په‌یوه‌ندیێن پەکەکێ و ئیرانێ، رابووری، نها و داهاتی – به‌شێ «7»

په‌یوه‌ندیێن پەکەکێ و ئیرانێ، رابووری، نها و داهاتی – به‌شێ «7»

پەکەکێ 15 کادرێن پارتییا «ئاگرێ سۆر» تەسلیمی ئیرانێ كرن

پەکەکە ژ بۆ کو وان پارتیێن رۆژهه‌لات ل وان ناڤچەیێن سنۆری دوور بکەت، هندەک پیلان جی ب جی کرن، میناکێن هاریكارییا پەکەکێ بۆ دەستهلاتا ئیرانێ ل دژی پارتیێن رۆژهه‌لات گه‌له‌كن، چارەنڤیسا پارتییەکا کوردی ب ناڤێ «ئاگرێ سۆر» وەک میناکا هەره‌ دیار و بەرچاڤ یا وان هاریكارییان خویا دکەت.

رێخستنا «ئاگرێ سۆر» رێخستنەکا سۆسیال و نەتەوه‌یی بوو، تەڤ کادرێن ڤێ رێخستنێ ل چیا دمان و کادرێن ژن ژی د گەل وان دا هەبوون، «محەمەد پێنجوینی» سەرپەرشتییا ڤێ رێخستنێ دکر، هه‌ر چه‌ند کو رێخستنەکا بچووک بوو، لێ بەلێ د بیر و باوەران دا پێشکەتی و نشتیمانپەروەر بوو، دەمەکێ درێژ بارەگەهێن وان ل نێزیكی بنگەهێن پەکەکێ بوون و وان گه‌له‌ك باش هەڤدوو ناس دکرن، لێ بەلێ ب پیلانەکا پەکەکێ ئەڤ رێخستنه‌ د رۆژەکێ دا هات ژ ناڤ برن.

بارەگەها ناڤەندی و سەرەکی یا رێخستنا «ئاگرێ سۆر» ل سالا 2000ێ ژ ئالیێ پەکەکێ ڤە دهێته‌ دۆرپێچ کرن، ژ بەر کو کادرێن ئاگرێ سۆر ب چ ئاوایی د وێ باوەرێ دا نەبوون کو دێ ژ ئالیێ گەریلایێن پەکەکێ ڤە هێنه‌ دەستەسەر کرن، بێ چ پەڤچوونەک خوە رادەستی چەکدارێن پەکەکێ کر، جهێ داخێ یە پەکەکێ پشتی دەستەسەر کرنا 15 پێشمەرگەیێن ڤێ رێخستنێ کو دوو ژ وان ژن بوون، دەست و پیێن وان گرێدده‌ن و وان تەسلیمی ئیرانێ دکه‌ن.

بارەگەهێ رێخستنا «ئاگرێ سۆر» ل سالا 2000ێ ژ ئالیێ پەکەکێ ڤە دهێته‌ دۆرپێچ کرن

محەمەد پێنجوینی کو سەرۆکێ ڤێ رێخستنێ بوو، ل باژارێ ئۆرمیێ دهێته‌ سێداره‌دان، نها ژی چ زانیارییەک ژ چارەنڤیسا کادرێن دی یێن رێخستنا «ئاگرێ سۆر» ل بەر دەست نینە، ب ڤی ئاوایی رێخستنەکا کوردی ب بێ دەنگی دهێته‌ ژ ناڤ برن و 15 کەسێن شۆرەشگێر و وه‌لاتپارێز دبنه‌ قوربانیێن په‌یوەندیێن د ناڤبەرا پەکەکێ و ئیرانێ دا، پشتره‌ هەول دهێنه‌ دان خەلک ڤێ بوویەرێ نەزانیت و هه‌روه‌ها نەزانیت كو ل دەمەکی ریخستنەکا کوردی هەبوویە کو ل دژی ئیرانێ خەبات دکر.

ئه‌رێ ئەڤ رێخستنه‌ ژ ئالیێ کێ ڤە هات ژ ناڤ برن؟ بێ گومان ژ ئالیێ پەکەکێ ڤە، ئه‌رێ کێ ئەڤ دربە ل ڤێ رێخستنێ دا؟ بێ گومان پەکەکێ، کێ ئەڤ پیلانه‌ جی ب جی کر؟ بێ گومان کەسەکی کو ئەم هەموو باش ناس دكه‌ین ئه‌و ژی “جەمیل باییک” ێ رێڤه‌به‌رێ په‌كه‌كێ یه‌.

