په‌یوه‌ندیێن پەکەکێ و ئیرانێ، رابووری، نها و داهاتی – به‌شێ «12»

هه‌ڤدیتنا جه‌میل باییك و ئێتیلاعاتا ئیرانێ، وه‌ك‌ هه‌ڤدیتنا نێڤبه‌را دوو هه‌ڤالێن نێزیك بوو، شاندا ئێتیلاعاتێ 5 رۆژان ل قه‌ندیلێ ما

هه‌ر وه‌ك مه‌ د به‌شێ به‌رێ دا‌ باس كری، هه‌موه‌ختا كۆمبوونێن بالێ رێفۆرمخوازان ل به‌غدایێ د گه‌ل ئه‌مه‌ریكییان دا، یێ كو ئۆجالان ب بالێ راستگران ب ناڤ كری، بالێ كه‌ڤنه‌شۆپان یان ب قالا ئۆجالان بالێ چه‌پگران ل نێزیكی گوندێ سوره‌ت ل بنارا قه‌ندیلێ ل گه‌ل شاندێ ئێتیلاعاتا ئیرانێ دا كۆمبوون دكرن.

 نوونه‌رێ بالێ چه‌پگه‌ران د كۆمبوونێن ل گه‌ل ئیستخباراتا كۆمارا ئیسلامییا ئیرانێ دا، جه‌میل باییك بوو.

باییك ب تنێ ل گه‌ل ئێتیلاعاتا ئیرانێ دا كۆم دبوو

كۆمبوونا جه‌میل باییك یا ل گه‌ل ئێتیلاعاتا ئیرانێ دا‌، نه‌ تنێ كۆمبوونه‌كا سیاسی بوو، به‌لكو وه‌ك‌ كۆمبوونه‌كا نێڤبه‌را دوو هه‌ڤالێن نێزیك بوو، شاندێ ئێتیلاعاتێ بۆ ده‌مێ 5 رۆژان ل قه‌ندیلێ ما، ئه‌و مێهڤانێن جه‌میل باییك بوون، جه‌میل باییك ب تنێ به‌شداری كۆمبوونێن ل گه‌ل وان دبوو، یا راست ئه‌ڤ كۆمبوون نه‌ یێن نێڤبه‌را په‌كه‌كێ و ئیرانێ دا‌ بوون، لێ به‌لێ كۆمبوونێن نێڤبه‌را باییك و ئێتیلاعاتێ دا بوون، پاش ده‌رباسبوونا 5 رۆژان، جه‌میل باییك ئه‌رك وه‌رگرت و ئێدی وی ب ئاوایه‌كی توندتر دژبه‌رییا بالێ راستگران كر.

بالێ ریفۆرمخواز ژ په‌كه‌كێ جودابوه‌

جه‌میل باییك و نوونه‌رێن ئێتیلاعاتێ چ ب هه‌ڤدوو گۆتن، چ سۆزه‌ك ب هه‌ڤدوو دان؟ ئه‌و پرسگرێكێن بووینه‌ ئه‌گه‌ر كو په‌كه‌كه‌ ببیته‌ دوو به‌ش و 3 رێڤه‌به‌رێن وێ ژ سه‌رجه‌مێ 5 رێڤه‌به‌رێن ئێكێ و نێزیكی هه‌زار گه‌ریلایان ژ رێخستنێ جوداببن، هه‌تا مه‌ها 6 یا سالا 2004ێ د به‌رده‌وام بوون.

گرووپێ ریفۆرمخواز ژ په‌كه‌كێ جودابوو و رێخستنه‌كا نوو دامه‌زراندن، جه‌میل باییك ژی نه‌شیا ب ئاوایه‌كی بله‌ز گرووپه‌كێ كاریگه‌ر ل ناڤا په‌كه‌كێ دروست بكه‌ت، ل ناڤ گرووپا وی ژی هنده‌ك دژبه‌ری چێبوون.

