په‌یوه‌ندیێن پەکەکێ و ئیرانێ، رابووری، نها و داهاتی – به‌شێ «8»

سالێن 2000ێ – په‌كه‌كه یا بێ ئۆجالان و ئیران

ل 15 شوباتا 1999ێ، ب ده‌سته‌سه‌ر كرنا ئۆجالان و ڤه‌گه‌راندنا وی یا ژ بۆ تركیێ، ره‌وشه‌كا‌ نوو هاته‌ پێش، هه‌ر كه‌سێ هێڤی دكر ئۆجالان به‌رخوه‌دانه‌كا‌ مه‌زن بكه‌ت و ره‌وشه‌كا‌ هه‌ری زه‌حمه‌ت ل به‌ر تركیێ چێكه‌ت، لێ به‌لێ جهێ داخێ یه‌ وه‌ها نه‌بوو، ئۆجالان د یه‌كه‌م هه‌نگاڤ دا‌ گۆت: «ئه‌ز هاتیمه‌ ژ بۆ كو خزمه‌تا تركیێ بكه‌م، دێ رێخستنا په‌كه‌كێ گوهه‌رینم ژ بۆ كو خزمه‌تا تركیه ‌یا ده‌مۆكراتیك بكه‌ت‌».

ئه‌ڤ هه‌لوه‌ستا ئۆجالان و خزمه‌ت كرنا ب تركیێ و كۆمارا ده‌مۆكراتیك، هه‌موو خه‌یال و هێڤیێن كو گه‌لێ كورد د هشێن خوه‌ دا‌ ئاڤا كرین شكاندن، ئه‌ڤ ره‌وش ژ بۆ ئیرانێ ژی وه‌ها بوو، چونكه‌‌ ئیرانێ پیلانێن خوه‌ ل سه‌ر بنگه‌ها به‌رخوه‌دانا ئۆجالان چێكربوون و ب باوه‌ر بوو كو هه‌ڤپه‌یمانێ وێ یێ ستراته‌ژیك دێ ل زیندانێ به‌رخوه‌دانه‌كا‌ بێ هه‌مپا بكه‌ت‌.

خه‌یالێن پاش 15 شوباتێ شكه‌ستن ئینان

پاش رێكێن مانا ل سووریه‌یێ ل به‌ر ئۆجالان نه‌ماین، یه‌ك ژ بژارده‌یێن ئۆجالان ئه‌و بوو كو بچیته‌ ئیرانێ و ل وێرێ بمینیت‌، هه‌ر چه‌ند كو ئیران ژێرا‌ نابێژیت‌ نا، لێ به‌لێ مه‌رجێن مانا وی ژی ل ئیرانێ گره‌نتی ناكه‌ت‌، وه‌ها دیاره‌ ترسا ئیرانێ ژ دوو پرسگرێكان هه‌بوو، یا ئێكێ ئه‌و بوو كو ئۆجالان بچیته‌‌ ده‌وله‌ته‌كا‌ دی و ل وێرێ بكه‌ڤیته‌ ژێر هه‌ژموونا وێ ده‌وه‌له‌تێ و ژ ئیرانێ دوور بكه‌ڤیت‌، یا دووێ ژی ترسا ئیرانێ ژ قه‌بوول كرنا ئۆجالان هه‌بوو، هه‌تا وێ ده‌ما كو ل 15ی شوباتێ ئۆجالان ژ بۆ تركیێ هاتییه‌ ڤه‌گه‌راندن و گه‌لێ كورد ل هه‌ر ده‌ره‌كێ چالاكیێن نه‌رازیبوونێ مه‌شاندن.

په‌كه‌كێ ژی چاڤه‌رێ نه‌دكر كو ل ئیرانێ چالاكیێن نه‌رازیبوونێ بهێن كرن

كێم كه‌سان چاڤه‌رێیا وێ یه‌كێ دكر كو ل ئیرانێ ل سه‌ر ده‌سته‌سه‌ر كرنا ئۆجالان چالاكیێن نه‌رازیبوونێ بهێنه‌ ئه‌نجام دان، لێ به‌لێ ل ده‌ستپێكێ ل ته‌هرانێ و پشتره‌ ل باژارێن دی، خویندكارێن زانینگه‌هان داكه‌تن جاددێ و ته‌ڤلی چالاكیێن نه‌رازیبوونێ بوون، خوه‌ په‌كه‌كێ ژی چاڤه‌رێ نه‌دكر كو ل ئیرانێ چالاكیێن ب ڤی ئاوایی بهێنه‌ ئه‌نجام دان، ژ به‌ر كو چ رێخستنێن وه‌ها ل ئیرانێ نه‌بوون و هه‌موه‌خت مه‌دیا ئیرانێ ژی مینا نها ب هێز نه‌بوو كو بشێت خه‌لكی ل هه‌ڤ كۆم بكه‌ت، لێ به‌لێ پرسا گرنگ ئه‌ڤه‌یه‌‌ كو ئه‌ڤ چالاكی ب چ ئاوایی و بۆچی هاتن ئه‌نجام دان؟