محەمەد پێنجوینی ل ئۆرمیێ دهێته‌ سێدارەدان

محەمەد پێنجوینی و هەڤالێن وی ل جهه‌كێ نێزیكی جەمیل باییکی هاتنه‌ ده‌سته‌سه‌ر كرن

ل دەمێ دەستەسەر کرنا محەمەد پێنجوینی و هەڤالێن وی، جەمیل باییک ب تنێ 22 کم ژ جهێ بوویەرێ دوور بوو، 2 بالەفرێن ئیرانی ل جهەکێ نێزیكی جەمیل باییک دهێنه‌ د خوارێ و رایەدارێن ئیرانێ دگه‌ل جەمیل باییکی كۆمبوونه‌كێ دكه‌ن، پشتی 2 ده‌مژمێران تەڤ 15 کادرێن ئاگرێ سۆر ژ ئالیێ پەکەکێ ڤە و ب بریارا جەمیل باییکی تەسلیمی ئیرانێ دهێنه‌ کرن، ئەڤ یەک ژی ددەته‌ خویا کرن کو پەکەکه‌ ژ بۆ پاراستنا بەرژەوەندیێن خوە یێن حیزبی دشێت هەموو سنۆرێن نەتەوه‌یی و نشتیمانی دەرباس بکەت و دشێت ب ڤی ئاوایی دوور ژ مرۆڤاتیێ هاریكارییا داگیرکەران بکەت.

دڤێت ئەم دیرۆکا 50 سالێن رابووری یێن نەتەوەیا خوە وەک ئەرکەک نەتەوه‌یی بنڤیسین، ئەڤ دیرۆک هه‌تا نها هاتییە پشت گوهـ هاڤێتن، ڤێ دیرۆکێ پەکەکە دنڤیسیت و به‌لاڤ دکەت، وێ تەڤلیهەڤ دکەت ژ بۆ کو گەل راستییان نەزانیت و پەکەکە ل گۆر بەرژەوەندیێن خوە دیرۆکێ دنڤیسیت، داکو گەل نەزانیت کوردەک ب ناڤێ محەمەد پێنجوینی ب چ ئاوایی هاته‌ سێداره‌دان، نڤیسینا دیرۆکێ و ئەشکەرە کرنا راستیێن دیرۆکی ئەرکێ گەلە و دڤێت گەل ڤێ دیرۆکێ بنڤیسیت.

ئەو خوەش خزمەتییا کو پەکەکە ل سەر حسابا کورد و کوردستانێ پێشکێشی حکوومەتا ئیرانێ دکەت، بنیاتێ پێوەندیێن ڤان دوو ئالیانە

دیرۆکا راست دبێژیته‌ مه‌، په‌یوه‌ندیێن د نێڤبەرا پەکەکێ و ئیرانێ دا دبیت هندەک بەرژەوەندیێن بچووک ژ بۆ ڤێ رێخستنێ هەبن، لێ بەلێ ئەڤ دەستکەفت ل سەر ئەساسا ژ ناڤ برن و تەپەسەر کرن و بێدەنگکرن و نه‌هێلانا باندۆرا بزاڤا نەتەوه‌یی یا رۆژهه‌لاتێ کوردستانێ بوویە.

دەولەتەکا داگیرکەر وەک ئیرانێ ب تەنێ ژ بەر هندەک بەرژەوەندیێن بچووک په‌یوه‌ندییان دگه‌ل پەکەکێ گرێناده‌ت و هه‌گه‌ر بزانیت ئەڤ په‌یوه‌ندییه‌ چ مفایه‌كێ مه‌زن ژ بۆ وێ تێدا نینه‌، دێ وان په‌یوه‌ندییان هه‌لوه‌شینیت، یا کو دهێته‌ باس کرن رێڤەبەرێن پەکەکێ عەلەوی نە له‌وما ئیران په‌یوه‌ندییان دگه‌ل ئاڤا دكه‌ت، ته‌نێ ماسكه‌كه‌ کو راستیا په‌یوه‌ندیێن پەکەکێ و ئیرانێ پێ دهێته‌ پەچنین، هه‌گەر نه‌ ئەساسا وان په‌یوه‌ندییان د راستی دا ئەو خوەش خزمەتینە کو پەکەکە پێشکێشی حکوومەتا ئیسلامی یا ئیرانێ دکەت و ب تەنێ کوردستانا داگیرکری و خەباتا رزگاریخوازییا وێ یا رەوا باجا ڤان په‌یوه‌ندییان دده‌ن.

پوستێن ھەمان بەش