په‌یوه‌ندیێن پەکەکێ و ئیرانێ، رابووری، نها و داهاتی

په‌یوه‌ندیێن پەکەکێ و ئیرانێ، رابووری، نها و داهاتی
  • به‌شێ ئێكێ

ئەساسێ پەیوەندیێن د ناڤبەرا پەکەکێ و کۆمارا ئیسلامییا ئیرانێ دا ب چ ئاوا دروست بوون؟

ئەو خوەپێشاندانێن کو ل 15/11/2019ان دە ل ئیرانێ هاتینە ئەنجام دان، هەر چەند کو وەها دهات نیشان دان کو ژ بەر بلندبوونا بهایێ پانزینێ نە، لی بەلێ د راستیێ دە ئه‌و هەلچوونەک جەماوەری بوو ل دژی سیستەما برێڤەبرنا ئیرانێ.

ئەڤ هەلچوونا جەماوەری، خالەکە وەرچەرخانێ بوو د دیرۆکا سیاسییا ئیرانێ دە و جارەکە دن پرسێن تایبەت ب رەوشا ناڤخوە یا ئیرانێ ئینان رۆژەڤێ دە.

گەر ئەم بخوازین شرۆڤەیەک بابەتییانە ژ بۆ رەوشا ئیرانێ بکین، دێ ژ بۆ مە زەلال بیت كو ل ئیرانێ دە ژی، رۆژهلاتێ کوردستانی د رۆژەڤێ دە یە، ژ بەر کو د ئیرانا فرەنەتەوە و فرەئایین دە، نووترین و رێخستیترین و ئەکتیڤترین دژبەرێن کۆمارا ئیسلامییا ئیرانی کو کار بۆ ژ ناڤ برنا ڤێ رژێمێ دکن، د ئەتیمۆلۆژی (ناخێ) جڤاکا رۆژهلاتێ کوردستانی دە سەرهلدایە، لێنێرینەک بلەز ل سەر کارڤەدانێن رژێمێ ل همبەر چالاکیێن سیاسی و سڤیل و هەر وەها خوەپێشاندانێن ڤێ داویێ ل رۆژهلاتێ کوردستانی ب هەڤبەر کرن دگەل ناڤچەیێن دن یێن ئیرانی ڤێ راستیێ باشتر ژ بۆ مە روهن دکە.

بزاڤا رزگاریخوازا رۆژهلاتێ کوردستانێ، ژ ئالیێ هنەک رێخستنان ڤە تێ رێبەری کرن کو هه‌ژمارەک ژ وان هێزێن پێشمەرگە هەنە و بۆ ژ ناڤ برنا کۆمارا ئیسلامی یا ئیرانێ د خەبتن، ژ وان ئالیێن کو هێزێن چەکدار هەنە، پارتییا ژیانا ئازاد یا کوردستانێ (پەژاک) تێ دیتن کو هەلوەستا وێ ب تەمامی جودایە ل همبەر کۆمارا ئیسلامییا ئیرانێ و پرسا کوردان ل رۆژهلاتێ کوردستانێ.

پەژاک ل سالا 2004ێ دە ژ ئالیێ پەکەکێ ڤە وەکە ستراتەژییا دروستکرنا رێخستنێن ژێر کۆنترۆلا خوە ل پارچەیێن دن یێن کوردستانێ هات ئاڤا کرن و ب شیوەیەکە رژد دژاتییا کۆمارا ئیسلامییا ئیرانێ ناکە، پاش سالا 2011ێ پەژاک و شاخا وێ یا چەکدار هەرەکە HRK، ئاگربەست د گەل ئیرانێ راگهاند و چالاکیێن خوە یێن سەربازی ل دژی ئیرانێ سەکناندن، یا راست ئەڤ لهەڤهاتن نەلهەڤهاتنا د ناڤبەرا پەژاکێ و ئیرانێ دا یە، بەلکو لهەڤهاتنا د ناڤبەرا ئیرانێ و پەکەکێ یە.

ل ڤڕ پرسا سەرەکە ئەڤە کو چما پەکەکێ دگەل ئیرانێ دە ئاگربەستێ رادگهینە؟ یان ژی زەلالتر ببێژین گەلۆ ب راستی د ناڤبەرا پەکەکێ و ئیرانێ دە چ پەڤچوونەک سەربازی یا راست هەبوویە داکو پێویست بکە ئاگربەستێ راگهینن؟ ژ بۆ کو ئەم ڤان پرسان ب بەرسڤ بینین پێویست دکە ئەم ل دیرۆکا 30 سالی یا په‌یوه‌ندیێن د ناڤبەرا پەکەکێ و رژێما ئیرانێ ده‌ بنێرین، تا کو ئەم بزانن د دەما ڤان 30 سالان دە په‌یوه‌ندیێن د ناڤبەرا پەکەکێ و ئیرانێ دا ب چ قۆناغ دە دەرباز بوونە و چ لهەڤهاتن و دژبەری ب خوە ڤە دیتینە.

دەستپێکا هەڤنیاسینا پەکەکێ و رژێما ئیرانێ بۆ سالا 1982ێ ڤەدگەرە

پەکەکە و رژێما ئیرانێ په‌یوه‌ندییەک دیرۆکی هەیە و دەستپێکا دروستبوونا ڤان په‌یوه‌ندییان بۆ سالا 1981-1982ێ ڤەدگەرە، رژێما سووریێ ئەو ئالی بوو کو رژێما ئیرانێ و پەکەکە ب هەڤدو ناساندین، پشتی کۆدەتایا سالا 1980ێ ل ترکیێ، پەکەکێ هێزێن خوە ل سووریێ و لبنانێ جیگیر کرن و بوو بەشەک ژ ئالیێ دژبەرێ ئیمپریالیزمێ و دژاتیکرنا ئیسرائیلێ، دژاتیکرن گهیشت ئاستەکە وها کو د شەرێ د ناڤبەرا لبنانێ و ئیسرائیلێ دە ل سالا 1982ێ، مل ب ملێ هێزێن فەلەستینی ل دژی ئیسرائیلێ شەر کر و د وی شەری دە 13 گەریلایان جانێ خوە ژ دەست دا.

