په‌یوه‌ندیێن پەکەکێ و ئیرانێ، رابووری، نها و داهاتی – به‌شێ «2»

په‌یوه‌ندیێن پەکەکێ و ئیرانێ، رابووری، نها و داهاتی
  • به‌شێ دوێ 

ئەڤ پێوەندی نەتەنێ د بەرژەوەندا کوردان دە نەبوونە، بەلکو زیان ب پەکەکێ ب خوە ژی گهاندینە

هەر وەک مە د بەشا یەکەمین دە باس کری ل سالا 1986ان دە، پەکەکە و کۆمارا ئیسلامی یا ئیرانێ لهەڤهاتنەک ئیمزە کر و بەندێن سەرەکی یێن ڤێ لهەڤهاتنێ مە باس کرن، هەر چەند کو هنەک گوهەرین تێدە هاتینە ئەنجام دایین، لێ بەلێ هێژان هەیا نها ستراکچەرا پێوەندیێن د ناڤبەرا ئیران و پەکەکێ دە ل سەر ڤێ لهەڤهاتنێ د دۆمن.

د چارچۆڤەیا ڤێ لهەڤهاتنێ دە، پارتییا کارکەرێن کوردستانی ل ناڤچەیا «دامبات» ل ئیرانێ کو دکەڤە بەرانبەر باژارێ ئاگری ل باکورێ کوردستانێ، هەروه‌ها ل سەر هێلا ستەراتەژی یا چیایێن زاگرۆسێ کو دکەڤە د ناڤبەرا رۆژهلات، باکور و باشوورێ کوردستانێ ده‌ جێگیر بوو، هەروەها ل ناڤچەیا شەهیدان ل ئالیێ ئیرانێ دە کو دکەڤە بەرانبەری شەمزینان ل باکوورێ کوردستانێ جێگیر بوون.

پەکەکە بەرەڤاژی سلۆگانێن خوە ژ بۆ دامەزراندنا کوردستانەک سەربخوە و یەکگرتی، د پراکتیک دە دگەل داگیرکارێن کوردستانێ مامەلێ دکە و لهەڤهاتنان دگەل ئیمزە دکە.

ل ڤر پێویست دکە زیدەتر باس ل وێ خالا پرۆگرامێ پەکەکێ بکین کو باس ل بەرهنگاربوونا دەولەتێن داگیرکار ل هەر چار په‌رچەیێن کوردستانێ و دامەزراندنا کوردستانەک سەربخوە و یەکگرتی دکە، ئەو کوردستانا کو د قادا رایا گشتی یا کوردان دە ب «کوردستانا مەزن» تێ ناڤکرن.

 لێ بەلێ ئەم دبینین کو پەکەکە بەرەڤاژی سلۆگانێن خوە د پراکتیک دە مامەلێ دگەل داگیرکارێن کوردستانێ دکە و لهەڤهاتنان دگەل ده‌ ئیمزا دکە کو پرانیا خالێن د ناڤا لهەڤهاتنێ دە دژاتییا کوردستانێ و کورداتیێ دکن، ئەشکەرە یە کو پێش نها ژی هنەک ژ پارتیێن باشوورێ کوردستانی ل ئیرانی بوون، لێ بەلێ خەباتا وان ل دژی ئیراقێ بوو و باس ل رزگار کرنا هەموو په‌رچەیێن کوردستانی کو رۆژهلاتێ کوردستانێ د دەستێن کۆمارا ئیسلامی یا ئیرانێ دە یە نە دکر.

لێ بەلێ پەکەکێ د پرۆگرامێ خوە دە باس ل هەر چار په‌رچه‌یێن کوردستانێ دکر، ب ئەو په‌رچه‌یا کوردستانێ کو ل ژێر داگیرکارییا رەژیما ئیرانێ دە یە ژی، لێ بەلێ د هەمان دەمێ دە دگەل ئیرانێ لهەڤهاتنەکێ ئیمزە دکە، ئەڤە پاش وێ یەکێ کو لهەڤهاتنەک دن دگەل رەژیما سووریێ ئیمزە کری، لهەڤهاتن دگەل دەولەتەک دن ئا داگیرکار وەکە ئیرانێ ژی ئیمزە کر.

ئەڤ یەک ژی وێ راستیێ ئیسبات دکە کو پەکەکە بەرەڤاژی پەیرەو و پرۆگراما خوە تەڤ دگەرە و هەر دەما بەرژەوەندیێن ڤێ رێخستنێ پێویست بکن، دەست ژ بەرژەوەندیێن نەتەوی بەرددە و وان سلۆگانان ژ بیر دکە کو د پرۆگراما پارتییا خوە دە باس کرینە.