باییك دژایه‌تییا قارایلان دكه‌ت

موراد قارایلان دبیته‌ رێبه‌رێ په‌كه‌كێ و دخوازیت‌ په‌یوه‌ندییان، ل گه‌ل ده‌وله‌تێن رۆژئاڤا و ئه‌مه‌ریكایێ دا ئاڤا بكه‌ت‌، قاریلان دخواست پژاك په‌یوه‌ندییان ل گه‌ل ئه‌مه‌ریكایێ دا ئاڤا بكه‌ت‌، لێ به‌لێ جه‌میل باییك ل همبه‌ری ڤان هه‌ولێن موراد قارایلان ده‌ردكه‌ڤیت و دژبه‌رییا وی دكه‌ت، ژ به‌ر كو باییك سۆز ب ئێتیلاعاتا ئیرانێ دابوو كو رێ ل به‌ر نێزیكبوونا په‌كه‌كێ و ده‌وله‌تێن رۆژئاڤا و ئه‌مه‌ریكایێ دا‌ ده‌ركه‌ڤیت‌ و هه‌موو هه‌وله‌كێ بده‌ت ژ بۆ كو وێ سۆزا خوه‌ بجهبینیت.

سۆزێن كو باییك ب ئێتیلاعاتێ داین ئه‌ڤه‌ بوون:

  1. په‌كه‌كه‌ ده‌ست ژ ئایدۆلۆژییا خوه‌ یا دژاتیكرنا ئیمپریالیزمێ به‌رنه‌ده‌ت‌ و ب چ ئاوایه‌كی هاریكارییا ئه‌مه‌ریكایێ نه‌كه‌ت، هه‌موه‌خت ته‌ڤ گرووپێن ناڤا په‌كه‌كێ یێن كو دخوازن نێزیكی ئه‌مه‌ریكایێ و رۆژئاڤا ببن، ته‌سفییه‌ بكه‌ت.

  2. په‌كه‌كه‌ شه‌رێ دژی ده‌وله‌تا تركیێ ده‌ست پێ بكه‌ت‌ و ل گه‌ل ئه‌نقه‌ره‌یێ چ په‌یوه‌ندیێن ستراتیجی ژ بۆ چاره‌سه‌ر كرنا دۆزا كوردی ئاڤا نه‌كه‌ت‌.

  3. په‌كه‌كه‌ ب رێیا پژاكێ حه‌زا رزگاریخواز یا كوردێن رۆژهه‌لات ژ ناڤ ببه‌ت، ژ به‌ر كو پرانییا كوردێن رۆژهلات ڤینا سه‌رخوه‌بوون و ئاڤاكرنا ده‌وله‌تا سه‌ربخوه‌ یا كوردستانێ هه‌یه‌، ل ڤێرێ پێدڤییه‌ په‌كه‌ك ب ناڤێ پژاكێ ڤێ ڤینا ل جه‌م كوردێن رۆژهلات نه‌هێلیت و فكرا پێدڤی نه‌بوونا ب ده‌وله‌تا كوردی ل ناڤا كوردێن رۆژهلات و هه‌روه‌ها ل ناڤا گه‌ریلایێن پژاكێ به‌لاڤ بكه‌ت.

  4. ئه‌و هێزا كو بالێ ریفۆرمخوازێ په‌كه‌كێ ژ بۆ رۆژهلاتا كوردستانێ ب ناڤێ هێزا ئازادییا كوردستانێ HAK بهێته‌ لاواز كرن و ژ ناڤ برن.

  5. په‌كه‌كه‌ وه‌ك هه‌ڤپه‌یمانییا ستراتیجی یا ئیرانێ بمینیت‌ و ته‌ڤ پرۆژه‌یێن خوه‌ ل گه‌ل ئیرانێ بجهبینیت.

  6. ئیران ژ بۆ پشتگرییا بالێ جه‌میل باییك بكه‌ڤیته‌ ناڤا هه‌ولێن مه‌زن دا‌ و د سیاسه‌تا رۆژهلاتا ناڤین ژی دا، پشتگریێ بده‌ته‌‌ په‌كه‌كێ.

جه‌میل باییك نه‌شییا ته‌ڤ سۆزێن ب ئێتیلاعاتا ئیرانێ داین ب جهـ بینیت.

ئه‌ڤه‌ گرنگترین سۆز بوون كو باییك و شاندێ ئێتیلاعاتا ئیرانێ لهه‌ڤكرن ل سه‌ر كری، لێ به‌لێ باییك نه‌شیا وان هه‌موو سۆزان ب جهـ بینیت، د به‌شێ بهێت دا‌، ئه‌م دێ ب وورده‌كاری باس كه‌ین.

ڤێ مژارێ به‌رده‌وامی هه‌یه‌