگەل پێغەمبەران دە دگەری و ئەو ب پێغەمبەر بوونێ ب ئاوایەکی تایبەت تەئۆریزە دکە. ژ بۆ ڤێ یەکێ ل جیێ ژ داییک بوونا خوە دەست پێ دکە و وی جیهی وەکە جیهەک پیرۆز و گرینگ ل دیرۆکا مرۆڤاتیێ دە ددە ناساندن کو دکارە پیرۆزتیێ و گرینگیێ ب وان مەرۆڤێن ل وێ دەرێ ژیان دکن بدە. ئانکو د وارێ ئەردنیگاریێ دە خوە ب پێغەمبەران ڤە گرێ ددە. د ڤێ دەربارێ دە ئۆجەلان دخوازە ب هەر ئاوایەکێ بە خوە و پەکەکێ ب ئیبراهیم ڤە گرێ بدە. ئۆجەلان دبێژە ناڤچەیا رۆژهلاتا ناڤین دەرکەتەنک پێغەمبەرانە دخوازە، رێبەرێن ڤێ ناڤچەیێ پێویستە پێغەمبەر بن. «ئۆجەلان ٢٠٠٨ رووپەل ٧١»

ئەو باس ل ڤێ یەکێ دکە کو دەما بەرێ خوە ددە رابووری ژ بۆ من خوەیا دبە کو فۆرمەکە نووکری و پێگەمبەرەکی بەرۆژم. من و پەکەکێ تێکلداریەک ب هێز دگەل سەد سالا بیستان دە نینە. چما ب ئاوایەکی شەکلی و د ئاستا پەیڤێن پێویست ئێن رۆژێ د گەل ڤێ سەد سالێ من تێکلداری هەیە، وەکە شەخسەکی پێویستە ببێژم ت دەمان من نەکاریە دگەل روحا سەدسالا بیستان پێوەندیان دروست بکم. «ئۆجەلان ٢٠٠٧ رووپەل  ٤٤» پرانیا چاڤکانیان وەکە تەوراتێ دەما باس ل جیێ ژ داییک بوونا پێغەمبەرەکی ب ناڤێ ئیبراهیم دکن، ناڤێ باژارێ ئوور دئینن کو دبێژن ل کێلەکا رووبارێ فۆراتێ یە. هەرچەند کو چاڤکانی دبێژن باژارێ ئوور دکەڤە ناڤچەیا کلدانییان کو دبە بەشەک ژ ئاخا ئیراقا ئیرۆ ل باشوورێ رۆژهلاتێ بەغدایێ، ئۆجالان دبێژە ئوور ناڤێ ئۆرفایێ بوویە و ئیبراهیم ل ئۆرفایێ ژ داییک بوویە.

ئیبراهیم ب باڤێ ئۆلێن ئیبراهیمی کو پێک دهێن ژ خریستیان، یەهوودی و ئیسلام…رۆلا چاڤکانیا بدەست ئانینا مەشرووعیەتێ ژ بۆ وان ئۆلان هەیە. ئۆجالان ژ بۆ پێغەمبەر بوونێ پێویستی ب مەشرووعیەتەکێ هەیە کو ژ بۆ ب دەست خستنا ڤێ مەشرووعیەتێ هەوارا خوە بریە بەر چیرۆکا ئیبراهیم، لێ بەلێ ئۆجالان د ڤێ سەردەمێ دە ب هێسانی نکارە ببێژە ئەز ژی وەکە مووسا و عیسا و محەمەد ژ مالباتا ئیبراهیمم، ب نەچاری دەست ئاڤێتیە دیرۆک نڤیساندن و خوە وێناکرنێ ب ئیبراهیم پێغەمبەر و پیرۆز کرنا ئۆرفایێ. ب رادەیەک وەها کو پرتووکەک ب ناڤێ “ئۆرفا سەمبۆلا پیرۆزیێ’ نڤیساندیە.

ئۆجەلان دبێژە ئۆرفا ماکیتەک ژ جڤاکا رۆژهلاتا ناڤەراستە، گرینگی و جیهێ ئۆرفایێ ل رۆژهلاتا ناڤیندا وەکە واتەیا رۆژهلاتا ناڤین د هەموو جیهانێدایە. پەکەکە ل ئۆرفایێ، رەنگە ب بێ چاڤ خشاندن ل کووراتیا راستییا ئۆرفایێ دەست ب ئەزموونا خوە کربە. نییەتا ئالیگرییێ ژ ئازادییا زەلالکرنا راستیێ حاشا هلنەگرە.

یەکەمین ئێریشا وێ نە ژ بۆ سەر سازیێن دەولەتێ، بەلکو بۆ سەر ناڤەندێن کەڤنەشووپێن فەئۆدالیێ بوویە. گەلۆ ئەم دکارن ب بەرچاڤ وەرگرتنا ڤێ راستیێ، پەکەکێ وەکە بزاڤەکە سەردەم و نوو یا ئیبراهیمی ببینین. د دەربارا نیەتێ دە وەکهەڤیێن پڕ سەیر هەنە. ئیریش ژ بۆ سەر ناڤێندێن قرێژ  و نەمروودی تشتەک کو ژ بۆ پەکەکێ و ناڤجەیا ئۆرفایێ گرینگیەک پێتر هەیە، دەست پێ کرن یان دەست پێ نەکرنا پیرۆزیا نوو بوویی یا ئیبراهیم ل سەد سالا بیست و یەکان دایە. ب هیسانی دکارم ببێژم پەکەکە ب ناڤ و شۆناسا خوە یا بەرێ نەدکاری ل ناڤجەیێ گوهەرینان ئەنجام بدە و ئەڤ یەک د دیتنەک دیرۆکی دە تشتەک بێ واتە بوو. «ئۆجەلان ٢٠٠٧ رووپەل ٤٩ و ٧٠ و ٧٢»

پوستێن ھەمان بەش