په‌یوه‌ندیێن پەکەکێ و ئیرانێ، رابووری، نها و داهاتی – به‌شێ «9»

په‌یوه‌ندیێن پەکەکێ و ئیرانێ، رابووری، نها و داهاتی – به‌شێ «9»

 ئاخفتنێن ئۆجالان ل دادگه‌هێ و بریارا ڤه‌كێشانا هێزێن په‌كه‌كێ ژ تركیێ، ئیران دلگران كر

هەر وه‌ك‌ د به‌شا رابووری دا مه‌ ئاماژه‌ پێ دای كو پاش ده‌سته‌سه‌ر كرنا ئۆجالان، كۆمارا ئیسلامییا ئیرانێ ل گه‌ل رێبه‌رێن په‌كه‌كێ كۆمبوو و سۆز پێ دا كو پشتگرییا وان بكه‌ت‌، پاش ڤێ جڤینێ، ته‌ڤ رێبه‌رێن په‌كه‌كێ ل ناڤچه‌یێن سنۆری یێن ئیرانێ ل نێزیكی باره‌گه‌هێن سپایێ پاسداران جهـ گرتن.

عه‌بدوللا ئۆجالان ل دادگه‌هێ پووشمانییا خوه‌ ژ بۆ ته‌ڤگه‌را ل همبه‌ر تركیێ نیشان دا، وی فه‌رمان ژ بۆ ته‌ڤ گه‌ریلایان هنارت كو ژ خاكا باكورێ كوردستانێ ده‌ركه‌ڤن، ئیران ژ ڤێ بریارا ئۆجالان ب گومان بوو، وێ هزر دكر په‌كه‌كه‌ دێ داخوازا ده‌ركه‌فتنێ ژ رێككه‌فتنا ل گه‌ل وێ ئیمزا كری، بكه‌ت، لێ ژ ئالییه‌كێ دی، ئیران پشت گه‌رم بوو كو په‌كه‌كه‌ هه‌موو نه‌ ئۆجالانه‌، به‌لكو هنده‌ك كادرێن رێڤه‌به‌ریێ تام بالێ ئیرانێ نه‌ و ژ خه‌تا ئیرانێ ده‌رناكه‌ڤن.

ئه‌ڤ كادرێن به‌رز یێن په‌كه‌كێ كی نه‌ كو نێزیكی ئیرانێ نه‌؟ ئه‌م دێ پاش به‌رسڤا ڤێ پرسێ ده‌ین، لێ ل ده‌ستپێكێ پێویسته‌ باس ل هنده‌ك پیلانێن كۆمارا ئیسلامییا ئیرانێ ل دژی كورد و كوردستانێ بكه‌ین.

 شه‌رێ په‌كه‌كێ و یه‌نه‌كێ، شه‌رێ ڤان دوو ئالییان بوو، یان ئیرانێ به‌رێ وان دا شه‌ری؟

پاش ده‌سته‌سه‌ر كرنا ئۆجالان و ل سالێن 2000ێ، په‌كه‌كێ كۆنگره‌یا خوه‌ یا 7ێ ساز كر، د كۆنگره‌ی دا‌ چ بریاره‌ك ل دژی ئۆجالان كو هه‌لوه‌ستێ پووشمانیێ ل همبه‌ر تركیێ نیشان دابوو نه‌هات دان، د كۆنگره‌ی دا‌، بریار هات دان كۆمیته‌یه‌ك بهێته‌ دامه‌زراندن و ئه‌و كۆمیته‌ ئه‌ركێن ئۆجالان جێ ب جێ بكه‌ت‌ و په‌كه‌كێ ب رێڤه‌ ببه‌ت‌.

وه‌ختێ ئیرانێ زانی په‌كه‌كێ‌ چ هه‌لوه‌ست ل همبه‌ر ئۆجالان نابن، ئاسته‌نگ بۆ چێكرن

ئه‌ڤ یه‌ك ب دلێ ئیرانێ نه‌بوو، وه‌ختێ كو ئیرانێ زانی په‌كه‌كێ‌ چ هه‌لوه‌سته‌ك ل همبه‌ر ئۆجالان نابیت، خواست هنده‌ك ئاسته‌نگییان بۆ چێبكه‌ت، ئه‌ڤ كاره‌ ژ بۆ ئیرانێ ئاسان بوو، چونكه‌ وێ ته‌جروبه‌ هه‌بوو و كانێ ب چ ئاوایی وێ پێشتر شه‌ر ل نێڤبه‌را په‌كه‌كێ و یه‌نه‌كێ و په‌ده‌كێ چێكربوو، ئه‌ڤ جاره‌ ژی شه‌رێ ئێكه‌تییا نشتیمانییا كوردستانێ و پارتییا كاركه‌رێن كوردستانێ چێكر.