گه‌له‌ك كه‌س وه‌ها هزر دكه‌ن كو ئه‌ڤ چالاكی ب پیلانه‌كا‌ ئیرانێ هاتنه‌ ئه‌نجام دان، رژێما ئیرانێ جاران جادێ د حه‌ركینیت‌ ژ بۆ كو بزانیت كاریگه‌رییا وێ ب چ ئاوایی یه‌ داكو ژ بۆ خوه‌ بكه‌ته‌ فرسه‌ته‌ك و سۆدێ ژێ وه‌ربگریت‌، د بوویه‌رێن 15ی شوباتێ ژی دا ئیرانێ ئه‌ڤ میتۆد بكارئینا، هه‌مده‌م په‌یامه‌ك ژی ژ بۆی په‌كه‌كێ شاند ژ بۆ كو بێ هێڤی نه‌مینیت‌ و گره‌نتی ژێرا دا كو ئێدی ئیران دێ پشتگرییا وێ كه‌ت.

لێ یا راست ئیرانێ ئارمانجه‌كا دی ژ ڤان چالاكیێن نه‌رازیبوونێ هه‌بوو، وێ د خواست خه‌لكێ خوه‌ باش ناس بكه‌ت ب تایبه‌ت ئه‌وێن د چالاكییان دا‌ د خواستن ل دژی ر‌ژێمێ ب حه‌ركن، ئیرانێ د خوا‌ست وان بێخیته‌ ژێر چاڤدێری و ته‌عقیبا سازیێن ئیستخباراتی ژ بۆ كو ژ پیلان، فكر و ته‌ڤگه‌ریانا وان هایدار ببیت.

ل ده‌ستپێكێ چالاكی پیلانا ئیرانێ بوون

وه‌ها دیاره‌ ئیرانێ ئارمانجه‌كا مه‌زنتر هه‌بوو، ئیرانێ د خوا‌ست هه‌ستا نه‌ته‌وه‌ی یا كوردێن رۆژهلاتا كوردستانێ به‌ر ب پارچه‌یه‌كا دی یا كوردستانێ ئاراسته‌ بكه‌ت و ژ ناڤا رۆژهلاتا كوردستانێ و ئیرانێ دوور بێخیت، هه‌مده‌م د خوا‌ست وه‌ها نیشان بده‌ت كو تركیه‌ دژمنێ كوردانه‌ و ئیران ژ دژمناتییا كوردان دووره‌، ئه‌ڤ تاكتیكا ئیرانێ هه‌تا ڤان سالێن داویێ ده‌وام كر، وێ سۆده‌كا مه‌زن ژێ وه‌رگرت، ئیرانێ خوا‌ست هه‌روه‌ها سۆدێ ژ ناڤێ ئۆجالان وه‌ربگریت‌ و ل سه‌ر ناڤێ وی هنده‌ك پرتووكان به‌لاڤ بكه‌ت.

ئیرانێ پاش ده‌سته‌سه‌ر كرنا ئۆجالان ب په‌كه‌كێ راگه‌هاند كو ئه‌و دێ ب هه‌موو هێزا خوه‌ پشتگریێ ده‌ته‌ رێخستنێ

ئیرانێ پاش ده‌سته‌سه‌ر كرنا ئۆجالان، كۆمبوونه‌ك ل گه‌ل په‌كه‌كێ چێكر و ژێرا گۆت كو ئه‌و دێ ب هه‌موو هێزا خوه‌ پشتگریێ ده‌ته‌ رێخستنێ، هه‌موه‌خت كانی ب چ ئاوایی سووریێ رێ ب ئۆجالان دا، وه‌ها ته‌هران ژی ئاماده‌یه‌ جهه‌كی ب رێبه‌رێن رێخستنێ بده‌ت و جهه‌كی ژی ژ بۆ په‌روه‌رده‌كرنا گه‌ریلایان دابین بكه‌ت و بریندارێن وان ژی چاره‌سه‌ر بكه‌ت.

پاش ڤێ كۆمبوونێ سه‌رجه‌م رێبه‌رێن په‌كه‌كێ ل نێزیكی ناڤچه‌یێن سنۆری یێن ئیرانێ و ل نیزیكی بنگه‌هێن له‌شكری یێن ڤێ ده‌وله‌تێ جهـ گرتن.

پوستێن ھەمان بەش