ژ ئالییەکێ بەشدار بوونا پەکەکێ د شەرێ دژی ئیسرائیلێ ده‌ پیڤەرەک باش بوو ژ بۆ هەلسەنگاندنا پەکەکێ ژ ئالیێ سووریێ و ئیرانێ، ژ ئالییەکە دن عاجز بوونا تەهرانێ و دیمەشقێ ژ حکوومەتا ترکیێ یا ئەندام د ناتۆیێ دە، ئەڤ دەرفەت ژ بۆ پەکەکێ دروست کر داکو په‌یوەندیێن خوە دگەل دیمەشقێ و تەهرانێ بەرەڤ پێش ببە.

پەکەکێ ل بەرانبەر ڤێ یەکێ چ ئالیکاری پێشکێشی ئیرانێ و سووریێ کرن؟ گەلۆ د وێ ماملەیا کرین و فرۆتنا د ناڤبەرا پەکەکێ دگەل ئیران و سووریێ دە هاتییە ئەنجام دان، پەکەکێ چ مفایەک دیت؟ ڤێ مامەلێ چ دەستکەفتەک ژ بۆ گەلێ کورد و بزاڤا وێ یا رەوا هەبوو؟

خالێن سەرەکە یێن هەڤپەیمانییا د ناڤبەرا ئیرانێ و پەکەکێ ده‌ چ بوون؟

ئیرانێ ب ئاوایەک لێزان پەکەکە ل دژی ترکیێ بکارئانی و پەکەکە ژی کاری ریخستنێن خوە بهێز بکە و پرانییا رێبەرێن پەکەکێ ب رییا بالەفرخانەیا تەهرانێ و دیمەشقێ د هاتن و چوونی دە بوون و د هێلا شەمزینان و خواکورک و بادینان بجی ببوون.

پەیوەندیێن تەلەفۆنی د ناڤبەرا ئۆجالان و قادرۆیێن رێڤەبەر یێن پەکەکێ دە ب ئاوایەک سیستماتیک بەردەوام بوون و رێنمایێن ئۆجالان ب هێسانی دگهیشتن هێزێن پەکەکێ کو ئەڤ یەک ژی ببوو سەدەما دروست کرنا رەوشەک پر باش ژ بۆ بهێز بوونا پەکەکێ، رژێما ئیرانێ ل دەستپێکێ ب ئاوایەک سینۆردار ئالیکاریین لۆجیستی و خوارنێ پێشکێشی پەکەکێ دکرن وان دخوەست بزانبن هێزا پەکەکێ چ قاسە و دخوازە چ بکە.

ل سالا 1984ێ دە و پاش دەست پێ کرنا شەرێ د ناڤبەرا پەکەکێ و حکوومەتا ترکیێ ده‌، په‌یوه‌ندیێن د ناڤبەرا رژێما ئیرانێ و پەکەکێ پێتر بەرەڤ پێش چوون و ل سالا 1986ێ پارتییا کارکەرێن کوردستانێ و حکوومەتا ئیسلامییا ئیرانێ لهەڤهاتنەک ئیمزە کر کو خالێن وێ یێن سەرەکە ئەڤن:

  • نابە پەکەکێ ل ناڤچەیێن سینۆری یێن د ناڤبەرا ترکیێ و ئیرانێ دە ب درێژاهییا 50 کیلۆمەتران چالاکیێن سەربازی هەبن.

  • نابە پەکەکێ ل ناڤا جڤاکێ رۆژهلاتا کوردستانێ دە چالاکی هەبن و گەلێ رۆژهلات چەکدار بکە.

  • نابە چ پەیوەندییەک د ناڤبەرا پەکەکێ و پارتیێن دن یێن کوردی یێن دژبەری ئیرانێ دە هەبە.

  • پێویستە ئەو زانیاریێن دگهن دەست پەکەکێ، ئیرانێ ژی پی ئاگهدار بکن.

  • ئیران وێ رێ ب پەکەکێ بدە ل هنەک ناڤچەیێن ئیرانێ بنگەهێن خوە ئاڤا بکە.

  • ئیران دێ د بیاڤی سەربازی دە ئالیکارییا پەکەکی بکە و دێ رێ ب پەکەکێ ژی بدە ژ بۆ خوە چەکان بکرە.

  • ئیران دێ رێ ب پەکەکێ بدە ژ بۆ خوە هنەک چالاکیێن ئابووری یێن سینۆردار ئەنجام بدە.

  • د دەما پێویست دە حکوومەتا ئیرانێ وێ پیناس و پاسەپۆرتا ئیرانێ بدە چەکدارێن پەکەکێ.

  • ل سەر وێ بنەمایێ کو ئیران و پەکەکە هەردو ل ئەنیا دژی ئیمپریالیزمێ دە جی دگرن، هەر دەما پێویست بە ل دژی ئیمپریالیزمێ جەنگ بکن.

ڤێ لهەڤهاتنێ هەرچەند كو هنەک گوهەرین تێدە هاتینە ئەنجام دان، لی بەلێ د نها دە ژی ئەساسێ پەیوەندیێن ئیران و پەکەکێ ل سەر ڤێ لهەڤهاتنێ یە.

ئەڤ بابەت ددۆمە….

پوستێن ھەمان بەش