یه‌نه‌كێ ب ته‌علیماتێن ئیرانێ، ئاسته‌نگی  بۆ په‌كه‌كێ چێكرن

د ده‌ستپێكا سالێن 2000ێ دا‌، یه‌نه‌كه‌‌ ب ته‌علیماتێن ئیرانێ، كه‌ته‌ ناڤا هه‌ولێن ئاسته‌نگ كرنا رێخستنا په‌كه‌كێ دا‌ و ده‌ست ب سه‌ر باره‌گه‌هێن وێ دا‌ گرت و هه‌ژماره‌كا‌ به‌رچاڤ یا كادرێن وێ ده‌سته‌سه‌ر كرن، هنده‌ك ئالیگرێن په‌كه‌كێ ژی هاتن قه‌تل كرن، یه‌نه‌كێ داخواز ژ په‌كه‌كێ كر، ناڤچه‌یێن ژێر كۆنترۆلا وێ چۆل بكه‌ت، ل ته‌باخا سالا 2000ێ كۆمبوونه‌ك ل نێڤبه‌را په‌كه‌كێ و یه‌نه‌كێ ل دۆلێن قه‌ندیلێ چێبوو، لێ ژ به‌ر كو یه‌نه‌كه‌ یا تۆره‌ و عاجز بوو، نوونه‌رێن خوه‌ نه‌هنارتنه‌ ڤێ كۆمبوونێ و ل شوونا وان ئه‌ندامێن ئیستخباراتا ئیرانێ به‌شدار بوون.

قادر عه‌زیز، سه‌رۆكێ وی ده‌می یێ حیزبا زه‌حمه‌تكێشان د كۆمبوونێ دا‌ به‌شدار دبیت و په‌یاما مام جه‌لال تاله‌بانی ژ په‌كه‌كێ را دبێژیت‌، مام جه‌لال د په‌یاما خوه‌ دا‌ گۆتبوو: «مه‌ ل سالێن نۆتێ هاریكارییا هه‌وه‌ كربوو، مه‌ چه‌ندین جاران هوون ژ ده‌ستێ په‌ده‌كێ رزگار كرینه‌، نها ژی هوون دخوازن مه‌ ژ ناڤ ببن؟ هێز و باره‌گه‌هێن خوه‌ ژ ناڤچه‌یێن ژێر كۆنترۆلا مه‌ ده‌ربێخن، ژ بۆ كو چ كێشه‌ چێنه‌بن».

لێ به‌لێ په‌كه‌كێ به‌رسڤه‌كا‌ نهێنی ب یه‌نه‌كێ دده‌ت و د كۆمبوونا رێڤه‌به‌رییا رێخستنێ دا‌، بریارا راگه‌هاندنا شه‌ری ل دژی یه‌نه‌كێ هاته‌ دان.

ب ئه‌گه‌را هێرشا په‌كه‌كێ‌، هه‌ژماره‌كا‌ پێشمه‌رگه‌هێن یه‌نه‌كێ شه‌هید كه‌تن 

ل 26 ئیلۆنا سالا 2000ێ، په‌كه‌كێ هێرشی سه‌ر باره‌گه‌هێن یه‌نه‌كێ ل گوندێ عه‌لی ره‌ش كر و هه‌ژماره‌كا پێشمه‌رگه‌هێن یه‌نه‌كێ شه‌هید كرن، تشتێ سه‌یر ئه‌و بوو كو ل سپێده‌هییا وێ رۆژا هێرش هاتییه‌ كرن، گه‌ریلایێن په‌كه‌كێ و پێشمه‌رگه‌هێن یه‌نه‌كێ ب هه‌ڤرا د گوندێ عه‌لی ره‌ش دا بوون، وان ب هه‌ڤرا نان و چا د خوار، لێ به‌لێ ل ئێڤارێ په‌كه‌كێ هێرش كر و ئه‌و پێشمه‌رگه‌ شه‌هید كرن.

وه‌سا دیاره‌ سیاسه‌تێ دژوارییا خوه‌ هه‌یه‌ و فێل و ته‌لهه‌ تێدا هه‌نه‌، لێ به‌لێ تشتێ گرنگ ئه‌ڤه‌یه‌‌ نابیت سیاسه‌ت ب ئاوایه‌كی بێ ئه‌خلاق بهێته‌ كرن، پێویسته‌ كورد د سیاسه‌تێ دا‌ هنده‌ وه‌فا هه‌بیت وه‌ك‌ چاوا مرۆڤێ كورد ب كولتوور و خوه‌زایا خوه‌ وه‌فاداره‌، په‌كه‌كێ د ده‌ما 8 سالان دا‌ په‌یوه‌ندیێن گه‌له‌ك باش ل گه‌ل یه‌نه‌كێ هه‌بوون، لێ به‌لێ ب بریاره‌كێ یه‌نه‌كه‌ كره‌ دوژمنێ خوه‌ و ده‌ستێ وێ ب خوینا پێشمه‌رگه‌هان سۆر بوو.

ئه‌ڤ شه‌ر هه‌تا مه‌ها ئێك یا سالا 2001ێ به‌رده‌وام بوو و پشتره‌ ئاگربه‌ست هاته‌ راگه‌هاندن، د به‌شێ بهێت دا‌ ئه‌م دێ باس ل رۆلێ ئیرانێ د ڤی شه‌ری دا بكه‌ین.

ڤێ مژارێ به‌رده‌وامی هه‌یه‌

پوستێن ھەمان بەش