پەکەکە د سیاسەتێ دە خوە ب شۆپینەرێن مەکتەبا میکاڤێلێ دزانە کو ئەو ژی ب کورتی ب واتەیا بەرژەوەند پەرێسیێ تێ، لێ بەلی ژ بۆ پەکەکێ مەبەست بەرژەوەندێن رێخستنێ نە، نەک بەرژەوەندیێن نەتەوی.

ئالیكارییا په‌كه‌كێ ل گه‌ل ئیرانێ – ب ل به‌رچاڤ گرتنا وێ ئیحتمالا ژ بۆ خه‌باتا نه‌ته‌وه‌یی كو ل باكورێ كوردستانێ هه‌بوو و روو ل په‌كه‌كێ كری – ئه‌و رێخستن راستی زرارێ كر

لهه‌ڤهاتنا ناڤبه‌را ئیرانێ و په‌كه‌كێ تو ده‌ستكه‌فته‌ك ژ بۆ خه‌باتا رزگاریخوازییا كوردی پێ نایێ ب ده‌ست خستن، هه‌گه‌ر مفایه‌كا وێ ژی ژ ئالیێ ئیرانێ ڤه‌ هه‌به‌، ئه‌و مفا ته‌نێ وێ د به‌رژه‌وه‌ندییا پارتییا كاركه‌رێن كوردستانێ ده‌ به‌، دوژمناتییا ده‌ستهلاتا داگیركار یا ته‌هرانێ ل گه‌ل دۆزا كورد و كوردستانێ كوورتره‌ ژ وێ یه‌كێ كو ژ به‌ر خاترا په‌كه‌كێ رۆله‌كا ئه‌رێنی د به‌رژه‌وه‌ندییا نه‌ته‌وه‌ییا كورد ده بگێریت، هه‌گه‌ر ئه‌م ب هووری ل ره‌وشا پارتییا كاركه‌رێن كوردستانێ مێزه‌ بكین، پاش ده‌ستپێكا ئالیكارییا وێ ل گه‌ل ئیرانێ – ب ل به‌رچاڤ گرتنا وێ ئیحتمالا ژ بۆ خه‌باتا نه‌ته‌وه‌یی كو ل باكورێ كوردستانێ هه‌بوو و روو ل په‌كه‌كێ كری – وێ ژ بۆ مه‌ ب زه‌لالی ئه‌شكه‌ره‌ به‌ كو ئالیكاریكرنا ئیرانێ مفایا وێ ژ بۆ په‌كه‌كێ ژی تونه‌ بوو، به‌لكو ئه‌و رێخستن ب خوه‌ ژی راستی زرارێ كرییه‌، لێ جیێ داخێ یه‌ كو رێبه‌رێن په‌كه‌كێ هه‌یا نها ئالیكارییا ره‌ژیما ئیرانێ د دۆمینن و پێتر ژ جاران خوه‌ راده‌ستی كاربده‌ستێن ئیرانێ كرنه‌.

پێوه‌ندیێن په‌كه‌كێ و ئیرانێ گهیشتنه‌ ئاسته‌كه‌ ستراته‌ژیك و ئه‌و رێخستن نه‌چار ما دوژمناتییا هنه‌ك ئالیێن دن بكه‌

ژ سالێن نۆتان و پاش، پێوه‌ندیێن په‌كه‌كێ و ئیرانێ رۆژ بۆ رۆژێ كوورتر لێ هاتن و گه‌شه‌یه‌كه‌ پێتر د خالێن لهه‌ڤهاتنێ ده‌ دیت، هه‌یا گهانه‌ وێ ئاستێ كو دكارین ناڤێ پێوه‌ندیێن ستراته‌ژیك لێ بێ كرن، ب وی ئاوایی كو ده‌وله‌تا تركیێ نه‌ما دوژمنا یه‌كه‌م یا په‌كه‌كێ، لێ به‌لێ پێویست كر ئێدی په‌كه‌كه‌ دوژمناتییا هنه‌ك ئالیێن دن بكه‌.

ئه‌و ئالیێن كو پارتییا كاركه‌رێن كوردستانێ وه‌كه‌ دوژمنێن خوه‌ یێن نوو مێزه‌ دكه‌، كی بوون؟ شه‌رێ ناڤخوه‌ كه‌نگی و ل كو ده‌رێ سه‌رهلدا؟ ژ ئه‌نجاما ڤی شه‌ری كوردان چ ژ ده‌ست دا؟ به‌رسڤا ڤان پرسان و هنه‌ك زانیاریێن دن ل به‌شێن بهێن ئه‌مێ بدن.

پوستێن ھەمان بەش